2 Macabeo 14
14
Naghambal si Alcimo batok kay Judas
(1 Mac. 7:1-21)
1Sang makaligad ang tatlo ka tuig, nahibaluan ni Judas kag sang iya mga tinawo nga si Demetrio nga anak ni Seleuco nagdungka sa pantalan sang Tripoli upod ang isa ka mabakod nga hangaway kag madamo nga mga sakayan. 2Iya man nahibaluan nga ginaagaw niya ang pungsod kag ginpatay si Haring Antioco upod ang iya manunodlo nga si Lysias.
3May isa anay ka Pinakamataas nga Pari nga ginatawag si Alcimo, nga nagpakasala sing hungod sa tion sang pagrebulosyon. Iya nakilala nga bisan diin sia makadto wala sia sing kasigurohan, kag indi man sia makapalapit sa balaan nga altar. 4Sang tuig 151#14:4 TUIG 151: Ini nagasanto sa tuig 161 sa wala pa matawo ang Cristo. nagkadto sia sa kay Haring Demetrio kag ginhatagan niya sia sing bulawan nga korona kag sing isa ka palma, upod ang mga sanga sang olivo nga sa kinaugali ginahalad sa Templo. Sa sadto nga adlaw naghipos lang sila. 5Sang ulihi nakakita sia sing kahigayunan agod mahimo ang iya malaut nga tinutuyo sang ipatawag sia ni Demetrio sa pag-upod sa iya sa pagsinapol kag ginpamangkot sia natungod sang kahimtangan kag tinutuyo sang mga Judio.
Nagsabat si Alcimo, 6“Inang mga Judio, nga ginatawag Hasideanhon kag ginadumalahan ni Judas Macabeo, mga rebelde nga luyag pirme mag-away kag sila amo ang nagaupang sang katawhayan kag kauswagan sang ginharian. 7Tungod sina matapos ako makuhaan sang pinanubli ko nga kadungganan subong nga Pinakamataas nga Pari, nagkadto ako diri karon 8nahauna, tungod sang himpit nga pagkabalaka sa naluyagan sang hari kag ikaduha, sa pagpanumdom sang kaayuhan sang akon mga kasimanwa, nga tungod sa walay patugsiling nga ginhimo sadtong mga tawo nga akon ginsambit nagdala sang daku nga kahuloy-anan sa amon bug-os nga mga kaliwatan. 9Matapos nga mausisa sang imo kamahalan ini nga mga butang, kabay pa nga imo maluyagan ang paghimo sang kinahanglanon nga mando para sa kaayuhan sang amon pungsod kag sang ginpigos nga mga pumoluyo suno sa kaalwan nga imo ginahatag sa tanan. 10Kay samtang buhi pa ini si Judas, ang pungsod indi gid makaagom sing kalinong.”
Ginpadala ni Demetrio si Nicanor sa Pagsalakay kay Judas
11Matapos makahambal si Alcimo, ang iban nga Mga Abyan sang Hari nga naakig kay Judas naghimulos sini nga kahigayunan sa pagdabok sang kaakig ni Demetrio batok sa iya. 12Gani iya dayon ginpili si Nicanor nga sadtong una pangulo sang iya hangaway nga may mga elepante kag ginpasaka sia subong gobernador militar sang Judea kag ginpadala sia kag ginmanduan 13nga patyon si Judas kag palaptahon ang iya mga tinawo, kag subong man sa pagbalik kay Alcimo subong Pinakamataas nga Pari sang pinakadungganon nga Templo. 14Ang mga pagano sa Judea nga sadtong una nagpalagyo kay Judas karon nag-upod kay Nicanor, kag nagadumdom nga ang malain nga madangatan kag palaligban sang mga Judio manginpara sa ila kaayuhan.
