1 Mga Cronica 1
1
Halin kay Adan tubtob kay Abraham
(Gen. 5:1-32; 10:1-32; 11:10-26)
1Si Adan amay ni Set, si Set amay ni Enos, si Enos amay ni Kenan, 2si Kenan amay ni Mahalalel, si Mahalalel amay ni Jared. 3Si Jared amay ni Enoc, si Enoc amay ni Metusela; si Metusela amay ni Lamec, kag 4si Lamec amay ni Noe. Si Noe may tatlo ka mga anak nga amo sanday Sem, Ham, kag Jafet.
5Ang mga anak ni Jafet amo sanday Gomer, Magog, Madai, Javan, Tubal, Mesec, kag Tiras. Ini sila amo ang mga katigulangan sang mga tawo nga nagadala sang ila mga ngalan. 6Ang mga kaliwat ni Gomer amo ang mga tawo sang Askenaz, Rifat, kag Togarma. 7Ang mga kaliwat ni Javan amo ang mga tawo sang Elisa, Tarsis, Cipre, kag Roda.
8Ang mga anak ni Ham amo sanday Cus, Ehipto, Libya, kag Canaan. Ini sila amo ang mga katigulangan sang mga tawo nga nagadala sang ila mga ngalan. 9Ang mga kaliwat ni Cus amo ang mga tawo sang Seba, Havila, Sabta, Raama, kag Sabteca. Ang mga kaliwat ni Raama amo ang mga tawo sang Seba kag Dedan. 10Si Cus may anak nga si Nimrod, nga amo ang nahauna nga gamhanan nga mandadaog sa bug-os nga kalibutan. 11Ang mga kaliwat ni Ehipto amo ang mga tawo sang Lydia, Anam, Lehab, Naftu, 12Patru, Caslu, kag Creta nga amo ang ginhalinan sang mga Filistinhon. 13Ang mga anak ni Canaan amo si Sidon, ang kamagulangan, kag si Het. Ini sila amo ang mga katigulangan sang mga tawo nga nagadala sang ila mga ngalan. 14Si Canaan amo man ang ginhalinan sang mga Jebusnon, mga Amornon, mga Gergasnon, 15mga Hevhanon, mga Arquinhon, mga Sinhanon, 16mga Arvadnon, mga Zemarnon, kag mga Hamatnon.
17Ang mga anak ni Sem amo sanday Elam, Asur, Arfaxad, Lud, Aram, Uz, Hul, Geter, kag Mesec. Ini sila amo ang mga katigulangan sang mga tawo nga nagadala sang ila mga ngalan. 18Si Arfaxad amay ni Sela, kag si Sela amay ni Eber. 19Si Eber may duha ka mga anak. Ang isa ginhingalanan kay Peleg,#1:19 PELEG: Ini nga ngalan pareho sang Hebreo nga pulong nga kon sayuron “pagbinahinbahin”. tungod kay sadto nga tion ang mga tawo sa kalibutan nabahinbahin, kag ang isa ginhingalanan kay Joctan. 20Ang mga kaliwat ni Joctan amo ang mga tawo sang Almodad, Selef, Hazarmavet, Jera, 21Hadoram, Uzal, Dicla, 22Ebal, Abimael, Seba, 23Ofir, Havila kag Jobab.
24Ang kaliwatan halin sa kay Sem tubtob sa kay Abram amo ang masunod: Sem, Arfaxad, Sela, 25Eber, Peleg, Reu, 26Serug, Nahor, Tera, 27kag Abram nga ginkilala man nga si Abraham.
Ang mga Kaliwat ni Ismael
(Gen. 25:12-16)
28Si Abraham may duha ka mga anak, si Isaac kag si Ismael. 29Ang mga anak ni Ismael nanginpangulo sang dose ka tribo. Ini sila amo sanday Nabayot halin sa ngalan sang kamagulangan nga anak ni Ismael, Kedar, Adbeel, Mibsam, 30Misma, Duma, Masa, Hadad, Tema, 31Jetur, Nafis, kag Kedema.
32Si Abraham may babayi nga ang iya ngalan si Ketura, nga nagbata sa kay Abraham sing anom ka mga anak nga amo sanday Zimram, Jocsan, Medan, Midian, Isbac, kag Sua. Si Jocsan may duha ka anak nga amo sanday Seba kag Dedan. 33Si Midian may lima ka mga anak nga amo sanday Efa, Efer, Hanoc, Abida, kag Eldaa.
Ang mga Kaliwat ni Esau
(Gen. 36:1-19)
34Ang anak ni Abraham nga si Isaac may duha ka mga anak, si Esau kag si Jacob. 35Ang mga anak ni Esau amo sanday Elifaz, Reuel, Jeus, Jalam, kag Core. 36Si Elifaz amo ang ginhalinan sang masunod nga mga tribo: Teman, Omar, Sefi, Gatam, Kenaz, Timna, kag Amalek. 37Kag si Reuel amo ang ginhalinan sining masunod nga mga tribo: Nahat, Zera, Sama, kag Miza.
Ang Nahauna nga mga Pumoluyo sang Edom
(Gen. 36:20-30)
38-42Ang nahauna nga mga pumoluyo sang Edom amo ang mga kaliwat sang mga anak ni Seir nga amo ang masunod:
Si Lotan amo ang ginhalinan sang mga kabarangayan ni Hori kag ni Homan. Si Lotan may isa ka utod nga babayi nga si Timna.
Si Sobal amo ang ginhalinan sang mga kabarangayan nanday Alyan, Manahat, Ebal, Sefi, kag Onam.
Si Zibeon may duha ka mga anak, si Aya kag si Ana. Si Ana amo ang amay ni Dison, kag si Dison amo ang ginhalinan sang mga kabarangayan nanday Hamram, Esban, Itran, kag Keran.
Si Ezer amo ang ginhalinan sang mga kabarangayan nanday Bilhan, Zaavan, kag Jaakan.
Si Disan amo ang ginhalinan sang mga kabarangayan nanday Uz kag Aran.
Ang mga Hari sang Edom
(Gen. 36:31-43)
43-50Ang masunod nga mga hari naggahom sa duta sang Edom sing pasunod, sang panahon nga wala pa sing mga hari sa Israel:
Si Bela nga anak ni Beor, nga taga-Dinhaba
Si Jobab nga anak ni Zera, nga taga-Bozra
Si Husam nga nagikan sa sakop sang Teman
Si Hadad nga anak ni Bedad nga taga-Avit; sia amo ang naglutos sang mga Midianhon sa isa ka inaway sa duta sang Moab
Si Samla nga taga-Masreka
Si Shaul nga taga-Rehobot sa Suba
Si Baal-hanan nga anak ni Acbor
Si Hadad nga taga-Pai; ang iya asawa amo si Mehetabel, anak ni Matred kag apo ni Mezahab.
51Sang mapatay si Hadad, ang Edom gingamhan sang masunod nga mga pangulo nga amo sanday Timna, Alva, Jetet, 52Oholibama, Ela, Pinon, 53Kenaz, Teman, Mibzar, 54Magdiel, kag Iram.
Currently Selected:
1 Mga Cronica 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
