1 Mga Hari 22
22
Si Micaya nga Propeta Nagpaandam kay Acab
(2 Cron. 18:2-27)
1May kalinong sa tunga sang Israel kag Siria sa sulod sang tatlo ka tuig, 2pero sang ikatlo nga tuig si Haring Josafat sang Juda nagkadto sa pagpakigkita kay Haring Acab sang Israel.
3Si Acab nagpamangkot sa iya mga opisyales, “Nakahibalo bala kamo nga ang Ramot sa Galaad aton? Ngaa wala kita naghimo sing paagi sa pagbawi sini sa hari sang Siria? 4Si Acab nagpamangkot kay Josafat, “Maupod ka bala sa akon sa pagsalakay sang Ramot?”
Si Josafat nagsabat, “Handa ako kon handa ka, kag subong man, handa ang akon mga soldado nga nagalakat lang kag ang akon mga soldado nga nagasakay sa kabayo. 5Pero pamangkuton naton anay ang Ginoo.”
6Gani ginpatawag ni Acab ang mga 400 ka mga propeta kag ginpamangkot sila, “Magalakat bala ako sa pagsalakay sang Ramot, ukon indi?”
Nagsabat sila, “Salakaya! Ang Ginoo magapadaog sa imo.”
7Pero si Josafat nagpamangkot, “Wala na bala sing iban nga propeta nga paagi sa iya aton mapamangkot ang Ginoo?”
8Si Acab nagsabat, “May isa pa. Si Micaya nga anak ni Imla. Pero naakig ako sa iya tungod kay wala gid sia sing maayo nga ginatagna para sa akon, kundi pirme lang malain.”
Si Josafat nagsabat, “Indi ka magsiling sina!”
9Gani ginpatawag ni Haring Acab ang isa ka opisyal sa korte kag ginsingganan sia nga kuhaon niya si Micaya sa gilayon.
10Ang duha ka mga hari nga nagasuksok sang harianon nga mga bayu nagapungko sa ila mga trono sa linasan sa gwa lang sang pwerta sang Samaria, kag ang tanan nga mga propeta nagapanagna sa atubang nila. 11Ang isa sang mga propeta nga si Sedequias nga anak ni Canaana naghimo sing salsalon nga mga sungay kag nagsiling kay Acab, “Amo ini ang ginasiling sang Ginoo: ‘Gamiton mo ini sa pagpakig-away sa mga Sirianhon tubtob malutos mo sila sing bug-os.’” 12Ang tanan nga mga propeta nagsiling sing amo man. Siling nila, “Salakaya ang Ramot kag magadaog ka kay ang Ginoo magapadaog sa imo.”
13Sa pihak nga bahin, ang opisyal nga nagkuha kay Micaya nagsiling sa iya, “Ang tanan nga mga propeta nagtagna nga magadaog ang hari. Dapat ka magtagna sing amo man.”
14Pero si Micaya nagsabat, “Sa ngalan sang buhi nga Ginoo, ihambal ko ang ginasiling niya!”
15Sang pagkadto niya sa atubang sang hari, ang hari nagpamangkot sa iya, “Micaya, salakayon bala namon ni Haring Josafat ang Ramot, ukon indi?”
Si Micaya nagsabat, “Sigi, salakaya ninyo kag magadaog kamo kay ang Ginoo magapadaog sa inyo.”
16Pero si Acab nagsabat, “Kapila gid ako magsiling sa imo nga maghambal ka lamang sang kamatuoran sa akon sa ngalan sang Ginoo!”
17Si#Num. 27:17; Mat. 9:36; Mar. 6:34. Micaya nagsabat, “Nakita ko ang mga soldado sang Israel nga nagalalapta sa mga bakulod, kaangay sang mga karnero nga wala sing manugbantay kag ang Ginoo nagsiling: ‘Ini nga mga tawo wala sing pangulo. Papaulia sila nga may kalinong.’”
