2 Macabeo 7
7
Ang Iloy kag ang Iya mga Anak Ginpamatay tungod sang Ila Pagtuo
1Sa#Heb. 11:35-36. isa pa gid ka tion may pito man ka mag-ulotod nga lalaki nga ginpadakop upod ang ila iloy. Ginpagapos kag ginpahanot sila sang hari sa pagpilit sa ila nga magkaon sang unod sang baboy nga ginadumilian sang Kasugoan. 2Ang isa sa ila, bilang tiglawas, naghambal para sa ila tanan, “Ano bala ang luyag ninyo nga mahibaluan nahanungod sa amon? Handa kami magpanginmatay sang sa maglapas sang mga kasugoan sang amon mga katigulangan.”
3Sa kaakig sang hari, nagmando sia nga kalayuhan ang mga kalaha kag mga kaldero. 4Sa gilayon sang nagabaga na ini nagsugo sia nga ining ila tiglawas utdon ang iya dila, kuhaon ang panit sa iya ulo kag pang-utdon ang iya mga kamot kag iya tiil, samtang nagatulok ang iban niya nga mga utod kag ang iya iloy. 5Sang wala na gid sia sing mahimo, nagmando ang hari nga dal-on sia nga nagaginhawa sa kalayo kag pritohon nga buhi sa kalaha. Sang nagatub-ok ang aso gikan sa kalaha, ang iloy kag ang nabilin nga mga utod nagpaisog sa isa kag isa sa pagpanginmatay nga halangdon. Nagsiling sila, 6“Nagabantay#Deut. 32:36. ang aton Ginoong Dios kag pat-od gid nga maluoy sia sa aton suno sa ambahanon sa diin si Moises nagtindog batok sa mga tawo nga nagasinggit, ‘Pat-od gid nga maluoy sia sa iya mga alagad.’”
7Sang magtaliwan gikan sa sining kalibutan ang nahauna nga utod sa sining paagi, ginsunod sang mga soldado ang ikaduha para sa ila mapintas nga kalingawan. Matapos maupakan ang iya ulo, ginpamangkot sia, “Luyag ka bala magkaon sang karne sang baboy sa wala pa namon ginhatukhatok ang imo kalawasan?”
8Nagsabat sia sa linggwahe sang iya mga katigulangan, “Indi gid!” Gani ginpaantos sia sang mga soldado subong sang nahanuna. 9Sang nagahimumogto na sia nagsinggit sia sa hari, “Malaut nga tawo, bisan imo kami dulaon sining kinabuhi, pero ang Hari sang duta kag langit magabanhaw sa amon sa pagkabuhi nga wala sing katapusan, tungod sa amon pagtuman sang iya mga kasugoan kami handa mapatay.”
10Pagkatapos sa iya, ginwili sang mga soldado ang ila kaugalingon paagi sa ikatlo nga utod. Sang ginsingganan sia nga pagwaon ang iya dila, maabtik nga ginpagwa niya ini kag maisog nga gintan-ay ang iya mga kamot, 11kag dungganon nga nagsiling, “Ang Dios amo ang naghatag sa akon sini. Ginapasulabi ko pa ang iya mga kasugoan sang sa sini nga mga bahin sang lawas, kag ako nagasalig nga mabaton ko liwat ini tanan halin sa iya.” 12Sang pagkabati sini sang hari kag sang iya mga sumolunod, natingala gid sila sa kaisog sang pamatan-on kag sa iya pagkabig sang pag-antos nga daw sa wala lang.
13Sang mapatay na sia, ginpaagi man nila ang ikap-at nga utod sa sining sinapat nga pagpaantos. 14Sang malapit na lang sia mapatay, nagsinggit sia, “Labing maayo ining amon napilian nga mapatay sa kamot sang mga tawo, samtang nagasalig kami sa saad sang Dios nga pagabanhawon niya kami, pero para sa imo, Antioco, wala sing pagkabanhaw, wala sing bag-o nga kabuhi!”
15Madason gindala nila sa atubangan ang ikalima nga utod, kag ginkastigo man sia. 16Pero nagtulok sia sa hari kag nagsiling, “May gahom ka sa mga tawo bisan mamalatyon ikaw, kag mahimo mo ang luyag mo. Pero indi ka magpanghunahuna nga ang amon mga kaliwat ginpatumbayaan sang Dios. 17Hulat lang, kay makita mo gid kon paano pagasilutan sang Dios ikaw kag ang imo mga katawhan paagi sa iya gahom.”
18Pagkatapos, ila ginsunod ang ikan-om nga utod. Ang iya katapusan nga ginsiling amo ini, “Indi na pagbuanga ang imo kaugalingon: amo ini ang amon pag-antos tungod sang amon mga kasaypanan, kay nakasala kami batok sa amon kaugalingon nga Dios, makahaladlok matuod ining natabo. 19Pero indi ka magdumdom nga makaluwas ikaw sa silot tungod sang imo pagpakig-away batok sa Dios.”
