1 Samuel 19
19
Ginhingabot ni Saul si David
1Ginsugiran ni Saul si Jonatan nga iya anak kag ang tanan niya nga mga opisyales nga nagaplano sia sa pagpatay kay David. Pero si David palangga gid ni Jonatan, 2gani ginsugiran niya si David, “Ang akon amay nagatinguha sa pagpatay sa imo. Gani buas sa aga mag-andam ka, magpanago ka sa lugar nga indi mahibal-an kag magpabilin ka didto. 3Magalakat ako kag magatindog sa tupad sang akon amay sa uma sa diin ikaw nagapanago kag hambalon ko sia nahanungod sa imo. Kon ano ang mahibal-an ko, sugiran ko ikaw.”
4Karon gindayaw ni Jonatan si David sa kay Saul kag nagsiling, “Tatay, indi ka maghimo sing malain sa imo alagad nga si David. Wala sia sing nahimo nga sayop sa imo, sa baylo ang tanan nga iya ginhimo nakahatag sing daku nga kaayuhan sa imo. 5Gintaya niya ang iya kabuhi sang pagpatay niya kay Goliat, kag ang Ginoo naghatag sing daku nga kadalag-an sa Israel. Nakita mo ini kag nagkasadya ikaw. Ngaa, karon himuan mo sing malain ang isa ka tawo nga wala sing sala kag patyon si David nga wala gid sing kabangdanan?”
6Nagpamati si Saul sa ginsiling ni Jonatan kag nagsumpa sa ngalan sang Ginoo nga indi niya pag-ipapatay si David. 7Gani gintawag ni Jonatan si David kag ginsugiran sia sang tanan; dayon gindala niya sia kay Saul, kag si David nag-alagad sa hari subong sang pag-alagad niya sang una.
8May inaway liwat batok sa mga Filistinhon. Si David nagsalakay sa ila kag nagpamatay sang madamo sa ila, gani nagpalagyo sila sa iya.
9Isa ka adlaw, ang malaut nga espiritu halin sa Ginoo naggahom kay Saul. Si Saul yara nagapungko sa iya balay nga nagauyat sang iya bangkaw, kag si David yadto man didto nga nagakutingkuting sang iya arpa. 10Kag si Saul nagtinguha sa paglansang kay David sa dingding sang iya bangkaw, pero nakalikday si David kag ang bangkaw nag-ungot sa dingding. Nagdalagan si David kag nagpalagyo.
11Sa#Sal. 59 Titulo. amo man nga gab-i si Saul nagpadala sing mga tawo sa pagbantay sa balay ni David kag sa pagpatay sa iya pagkaaga. Si Mikal nga asawa ni David nagpaandam sa iya, “Kon indi ka magpalagyo karon nga gab-i, buas mapatay ikaw.” 12Gintunton niya si David sa bintana, kag nagdalagan si David kag nagpalagyo. 13Dayon ginkuha niya ang diosdios nga yara sa ila balay kag ginpahigda sa katre, ginpaulon sa ulonan nga nahimo sa bulbol sang kanding, kag iya ini ginhabulan. 14Sang ang mga tawo ni Saul nagkadto sa pagdakop kay David, ginsingganan sila ni Mikal nga nagamasakit si David. 15Pero si Saul nagpabalik sa ila sa pagtan-aw gid kay David. Kag ginsingganan sila, “Dalha ninyo sia diri sa iya higdaan kay patyon ko sia.” 16Nagsulod sila kag nakita nila ang diosdios sa higdaan nga nagaulon sa ulonan nga nahimo sa bulbol sang kanding. 17Nagpamangkot si Saul kay Mikal, “Ngaa nga gindayaan mo ako sing subong sini kag ginpapalagyo ang akon kaaway?”
Nagsabat sia, “Nagsiling sia nga patyon niya ako kon indi ko sia pagbuligan nga makapalagyo.”
18Nagpalagyo si David kag nagkadto kay Samuel sa Rama kag ginsugiran niya sia sang tanan nga ginhimo ni Saul sa iya. Dayon nagkadto sila ni Samuel sa Nayot kag nag-estar didto. 19Ginsugiran si Saul nga si David yadto didto sa Nayot sa Rama, 20gani nagpadala sia sing mga tawo sa pagdakop sa iya. Nakita nila#19:20 Ang iban nga dumaan nga mga pagbadbadNakita nila; sa HebreoNakita niya. ang grupo sang mga propeta nga nagasinaot kag nagasinggit, nga ginapangulohan ni Samuel. Dayon gingamhan sang Espiritu sang Dios ang mga tinawo ni Saul, kag sila man nagbuylog sa pagsaot kag pagsinggit. 21Sang pagkabati sini ni Saul nagpadala pa gid sia sing mga mensahero kag sila man nagbuylog sa pagsaot kag pagsinggit. Nagpadala pa gid sia sing mga mensahero sa ikatlo nga tion, kag amo man ang nahanabo sa ila. 22Sang ulihi sia gid ang nagkadto sa Rama. Sang pag-abot niya sa daku nga bubon sa Seko, nagpamangkot sia kon diin si Samuel kag si David, kag ginsugiran sia nga didto sila sa Nayot. 23Sang nagapakadto sia didto gingamhan man sia sang Espiritu sang Dios, kag nagsaot kag nagsinggit sia tubtob makaabot sia sa Nayot. 24Gin-uba#1 Sam. 10:11-12. man niya ang iya mga bayu kag nagsaot kag nagsinggit sa atubang ni Samuel, kag naghigda sia nga hublas sa bug-os sadto nga adlaw kag gab-i. Gani amo ini ang kabangdanan nga nagasiling sila, “Nanginpropeta man bala si Saul?”
Currently Selected:
1 Samuel 19: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
