2 Macabeo 13
13
Ginpatay si Menelao
1Sang tuig 149#13:1 TUIG 149: Ini nagasanto sa tuig 163 sa wala pa matawo ang Cristo. nasapwan ni Judas kag sang iya mga tinawo nga si Antioco Eupator nagapadulong sa pagsalakay sang Judea upod ang iya madamo nga mga hangaway. 2Upod niya si Lysias nga iya manunodlo kag tulogyanan sang pagdumalahan. Dugang pa sini may upod sia halin sa Gresia nga 110,000 ka mga soldado nga nagalakat, 5,300 ka mga soldado nga nagasakay sa kabayo, baynte dos ka mga elepante kag 300 ka mga karwahi nga nasangkapan sang mga hagbas.
3Si Menelao nagdampig sa ila. Puno sia sing paglimbong kag iya ginpaisog si Antioco indi para sa kaayuhan sang iya pungsod kundi sa paglaom nga palig-unon sia sa iya palangakuan subong Pinakamataas nga Pari. 4Pero ang Dios, ang Hari sang mga hari nagpukaw sang kaakig ni Antioco batok sa sining malaut nga tawo. Sang ipaathag ni Lysias sa hari nga si Menelao amo ang kabangdanan sang tanan nga gamo, nagmando ang hari nga dal-on si Menelao sa Berea kag didto ipapatay suno sa paagi sang pagpatay didto. 5Sa sadto nga lugar may isa ka tore nga setentay singko ka tapak ang kataason, napuno ini sing abo, may nagalibot nga tarog pakadto sa mga abo. 6Kon may isa nga nahukman sa pagpangawat sang balaan nga mga butang ukon nahibaluan sang tanan nga may nahimo nga krimen, ginadala nila sia sa ibabaw kag itagbong paidalom agod mapatay. 7Ang malinapason sa kasugoan ginapatay sa sini nga paagi. Si Menelao wala mahatagan sing nagakaigo nga paglubong. 8Takos gid man sia mapatay sa sina nga paagi. Tungod kay nakahimo sia sing madamo nga mga kalautan batok sa altar nga ang iya kalayo kag abo balaan, sa abo man sia namatay.
Ang Inaway malapit sa Siudad sang Modein
9Si Haring Antioco nagpadayon sa pagpalapit, ang iya hunahuna puno sing mabangis nga mga plano sa pagpatilaw sa mga Judio sang pinakamapait nga mga butang nga wala pa nila maagihan sa idalom sang iya amay. 10Sang pagkabati ni Judas sini, ginmanduan niya ang mga tawo sa pagpangamuyo sa Ginoo sa adlaw kag sa gab-i, labi na gid karon, bisan sa sini na lang agod mabuligan ang mga Judio nga may katalagman nga madula ang ila Kasugoan, ang pungsod kag ang balaan nga Templo, 11kag indi pag-itugot nga ang mga tawo, nga bag-o lang nakaguloginhawa, mahulog sa gahom sang mga pagano nga nagapasipala sa Dios. 12Matapos sila magtingob sa pagsunod sa iya gintudlo kag sa pagpangamuyo sa maluloy-on nga Ginoo paagi sa paghinibi, sa pagpuasa kag sa paghapa sa sulod sang tatlo ka adlaw, ginpaisog sila ni Judas kag ginhambalan nga maghanda sila sa pag-away.
13Matapos si Judas makapakighinun-anon sa mga katigulangan nga silahanon lang, nagpamat-od sia nga indi na niya paghulaton ang mga hangaway sang hari sa pagsalakay sa Judea kag sa pag-agaw sang siudad, kundi maggwa sia kag tan-awon kon ano ang matabo sa bulig sang Dios. 14Sing may daku nga pagsalig sa Manunuga sang kalibutan, ginsingganan niya ang iya mga soldado sa pag-away sing maisog tubtob sa kamatayon tungod sa pag-apin sang mga kasugoan, sang Templo, sang siudad, sang ila pungsod kag sang mga pamaagi sang ila pagkabuhi. Ginpadulog niya ang iya mga hangaway malapit sa Modein. 15Ginbilin niya sa iya mga tinawo ang tinaga, “Kadalag-an gikan sa Dios” bilang ila senyas sa inaway, kag ginsalakay sa kagab-ihon ang tolda sang hari upod ang pinili nga maisog nga mga pamatan-on nga soldado. Sa sulod sang kampo ginpamatay niya ang mga 2,000 kag ang iya mga tinawo nagpamatay sang mga elepante nga nagapanguna upod ang mga nagadala sini. 16Naghalin sila sa kampo nga madinalag-on kag ini nga kampo napun-an sing kahadlok kag pagsalangisag. 17Nagapamanagbanag na sang matapos ini tanan paagi sa pag-apin kag pagbantay sang Ginoo kay Judas.
Ang Kasugtanan ni Antioco V kag sang mga Judio
(1 Mac. 6:48-63)
18Matapos matilawan sang hari ang kaisog sang mga Judio, gintinguhaan niya ang pagsalakay sa maalamon nga paagi. 19Ginsalakay niya ang Betzur, isa ka mabaskog nga pamakod sang mga Judio, pero ginpaisol sila, ginbalusan kag nalutos sila. 20Ginpadala ni Judas ang tanan nga kinahanglanon sang mga hangaway. 21Pero si Rodoko, isa sang mga hangaway sang mga Judio, nagpanugid sa mga kaaway sining sekrito. Pero nakilal-an sia, gindakop kag ginhatagan sing nagakaigo nga silot. 22Ang hari nagpakighisugot sa ikaduha nga tion sa mga pumoluyo sang Betzur, kag sang nahimo ini, naglakat sia. Dayon ginsalakay niya si Judas kag ang iya mga tinawo, pero sa liwat nalutos sia. 23Sa pihak nga bahin, ginsugiran sia nga si Felipe nga iya ginbilinan sang pagdumalahan didto sa Antioquia, nagrebelde. Natublag gid sia gani nagpakighusay sia sa mga Judio, nagpaubos sia kag nagsaad sa pagsunod sang ila mga ginkasugtanan. Nagkasugot sila, nagdulot sia sang halad, nagpasidungog sang Templo, kag naghatag sang madamo nga mga dulot para sa Templo. 24Ginbaton niya sing maayo si Judas Macabeo kag ginbutang niya si Hegemonides subong gobernador militar sang kadutaan halin sa siudad sang Tolomaida tubtob sa siudad sang Gerar. 25Dayon nagkadto sia sa Tolemaida. Ang mga pumoluyo sini nga lugar indi magpasugot sang kasugtanan, ginpautwas nila ang ila kaakig kag indi luyag nga padayunon ang kasugtanan. 26Si Lysias nagsaka sa plataporma kag gin-apinan sing husto ang mga ginkasugtan. Sa tapos niya mahaylo ang mga tawo kag mapalinong sila, dayon nagkadto sia sa Antioquia.
Sa sini nga paagi ang pagsalakay ni Haring Antioco nangin-isa ka pag-isol.
Currently Selected:
2 Macabeo 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012