18Si Acab nagsiling kay Josafat, “Ginsingganan ko ikaw nga wala gid sia nagatagna sing maayo para sa akon, kundi pirme lang malain!”
19Si#Sal. 1:6; Isa. 6:1. Micaya nagpadayon sa pagsiling, “Karon pamatii ang ginasiling sang Ginoo! Nakita ko ang Ginoo nga nagapungko sa iya trono sa langit upod ang iya mga anghel nga nagatindog sa tupad niya. 20Ang Ginoo nagpamangkot, ‘Sin-o bala ang magahaylo kay Acab sa pagkadto sa Ramot agod mapatay sia didto?’ Ang pila sang mga anghel nagsiling sing isa ka butang, kag ang iban nagsiling sang lain man nga butang, 21tubtob ang isa ka espiritu nagpalapit sa Ginoo kag nagsiling, ‘Ako ang magahaylo sa iya?’ 22Ang Ginoo nagpamangkot, ‘Paano?’ Ang espiritu nagsabat, ‘Malakat ako kag himuon ko nga ang tanan nga mga propeta ni Acab magbinutig.’ Ang Ginoo nagsiling, ‘Lakat kag hayloha sia. Magamadinalag-on ka.’”
23Si Micaya nagsiling pa gid: “Amo ini ang natabo. Ang Ginoo nagbuot nga ining imo mga propeta magabutig sa imo. Pero ang Ginoo mismo nagsiling nga malain ang maabutan mo!”
24Dayon si Sedequias nga propeta nagpalapit kay Micaya, gintampa sia sa guya kag nagpamangkot, “San-o pa bala naghalin sa akon ang Espiritu sang Ginoo sa pagpakighambal sa imo?”
25Si Micaya nagsabat, “Mahibal-an mo ini kon magkadto ka sa kwarto sa likod sa pagpanago.”
26Dayon si Haring Acab nagmando sang isa sang iya mga opisyales, “Dakpa si Micaya kag dalha sia kay Amon, ang gobernador sang siudad kag kay Joas nga prinsipe. 27Singgana sila nga prisuhon sia kag hatagan lang sing diutay nga tinapay kag tubig tubtob makabalik ako nga indi maano.”
28Si Micaya nagsiling, “Kon makabalik ka nga indi maano, ti ang Ginoo wala maghambal paagi sa akon!” Kag nagsiling pa gid sia, “Ang tagsatagsa sa inyo magpamati sa akon ginsiling!”
Ang Pagkapatay ni Acab
(2 Cron. 18:28-34)
29Dayon si Haring Acab sang Israel kag si Haring Josafat sang Juda nagsalakay sang siudad sang Ramot sa Galaad. 30Si Acab nagsiling kay Josafat, “Kon magkadto kita sa inaway, indi ako magpakilala sang akon kaugalingon, pero ikaw magasuksok sang mga bayu sang hari.” Gani ang hari sang Israel nagkadto sa inaway nga wala magpakilala sang iya kaugalingon.
31Ang hari sang Siria nagmando sang iya trayntay dos ka mga pangulo sa karwahi nga indi magpakig-away bisan kay sin-o kundi sa hari lamang sang Israel. 32Gani sang pagkakita nila kay Haring Josafat naghunahuna sila nga hari sia sang Israel, gani tanan sila nagpadulong sa pagsalakay sa iya. Pero sang pagsinggit niya, 33natalupangdan nila nga indi sia ang hari sang Israel, kag gin-untatan nila ang ila pagsalakay. 34Pero sang pagpana sang isa ka soldado nga Sirianhon nalagpatan nga ang iya baslay nag-igo sa mga tinabuan sang hapin sa dughan ni Haring Acab. Nagsinggit sia sa nagadala sang iya karwahi, “Naigo ako! Mabalik kita kag dalha ako palayo sa inaway!”