20Ang labing dalayawon sa tanan amo ang iloy, kag takos gid pasidunggan ang iya handumanan. Sa sulod sang isa ka adlaw, ang iya pito ka mga anak nagkalamatay sa iya atubang, pero gin-antos niya ini sing may kaisog tungod kay nagsalig sia sa Ginoo. 21Isa ka dungganon nga balatyagon ang nagpuno sang iya tagipusoon kag naghatag sa iya sing kusog subong sang lalaki. Gani ginpaisog niya ang iya mga anak nga nagahambal sa linggwahe sang ila mga katigulangan. Nagsiling sia sa ila, 22“Wala ako makahibalo kon paano kamo nagkabuhi sa akon tagoangkan, indi ako ang naghatag sa inyo sang ginhawa kag sang kabuhi, kag indi man ako ang nagbutang sang mga bahin sang inyo lawas. 23Ang Manunuga sang kalibutan nga ginhalinan sang tawo kag ginsugoran sang tanan nga mga butang, pat-od gid nga magahatag liwat sa inyo sang ginhawa kag sang kabuhi tungod sang iya kaluoy kay inyo ginsikway ang inyo kaugalingon nga kabuhi tungod sang iya mga kasugoan.”
24Si Antioco naghunahuna nga ginayaguta kag ginainsultohan sia tungod sang panghambal sang iloy. Samtang buhi pa ang kamanghuran, si Antioco naghaylo sa iya indi lamang sa mga pulong, kundi sa mga saad nga may panumpa nga kon bayaan lang niya ang mga pagsulondan sang iya mga katigulangan, sia magamanggaranon gid kag magamalipayon, sia mangin-Abyan sang Hari kag magapungko sa mataas nga palangakuan. 25Ang pamatan-on wala magsapak sa iya, gani ginpatawag sang hari ang iloy kag ginsingganan nga laygayan ang iya anak sa pagluwas sang iya kabuhi. 26Sa daku nga pagpamilit sang hari, nagpasugot na lang ang iloy nga laygayan ang iya anak. 27Nagduko sia palapit sa anak kag ginbuang niya ang mapintas nga manugpigos paagi sa paghambal sang ila kaugalingon nga linggwahe sa sini nga mga pulong, “Anak ko, maluoy ka sa akon. Gindala ko ikaw sa akon tiyan sa sulod sang siyam ka bulan kag ginbatiti ko ikaw sa sulod sang tatlo ka tuig. Ginsagod kag ginpadaku ko ikaw tubtob karon kag gin-atipan. 28Nagapangabay ako sa imo, anak ko, magtangla ka sa langit kag magtamod ka sa duta. Tan-awa ang tanan nga mga butang nga yara sa ila kag kilalaha nga ang Dios nagtuga sa ila nga wala sing ginhalinan, kag ang tawo nagakabuhi man sa amo nga paagi. 29Indi ka magkahadlok sa sining manugpatay. Batuna ang kamatayon kag pamatud-i nga subong ikaw ka takos sang imo mga utod, agod nga sa adlaw sang kaluoy sang Dios, batunon ko liwat ikaw upod sa ila.”
30Halos pa lang sia nakatapos hambal sang magsiling ang pamatan-on, “Ano pa ang ginahulat ninyo? Indi ako magtuman sang mando sang hari. Ang akon lang ginatuman amo ang Kasugoan nga ginhatag ni Moises sa amon mga katigulangan. 31Kay ikaw, Haring Antioco, imo ginapahito ang tanan nga sahi sang paghalit para sa mga Hebreo, indi ka gid makapalagyo sa mga kamot sang Dios. 32Nagaantos kami tungod sang amon mga sala, 33kag kon ang buhi nga Ginoo naakig agod silutan kag disiplinahon kami, sa ulihi magapakig-abyan gid sia sa iya mga alagad. 34Pero ikaw, malaut nga tawo, labing kriminal sa tanan nga mga tawo, indi ka magpadaladala sa walay pulos nga pagdayaw kag indi ka magpahambog sa sining imo pagpamatay sang iya mga alagad, 35kay wala pa ikaw makapalagyo sa paghukom sang Makagagahom nga Dios nga nakakita sang tanan. 36Matapos makaantos sining umalagi nga kasakit ang akon mga utod, karon nagainom na sila sang nagapadayon nga kabuhi tungod sang kasugtanan nila sa Dios. Pero ikaw iya, suno sa paghukom sang Dios, pagabayaran nimo sing nagakaigo nga silot ang imo pagkabugalon. 37Subong sang akon mga utod, ginahalad ko ang akon lawas kag kabuhi sa pag-apin sang mga kasugoan sang akon mga katigulangan. Nagapangamuyo ako sa Dios nga iya ipakita ang iya kaalwan sa amon pungsod kag sa indi madugay, paagi sa mga pagtilaw kag sa mga kasakitan maliso ikaw dayon sa pagpahayag nga sia amo lamang ang Dios. 38Tungod sang akon mga kautoran kag sang akon kaugalingon, kabay pa nga mag-untat ang kaakig sang Makagagahom nga Dios, nga nagatupa nga matarong sa amon bug-os nga pungsod.”
39Ang hari naakig gid, kag ginpaantos niya ining isa sing labi pa sang sa iban kay nainit gid sia sang ginyaguta sang pamatan-on. 40Gani, napatay man ining katapusan nga utod nga wala madagtaan kay sia may bug-os nga pagsalig sa Ginoo.
41Ang iloy ginpatay man sa tapos mapatay ang iya mga anak.
42Husto na ini nga sugilanon nahanungod sa pagkaon sang mga halad kag sang sobra nga pagpaantos.
Currently Selected:
2 Macabeo 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012