2 Mga Hari 23

Gindula ni Josias ang Pagsimba sa mga Diosdios

(2 Cron. 34:3-7, 29-33)

1Ginpatawag ni Haring Josias ang tanan nga mga pangulo sang Juda kag Jerusalem, 2kag nagsulod sila sa Templo sing tingob, upod ang mga pari kag mga propeta kag ang tanan nga nabilin nga mga pumoluyo sang Jerusalem, manggaranon kag imol. Sa atubang nila tanan, ginbasa sang hari sing mabaskog ang bug-os nga Libro sang Kasugtanan nga nasapwan sa Templo. 3Nagtindog sia sa tupad sang haligi kag naghimo sing kasugtanan sa Ginoo sa pagtuman sa iya, kag sa paghimo sang iya mga kasugoan kag mga sugo sa bug-os niya nga tagipusoon kag kalag, kag himuon niya ang ginasiling sang kasugtanan, suno sa nasulat sa libro. Kag ang tanan nga mga tawo nagsaad sa pagtuman sang kasugtanan.

4Dayon#2 Hari 21:3; 2 Cron. 33:3. si Josias nagmando kay Helkias nga Pinakamataas nga Pari, sa iya kabulig nga mga pari, kag sa mga gwardya nga nagabantay sa pwerta sang Templo sa pagpagwa sa Templo sang tanan nga mga butang nga ginagamit sa pagsimba kay Baal, sa diosa nga si Asera, kag sa mga bituon. Ang hari nagsunog sini tanan nga mga butang sa gwa sang siudad malapit sa Kapatagan sang Kidron, kag dayon gindala ang mga abo sini sa Betel. 5Ginpahalin niya sa palangakuan ang mga pari nga gintugyanan sang mga hari sang Juda sa pagdulot sang mga halad#23:5 Ang iban nga dumaan nga mga pagbadbadsa pagdulot sang mga halad; sa Hebreokag nagdulot sia sing mga halad. sa altar sang mga diosdios sa mga siudad sang Juda kag sa mga lugar malapit sa Jerusalem—ang tanan nga mga pari nga nagdulot sang mga halad kay Baal, sa adlaw, sa bulan, sa mga planeta, kag sa mga bituon. 6Ginkuha niya halin sa Templo ang simbulo sang diosa nga si Asera, gindala niya ini sa gwa sang siudad pakadto sa Kapatagan sang Kidron, ginsunog ini, ginbayo nga manginyab-ok, kag ginsabwag ini sa lulobngan sang mga pumoluyo. 7Ginguba niya ang mga balay sa Templo sang mga babayi kag mga lalaki nga nagabaligya sang ila dungog.#23:7 MGA BABAYI KAG MGA LALAKI NGA NAGABALIGYA SANG ILA DUNGOG: Ini nga mga lalaki kag mga babayi nagahimo sang pagbaligya sang ila dungog sa ila pagsimba sa mga dios nga nagapabugana. Didto ang mga babayi nagahabol sang mga bayu nga ginagamit sa pagsimba kay Asera. 8Gindala niya sa Jerusalem ang mga pari halin sa mga siudad sang Juda, kag sa bug-os nga pungsod gindagtaan niya ang mga altar sa diin ginadulot nila ang mga halad. Ginguba man niya ang mga altar nga ginhalad sa mga demonyo nga kanding malapit sa pwerta nga ginpatindog ni Josue, ang gobernador sang siudad, nga yara sa wala sang mayor nga pwerta kon ang tawo nagapasulod sa siudad. 9Ini nga mga pari indi pagtugotan sa pag-alagad sa Templo, pero makakaon sila sang tinapay nga wala sing lebadora nga ginhatag sa ila kapareho nga mga pari.

