2 Mga Hari 25
25
Ang Pagkapukan sang Jerusalem
(2 Cron. 36:13-21; Jer. 52:3b-11)
1Nagrebelde#Jer. 21:1-10; 34:1-5; Ezeq. 24:2. si Sedequias kay Haring Nabucodonosor sang Babilonia. Gani si Nabucodonosor nag-abot upod sang iya tanan nga mga hangaway kag ginsalakay ang Jerusalem sa ika-10 nga adlaw sang ika-10 nga bulan sang ikasiyam nga tuig sang paggahom ni Sedequias. Nagpatindog sila sing kampo sa gwa sang siudad, naghimo sang trinsera sa palibot sini, 2kag nagpadayon sa pagkibon sini tubtob sa ika-11 nga tuig sang paggahom ni Sedequias. 3Sa ikasiyam nga adlaw sang ikaapat nga bulan sa amo nga tuig, sang tama gid ang tiggulotom kag ang mga tawo wala na sing kalan-on, 4ang#Ezeq. 33:21. mga pader sang siudad ginguhaban, kag bisan ang mga taga-Babilonia nagkibon sang siudad, ang tanan nga mga soldado nakapalagyo sang gab-i. Nagpalagyo sila paagi sa hardin sang hari, nag-agi sa pwertahan nga nagaangot sang duha ka mga pader, kag nakapalagyo pakadto sa Kapatagan sang Jordan. 5Pero ang hangaway sang Babilonia naglagas kay Haring Sedequias kag nadakpan sia sa kapatagan malapit sa Jerico, kag ang tanan niya nga mga hangaway nagbiya sa iya. 6Gindala si Sedequias kay Haring Nabucodonosor, nga didto sa siudad sang Ribla, kag didto ginhukman sia ni Nabucodonosor. 7Sa#Ezeq. 12:13. atubang ni Sedequias ginapamatay ang iya mga anak nga lalaki, dayon ginpalukat ni Nabucodonosor ang iya mga mata, ginkadenahan kag gindala sia sa Babilonia.
Ang Pagguba sang Templo
(Jer. 52:12-33)
8Sa ikapito nga adlaw sang ikalima nga bulan sang ika-19 nga tuig sang paggahom ni Haring Nabucodonosor sang Babilonia, si Nebusaradan, ang palamangkutan sang hari kag pangulo sang iya hangaway, nagsulod sa Jerusalem. 9Ginsunog#1 Hari 9:8. niya ang Templo, ang palasyo, kag ang mga balay sang tanan nga gamhanan nga mga tawo sang Jerusalem, 10kag ang iya mga hangaway nagguba sang mga pader sang siudad. 11Dayon gindala ni Nebusaradan sa Babilonia ang mga tawo nga nabilin sa siudad, ang nabilin nga sampaton nga mga manug-obra kag yadtong mga nagtipyuk sa mga taga-Babilonia. 12Pero ginbilin niya sa Juda ang iban sang imol nga mga tawo, nga wala sing mga pagkabutang, kag ginpaobra sila sa mga talamnan sang ubas kag mga uma.
13Ang#1 Hari 7:15-26; 2 Cron. 3:15-17; 1 Hari 7:23-26; 2 Cron. 4:2-5. mga taga-Babilonia nagdugmok sang mga haligi nga bronsi kag sang mga tulongtungan nga yadto didto sa Templo, lakip ang daku nga tangke nga bronsi kag gindala ang tanan nga bronsi sa Babilonia. 14Gindala#1 Hari 7:45; 2 Cron. 4:16. man nila ang mga pala kag mga bulotangan sing abo nga ginagamit sa pagtinlo sang altar, ang mga gamit sa pagtinlo sang mga suga, ang mga yahong nga ginasalod sa dugo sang mga halad, ang mga yahong nga ginagamit sa pagsunog sing insyenso, kag ang tanan nga galamiton nga bronsi nga ginagamit sa pag-alagad sa Templo. 15Gindala nila ang tanan nga nahimo sa bulawan ukon pilak, lakip ang magamay nga mga yahong kag ang mga balagahan nga ginagamit sa pagdala sang baga. 16Ang mga gamit nga bronsi nga ginpahimo ni Haring Solomon para sa Templo—ang duha ka mga haligi, ang mga tulongtungan, kag ang daku nga tangke—tama ka bug-at kag indi matimbang. 17Ang duha ka mga haligi pareho: ang kada-isa may baynte siete ka tapak ang kataason, nga may uloulo nga bronsi sa ibabaw, apat kag tunga ka tapak ang kataason. Sa bug-os nga palibot sang uloulo may bronsi nga pinuna nga napunihan sang mga granada nga nahimo sa bronsi.