35Samtang nagalapuyot ang inaway, si Haring Acab nagpadayon sa pagtindog sa iya karwahi nga nagaatubang sa mga Sirianhon. Ang dugo sa iya pilas nag-ilig kag nabulit ang salog sang karwahi kag sang pagkagab-i napatay sia. 36Sang kahapunanon na ang mando nag-abot sa mga soldado nga Israelinhon nga magbalik sila sa ila kaugalingon nga pungsod kag siudad.
37Gani si Haring Acab napatay. Ang iya bangkay gindala sa Samaria kag ginlubong didto. 38Ang iya karwahi ginhugasan nila sa punong sang Samaria sa diin ang mga ido nagdilap sang iya dugo kag ang mga babayi nga nagabaligya sang ila dungog nagpaligos, suno sa ginsiling sang Ginoo nga matabo.
39Ang tanan nga ginhimo ni Haring Acab, lakip ang ginsiling nahanungod sang iya palasyo nga napunihan sang tiposo kag ang tanan nga mga siudad nga iya ginpatindog, nasulat sa Maragtas sang mga Hari sang Israel. 40Sang pagkapatay niya ang iya anak nga si Ocozias nagbulos sa iya subong hari.
Si Haring Josafat sang Juda
(2 Cron. 20:31–21:1)
41Sa ikap-at nga tuig sang paggahom ni Haring Acab sang Israel, si Josafat nga anak ni Asa nanginhari sang Juda 42sang nagaedad sia sing trayntay singko ka tuig, kag naghari sia sa Jerusalem sing baynte singko ka tuig. Ang iya iloy amo si Azuba nga anak ni Silhi. 43Kaangay sia sang iya amay nga si Asa nga naghimo sing matarong sa atubang sang Ginoo, pero ang mga ginasimbahan para sa mga diosdios wala pa maguba, kag ang mga tawo nagpadayon sa pagdulot sing mga halad kag sa pagsunog sing insyenso didto. 44Si Josafat nagpakighidait sa hari sang Israel.
45Ang tanan nga mga binuhatan ni Josafat, ang iya kaisog kag ang iya mga pagpakig-away, nasulat sa Maragtas sang mga Hari sang Juda. 46Ginpahalin niya ang tanan nga mga lalaki kag mga babayi nga nagabaligya sang ila dungog nga nagaalagad sa mga altar sang mga diosdios. Amo ini ang mga nabilin pa sang panahon sang iya amay nga si Asa.
47Ang duta sang Edom wala sing hari. Gingamhan ini sang gobernador nga ginpili sang hari sang Juda.
48Si Haring Josafat may dalagku nga mga sakayan sa dagat nga ginhimo sa pagpanakayon pakadto sa duta sang Ofir sa pagkuha sing bulawan. Pero naguba ini sa Eziongeber kag wala na ini makabiyahe. 49Dayon si Haring Ocozias sang Israel nagsiling nga sarang makapanakayon ang iya mga tinawo upod sa mga tinawo ni Josafat, pero si Josafat indi magpasugot.
50Si Josafat napatay kag ginlubong sa harianon nga mga lulobngan sa Siudad ni David kag ang iya anak nga si Jehoram nagbulos sa iya subong hari.
Si Haring Ocozias sang Israel
51Sa ika-17 nga tuig sang paggahom ni Haring Josafat sang Juda, si Ocozias nga anak ni Acab nanginhari sang Israel, kag naggahom sia sa Samaria sing duha ka tuig. 52Nagpakasala sia sa Ginoo, ginsunod niya ang malaut nga binuhatan sang iya amay nga si Acab, ang iya iloy nga si Jezebel, kag ni Haring Jeroboam, nga nagdala sa Israel sa pagpakasala. 53Nagsimba kag nag-alagad sia kay Baal, kag pareho sia sa iya amay nga nagpaakig sa Ginoo, ang Dios sang Israel.
Currently Selected:
1 Mga Hari 22: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