10Gindagtaan#Jer. 7:31; 19:1-6; 32:35; Lev. 18:21. man ni Haring Josias ang Topet, ang lugar sa diin ginasimba ang mga diosdios sa Kapatagan sang Hinom, agod nga wala sing isa nga makahalad sang iya anak nga lalaki ukon babayi subong dulot nga sinunog sa dios nga si Moloc. 11Ginpanguha man niya ang mga kabayo nga ginhalad sang mga hari sang Juda para simbahon ang adlaw, kag ginsunog ang mga karwahi nga gingamit sa sini nga pagsimba. Ini sila ginatago sa pasiyuhan sang templo, malapit sa pwerta kag indi malayo sa ginaestaran ni Natan-melec nga isa ka mataas nga opisyal. 12Ginguba#2 Hari 21:5; 2 Cron. 33:5. man ni Haring Josias ang mga altar nga ginpatindog sang mga hari sang Juda sa atop sang palasyo, sa ibabaw sang ginaestaran ni Haring Acaz, lakip ang mga altar nga ginpatindog ni Haring Manases sa duha ka mga pasiyuhan sang Templo. Gindugmok niya kag ginpudpod ang mga altar kag ginsabwag ini sa Kapatagan sang Kidron. 13Gindagtaan#1 Hari 11:7. ni Josias ang mga altar nga ginpatindog ni Haring Solomon sa nasidlangan sang Jerusalem, sa nabagatnan sang Bukid sang mga Olivo#23:13 BUKID SANG MGA OLIVO: Ang Hebreo diri nagapatungod sini sa “Bukid sang Kalaglagan” ukon “Bukid sang Sala”. para simbahon ang makangilil-ad nga mga diosdios nga amo sanday Astarot, nga diosa sang Sidon, si Kemos nga dios sang Moab, kag si Moloc nga dios sang Amon. 14Ginpangguba ni Haring Josias ang mga haligi nga bato, ginpapulod niya ang mga simbulo sang diosa nga si Asera, kag ang duta sa diin nagatindog ini gintabunan niya sang mga tul-an sang tawo.

15Ginguba#1 Hari 12:33. man ni Josias ang lugar nga ginasimbahan sa Betel, nga ginpatindog ni Haring Jeroboam nga anak ni Nebat, nga nagdala sa Israel sa pagpakasala. Ginrumpag niya ang mga altar, ginpamuka ang mga bato,#23:15 Ang isa ka dumaan nga pagbadbadginpamuka ang mga bato; sa Hebreoginsunog ang altar. kag gindugmok nga manginyab-ok. Ginsunog man niya ang imahen ni Asera. 16Dayon#1 Hari 13:2. si Josias nagtulok sa palibot kag nakita niya ang iban nga mga lulobngan didto sa bakulod; ginpakalkal niya ang mga tul-an kag ginsunog ini sa altar. Sa sini nga paagi gindagtaan niya ang altar, suno sa gintagna sang propeta sang una sa panahon sang piesta samtang si Haring Jeroboam nagatindog sa tupad sang altar. Nagtulok si Haring Josias palibot kag nakita niya ang lulobngan sang propeta nga nagtagna sini. 17Nagpamangkot#1 Hari 13:30-32. sia, “Kay sin-o lulobngan ina?”

Ang mga tawo sang Betel nagsabat, “Lulobngan ini sang propeta nga naghalin sa Juda kag nagtagna sining mga butang nga imo ginhimo sa sini nga altar.”

18Si Josias nagsugo, “Ibilin lang dira ang iya mga tul-an kag indi pagkuhaa.”

Gani ang iya mga tul-an wala pagkuhaa kag subong man ang mga tul-an sang propeta nga naghalin sa Samaria.

19Sa tagsa ka siudad sang Israel si Haring Josias nagguba sang tanan nga mga lugar sa diin ginasimba ang mga diosdios nga ginpatindog sang mga hari sang Israel, nga tungod sini naakig gid ang Ginoo. Ginhimo niya sa sadto nga mga altar ang tanan nga ginhimo niya sa Betel. 20Ginpamatay niya ang tanan nga mga pari sang mga diosdios sa mga altar sa diin sila nagaalagad, kag ginsunog niya ang mga tul-an sang tawo sa tagsa ka altar. Dayon nagbalik sia sa Jerusalem.

Si Josias Nagsaulog sang Pascua

(2 Cron. 35:1-19)

21Si Haring Josias nagsugo sa mga tawo sa pagsaulog sang Pascua sa kadungganan sang Ginoo nga ila Dios, suno sa nasulat sa Libro sang Kasugtanan. 22Wala sing Pascua kaangay sini nga ginsaulog sang bisan sin-o nga hari sang Israel ukon sang Juda, halin pa sang tion nga ang mga hukom naggahom sa pungsod. 23Sang ulihi, sa ika-18 nga tuig sang paggahom ni Josias, ginsaulog ang Pascua sa Jerusalem.

