2 Mga Hari 1
1
Si Elias kag si Haring Ocozias
1Sang mapatay si Haring Acab sang Israel, ang pungsod sang Moab nagrebelde batok sa Israel.
2Si Haring Ocozias sang Israel nahulog halin sa balkon nga yara sa atop sang iya palasyo sa Samaria kag nabalda gid sia. Gani nagpadala sia sing mga tawo sa pagpamangkot kay Baalzebub, ang dios sang Ekron, nga siudad sa Filistia, agod sa paghibalo kon bala magaayo pa sia sa iya balda ukon indi. 3Pero ang anghel sang Ginoo nagsugo kay Elias nga propeta nga taga-Tisbe, sa paglakat kag sa pagsugata sang mga tawo nga ginpadala ni Haring Ocozias kag sa pagpamangkot sa ila, “Ngaa man nga magpamangkot pa kamo kay Baalzebub, ang dios sang Ekron? Tungod bala nga nagahunahuna kamo nga wala sing Dios sa Israel? 4Sugiri ninyo ang hari nga ang Ginoo nagasiling, ‘Indi ikaw mag-ayo sa imo balda, kundi mapatay ka!’”
Gintuman ni Elias ang ginsugo sang Ginoo, 5kag ang mga tawo nagbalik sa hari. Nagpamangkot ang hari, “Ngaa bala nagbalik kamo?”
6Nagsabat sila, “Ginsugata kami sang isa ka tawo kag ginsingganan niya kami nga magbalik kag sugiran ikaw nga ang Ginoo nagasiling sa imo, ‘Ngaa man nga nagapadala ka sing mga tawo sa pagpamangkot kay Baalzebub, ang dios sang Ekron? Tungod bala nga nagahunahuna ka nga wala sing Dios sa Israel? Indi ikaw mag-ayo sa imo mga balda, kundi mapatay ka!’”
7Nagpamangkot ang hari, “Ano bala ang hitsura sang tawo?”
8Nagsabat#Mat. 3:4; Mar. 1:6. sila, “Nagabayo sia sang panapton nga nahimo sa mga panit sang sapat, kag nawagkusan#1:8 Nagabayo sia…kag nawagkusan: ukonBulbolon sia nga tawo kag nagawagkos. sang paha nga panit.”
Ang hari nagsiling, “Si Elias ato!”
9Dayon nagpadala sia sing isa ka opisyal upod ang singkwenta ka mga tawo sa pagkuha kay Elias. Nakita sang opisyal si Elias nga nagapungko sa ibabaw sang bakulod, kag nagsiling sia sa iya, “Alagad sang Dios, nagsugo ang hari nga magdulhog ka.”
10Si#Luc. 9:54. Elias nagsabat, “Kon ako alagad sang Dios, kabay ang kalayo halin sa langit mahulog kag magsunog sa imo kag sa imo mga tinawo!” Sa gilayon may kalayo nga nahulog halin sa langit kag nagsunog sa opisyal kag sa iya mga tinawo.
11Ang hari nagpadala pa gid sing isa ka opisyal upod ang singkwenta ka mga tawo, nga nagtaklad#1:11 Ang isa ka dumaan nga pagbadbadnagtaklad; sa Hebreonagsabat. kag nagsiling kay Elias, “Alagad sang Dios, nagsugo ang hari nga magdulhog ka gilayon!”
12Si Elias nagsabat, “Kon ako alagad sang Dios, kabay ang kalayo halin sa langit mahulog kag magsunog sa imo kag sa imo mga tinawo!” Sa gilayon ang kalayo sang Dios nahulog kag nagsunog sa opisyal kag sa iya mga tinawo.
13Sa liwat ang hari nagpadala sang isa ka opisyal upod sa singkwenta ka mga tawo. Nagtaklad sila sa bakulod, nagluhod ang opisyal sa atubang ni Elias kag nagpakitluoy, “Alagad sang Dios, kaluoyi ako kag ang akon mga tinawo. Luwasa ang amon mga kabuhi! 14Ang duha ka mga opisyales kag ang ila mga tinawo nasunog sang kalayo halin sa langit, pero kon mahimo kaluoyi ako!”
15Ang anghel sang Ginoo nagsiling kay Elias, “Dulhog ka upod sa iya, kag indi ka magkahadlok.” Gani si Elias naglakat upod sa opisyal pakadto sa hari, 16kag nagsiling si Elias sa hari, “Amo ini ang ginasiling sang Ginoo: ‘Tungod kay nagpadala ikaw sing mga tawo sa pagpamangkot kay Baalzebub, ang dios sang Ekron— subong nga daw wala sing Dios sa Israel nga pamangkutan—indi ikaw mag-ayo, kundi mapatay ka!’”
17Si Ocozias napatay, suno sa ginsiling sang Ginoo paagi kay Elias. Si Ocozias wala sing mga anak nga lalaki, gani ang iya utod nga lalaki nga si Joram nagbulos sa iya subong hari, sa ikaduha nga tuig sang paggahom sang hari sang Juda nga si Jehoram, anak ni Josafat.
18Ang tanan nga ginhimo ni Haring Ocozias ginsulat sa Maragtas sang Mga Hari sang Israel.
Currently Selected:
2 Mga Hari 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