Ang mga Tawo sang Juda Gindala sa Babilonia
(Jer. 52:24-27)
18Wala labot sini, si Nebusaradan nga pangulo sang hangaway, nagdala subong mga bihag kay Seraya nga Pinakamataas nga Pari, kay Sofonias nga dason sa iya, kag ang tatlo pa gid ka kinilala nga mga opisyales sang Templo. 19Gikan sa siudad, gindala niya ang tawo nga pangulo anay sang mga hangaway, ang lima ka manuglaygay sang hari nga yara pa sa siudad, kag ang kabulig nga pangulo, nga amo ang gintugyanan sang mga lista sang mga hangaway, kag ang sesenta pa gid ka kinilala nga mga tawo. 20Gindala sila ni Nebusaradan sa hari sang Babilonia, nga yadto sa siudad sang Ribla 21sa kadutaan sang Hamat. Didto ginpabakol kag ginpapatay sila sang hari.
Gani, ang mga tawo sang Juda gindala halin sa ila duta pakadto sa duta sang Babilonia agod manginbihag.
Si Gedalias ang Gobernador sang Juda
(Jer. 40:7-9; 41:1-3)
22Si#Jer. 40:7-9. Haring Nabucodonosor sang Babilonia naghimo kay Gedalias nga anak ni Ahikam kag apo ni Safan, nga gobernador sang duta sang Juda, kag gintugyanan sia sang tanan nga wala madala sa Babilonia. 23Sang pagkabati sini sang mga opisyales kag mga hangaway nga taga-Juda nga wala mag-ampo, nagbuylog sila kay Gedalias sa Mispa. Ini nga mga opisyales amo si Ismael nga anak ni Netanias, si Johanan nga anak ni Karea, si Seraya nga anak ni Tanhumet gikan sa banwa sang Netofa, kag si Jozanias nga Maacatnon. 24Si Gedalias nagsiling sa ila, “Ginasingganan ko kamo nga indi kamo magkahadlok sa mga opisyales nga taga-Babilonia. Mag-estar kamo sa sini nga duta, alagara ninyo ang hari sang Babilonia, kag ang tanan manginmaayo para sa inyo.”
25Pero#Jer. 41:1-3. sang ikapito nga bulan sadto nga tuig, si Ismael, ang anak ni Netanias kag apo ni Elisama, isa ka katapo sang panimalay sang hari, nagkadto sa Mispa upod ang napulo ka lalaki, nagsalakay kay Gedalias kag ginpatay sia. Ginpamatay man niya ang mga Israelinhon kag ang mga taga-Babilonia nga upod sa iya didto. 26Dayon#Jer. 43:5-7. ang tanan nga mga Israelinhon, manggaranon kag imol, upod sa mga opisyales sang hangaway naglakat pakadto sa Ehipto tungod kay nahadlok sila sa mga taga-Babilonia.
Si Joaquin Ginbuy-an gikan sa Bilangguan
(Jer. 52:31-34)
27Sang tuig nga si Evilmerodac nanginhari sang Babilonia, nagkaluoy sia kay Haring Joaquin sang Juda kag ginpagwa sia sa bilangguan. Natabo ini sang ika-27 nga adlaw sang ika-12 nga bulan sang ika-37 nga tuig sa tapos nga si Joaquin gindala subong bihag. 28Gintatap sia sing maayo ni Evilmerodac, kag ginhatagan sing palangakuan nga may daku nga kadungganan sang sa iban nga mga hari nga gindala upod sa iya sa Babilonia. 29Gani si Joaquin gintugotan sa pag-ilis sang iya bayu sa pagkabinilanggo kag nagkaon sia upod sa hari sa bug-os niya nga kabuhi. 30Kada adlaw, tubtob nga sia buhi, ginhatagan sia sing galastuhon para sa iya mga kinahanglanon.
Currently Selected:
2 Mga Hari 25: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