15Sang#1 Mac. 7:27-28. pagkabati sang mga Judio nga nagapadulong si Nicanor kag ang mga pagano handa na sa pagsalakay, ginsabwagan nila ang ila mga ulo sing yab-ok kag nagpangamuyo sa Dios nga amo ang nagpalig-on sang iya mga tawo sa walay katubtoban kag wala gid sia mapaslawi sa pagbulig sa iya mga pinili paagi sa iya pag-apin. 16Sa pagmando ni Judas nga ila pangulo, naggwa sila gilayon sa pagsugata sa mga kaaway sa barangay sang Desau. 17Si Simon nga utod ni Judas nagpakig-away kay Nicanor, pero tungod sa wala ginpaabot nga pag-abot sang mga kaaway, nalutos sila sing amat-amat. 18Pero si Nicanor nakabati sang kaisog ni Judas kag sang iya mga tinawo, kag sang ila kaisog sa pag-away para sa ila pungsod. Indi na sia luyag sa pag-ula sang dugo sa pagpamatuod sini. 19Gani iya ginpadala si Posidonio, si Teodoto kag si Matatias sa pagpakig-abyan kag pagpakighisugot sa mga Judio.
20Matapos nila mausisa sing maayo ang mga bagay nga dapat kasugtan, ginpahibalo ini sang pangulo sa iya mga hangaway, kag tungod kay maathag nga isa ang ila pagpainuino, nagkasugot sila. 21Ginpat-od ang adlaw sa diin ang mga pangulo magsapol nga silahanon lang sa lugar nga wala ginaawayi. Ang tagsa ka hangaway nagdala sang ila karwahi kag sang mga pulongkuan. 22Si Judas nagbutang sing armado nga mga bantay sa maayo nga mga lugar sa paghanda, basi magluib ang mga kaaway. Nagsapol ang mga pangulo kag sila nagkasugot. 23Si Nicanor nag-estar sa Jerusalem kag wala gid sia maghimo sing malain. Iya ginpapauli ang mga tawo nga nag-upod sa iya. 24Pirme niya kaupod si Judas kag sila nanginmahirop nga mag-abyan. 25Sia pa gani ang nagsiling kay Judas nga mangasawa kag magpamata. Si Judas nagpangasawa kag nagpangabuhi sing malinong.
Naguba ang Pag-abyanay ni Judas kag ni Nicanor
26Sang pagkahibalo ni Alcimo nga nagmahirop nga mag-abyan ining duha ka tawo, nagkadto sia kay Demetrio nga may dala nga kopya sang ila ginpirmahan nga kasugtanan. Nagsiling sia nga si Nicanor may malain nga tuyo batok sa gubyerno, kag nagaplano nga si Judas nga isa ka kaaway sang ginharian himuon nga isa sang Mga Abyan sang Hari. 27Ang hari nagbalingaso sa kaakig. Tungod kay ginsutsot sia sining traidor, nagsulat sia kay Nicanor, nga nagsiling sang iya daku nga kaakig tungod sang kasugtanan kag ginamanduan niya sia sa pagdakop kay Judas Macabeo kag ipadala sia sa Antioquia sa gilayon.
28Natublag gid si Nicanor sang pagkabaton niya sang sulat, kay indi magtugot sa iya painuino nga gub-on ang iya kasugtanan sa isa ka tawo nga wala sing may ginhimo nga malain. 29Pero indi sia makapamatok sa mando sang hari, gani naghulat sia sang nagakaigo nga kahigayunan sa pagtuman sang mando sang hari nga amo ang pagdakop kay Judas. 30Namutikan ni Macabeo nga nagmasingki si Nicanor kag nagmalain ang tenor sang iya pagpakigsugilanon sa iya. Nagpamat-od sia nga ining iya kabangis may malain nga tinutuyo. Gani gintipon niya ang kadamuan sang iya mga tinawo kag nagpalayo kay Nicanor.