Ang Iban nga mga Pagbaylo nga Ginhimo ni Josias

24Agod nga mapatuman ang mga Kasugoan nga ginsulat sa libro nga nakita ni Helkias nga Pinakamataas nga Pari sa Templo, ginpakuha ni Haring Josias sa Jerusalem kag sa bug-os nga Juda ang tanan nga mga espiritista kag mga manugpakot, kag ang tanan nga mga dios sa panimalay, mga diosdios, kag ang iban pa gid nga mga butang nga ginasimba. 25Wala pa gid sang hari kaangay sa iya halin sang una, nga nag-alagad sa Ginoo sa bug-os niya nga tagipusoon, panghunahuna, kag kusog, nga nagatuman sang tanan nga Kasugoan ni Moises kag wala sing hari kaangay sa iya halin sang una.

26Pero ang Ginoo naakig gid sa Juda paagi sa ginhimo ni Haring Manases kag bisan pa tubtob karon wala ini mag-untat. 27Ang Ginoo nagsiling, “Himuon ko sa Juda ang akon ginhimo sa Israel: tabugon ko ang mga tawo sang Juda sa akon panulok kag sikwayon ko ang Jerusalem, ang siudad nga akon ginpili, kag ang Templo, ang lugar sa diin nagsiling ako nga didto ako pagasimbahon.”

Ang Katapusan sang Paghari ni Josias

(2 Cron. 35:20–36:1)

28Ang tanan nga ginhimo ni Haring Josias nasulat sa Maragtas sang mga Hari sang Juda. 29Sang si Josias ang hari, si Neco nga hari sang Ehipto nagpangulo sang mga hangaway pakadto sa Suba sang Eufrates sa pagbulig sa hari sang Asiria. Si Haring Josias nagtinguha sa pagpakig-away sa Ehiptohanon nga mga hangaway sa Megido, kag napatay sia sa inaway. 30Ang iya mga opisyales nagkarga sang iya bangkay sa karwahi kag gindala ini pabalik sa Jerusalem, sa diin ginlubong sia sa lulobngan sang mga hari.

Ang mga tawo sang Juda nagpili kay Joacaz nga anak ni Josias kag ginhaplas sia nga manginhari.

Si Haring Joacaz sang Juda

(2 Cron. 36:2-4)

31Si Joacaz nagaedad sang baynte tres ka tuig sang paghari niya sa Juda, kag naggahom sia sa Jerusalem sa sulod sing tatlo ka bulan. Ang iya iloy amo si Hamutal, nga anak ni Jeremias nga naggikan sa siudad sang Libna. 32Nagpakasala sia batok sa Ginoo, nga nagasunod sang ginhimo sang iya mga katigulangan. 33Natapos ang iya paggahom sang si Haring Neco sang Ehipto nagbihag kag nagbilanggo sa iya sa Ribla, sa duta sang Hamat, kag ginpabayad ang Juda sing 7,500 ka libra nga pilak kag setentay singko ka libra nga bulawan subong buhis. 34Si#Jer. 22:11-12. Haring Neco naghimo sa anak ni Josias nga si Eliaquim nga hari sang Juda sa pagbulos kay Josias, kag gin-ilisan ang iya ngalan kay Joaquim. Si Joacaz gindala sa Ehipto ni Haring Neco, kag didto napatay sia.

Si Haring Joaquim sang Juda

(2 Cron. 36:5-8)

35Si Haring Joaquim nagsukot sang buhis sa mga tawo, suno sa ila manggad, agod makabayad sang buhis nga ginakinahanglan sang hari sang Ehipto.

36Si#Jer. 22:18-19; 26:1-6; 35:1-19. Joaquim nagaedad sing baynte singko ka tuig sang paghari niya sa Juda, kag naggahom sia sa Jerusalem sing onse ka tuig. Ang iya iloy amo si Zebida nga anak ni Pedaya nga nagikan sa banwa sang Roma. 37Si Joaquim nagpakasala batok sa Ginoo, nga nagasunod sang ginhimo sang iya mga katigulangan.

Currently Selected:

2 Mga Hari 23: MBBHIL12

Highlight

Copy

Compare