31Sang#1 Mac. 7:29-30. pagkatalupangod ni Nicanor nga gindaog sia ni Judas sa padugi, nagkadto sia sa dungganon kag balaan nga Templo sa tion nga ang mga pari nagadulot sang kinaandan nga mga halad, kag ginmanduan niya sila nga itugyan si Judas sa iya. 32Sang nagpanumpa sila nga wala sila makahibalo kon diin ang tawo nga iya ginapangita, 33gintudlo ni Nicanor ang iya tuo nga kamot sa Templo kag nagpanumpa: “Kon indi ninyo pag-itugyan sa akon si Judas bilang binilanggo, pagasunogon ko ining Templo sang Dios, gub-on ko ang altar, kag sa sini man nga lugar magapatindog ako sing matahom nga templo para kay Dionisio.” 34Pagkatapos niya hambal sini, naglakat sia. Ang mga pari nagbayaw sang ila mga kamot sa langit, kag nagpanawag sa Dios nga sa tanan nga tion nag-away para sa aton pungsod. Amo ini ang ila pangamuyo: 35“O Ginoo, ikaw nga wala gid sing may ginakinahanglan, imo nahamut-an nga sa tunga namon may isa ka Templo nga imo pagaestaran. 36Gani karon, O Balaan nga Ginoo sang tanan nga pagkabalaan, apini sa walay katubtoban sa tanan nga pagpasipala ining balay nga bag-o lang matinluan.”
Ang Pagkapatay ni Razis Para sa iya Pungsod
37Karon, may isa ka tawo nga ginatawag Razis, isa sang mga katigulangan sang Jerusalem, nga ginpakalain kay Nicanor. Ginahigugma sia sang iya mga kasimanwa kag ginahangad nila sia, kag ginatawag sia nga amay sang mga Judio tungod sang iya kaayo. 38Sang una nga mga inadlaw sang rebulosyon ginpakamalaut sia tungod sining iya pagsunod sa pagtuluohan sang Judaismo, kag iya ginrisgo ang iya kabuhi nga may kaisog tungod sini. 39Sa pagpakita ni Nicanor sang iya kaakig sa mga Judio, nagpadala sia sing sobra 500 ka mga soldado sa pagdakop kay Razis. 40Nagadumdom sia nga kon mapatay ini nga tawo mahalitan niya sila sing daku. 41Sang madali na lang maagaw sang mga hangaway ang tore diin si Razis nagpanago, kay ila ginabungkal ang pwerta sang pasiyuhan kag nagasinggit sila nga tutdan ang pwertahan. Nabatyagan ni Razis nga nalibutan na sia. Gani ginhap-an niya ang iya espada, 42nga nagahunahuna nga mas dungganon na lang ang mapatay sang sa mahulog sa mga kamot sining mga malaut kag mag-antos sang kahuy-anan nga indi takos sang iya dungganon nga pagkatawo.
43Pero sang malapuyot na ang pag-ilinaway wala niya maigo ang iya kaugalingon kag samtang nagadinaguso ang mga soldado sa alagyan dalidali sia nga nagsaka sa pader, kag maisog nga naglumpat sa mga hangaway. 44Pero nakaisol sila sing hinali, gani nahulog sia sa wala sing tawo. 45Samtang nagaginhawa sia kag nagabalingaso sa kaakig, nagtinguha sia sa pagbangon. Ang iya dugo nagaagay lang bisan diin kag bisan malubha ang iya mga pilas nagdalagan sia sa tunga sang kadam-an. Dayon nagtindog sia sa isa ka mataas nga bato. 46Bisan madamo na nga dugo ang iya nausik, ginrabrab niya ang iya mga tinai, ginkuha sang iya duha ka kamot kag ginhaboy sa mga hangaway, samtang nagapanawag sia sa Ginoo sang iya kabuhi kag espiritu nga ibalik ini sa iya sa pila ka adlaw. Amo ini ang iya pagkapatay.
Currently Selected:
2 Macabeo 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012