1 Samuel 18
18
1Sa tapos ang paghambalanay ni Saul kag ni David, si Jonatan nga anak ni Saul nanamian gid kay David nga naghigugma sa iya subong sang iya kaugalingon. 2Ginhawiran ni Saul si David sadto nga adlaw kag wala na niya sia ginpapauli sa ila balay. 3Si Jonatan nagsumpa sa pagpakig-abyan kay David sa wala sing katapusan nga pag-abyanay, tungod kay ginhigugma gid niya si David. 4Gin-uba niya ang iya bayu nga malaba kag ginhatag ini kay David upod ang iya hinganiban, kag ang iya man espada, pana, kag paha. 5Si David nanginmadinalag-on sa tanan nga bulohaton nga ginsugo sa iya ni Saul, gani ginhimo sia ni Saul nga opisyal sang iya mga hangaway. Naluyagan ini sang tanan nga mga tawo ni Saul kag sang iya mga opisyales.
Si Saul Nahisa kay David
6Sang pagbalik ni David upod sa mga hangaway sa tapos niya mapatay si Goliat, naggwa ang mga babayi sa tagsa ka banwa sang Israel sa pagsugata kay Haring Saul. Nagakinanta sila sing masinadyahon, nagasinaot, kag nagatinukar sing mga tamborin kag mga lira. 7Amo#1 Sam. 21:11; 29:5. ini ang ila ginkanta: “Si Saul nagpatay sing mga linibo, pero si David nagpatay sing mga tig-napulo ka libo.” 8Wala ini maluyagi ni Saul kag naakig gid sia. Nagsiling sia, “Kay David ginpahanungod nila ang linaksa, pero sa akon linibo lamang. Ang masunod sini amo nga himuon nila sia nga hari!” 9Kag halin sadto nagkahisa sia kag nagpanilag kay David.
10Sang madason nga adlaw gintugotan sang Dios ang malaut nga espiritu sa paggahom kay Saul, kag nagwalay sia sa sulod sang iya balay subong sang buang. Si David nagakutingkuting sang iya arpa subong sang iya ginahimo adlaw-adlaw kag si Saul nagauyat sang bangkaw. 11Nagsiling si Saul sa iya kaugalingon, “Ilansang ko sia sa dingding,” kag ginbangkaw niya sia sing makaduha, pero nakalikday si David sa tagsa ka tion.
12Si Saul nahadlok kay David, tungod kay ang Ginoo nagaupod kay David, kag nagsikway sa iya. 13Gani ginpalakat ni Saul si David kag ginhimo sia nga pangulo sang 1,000 nga mga hangaway. Si David nagpangulo sang iya mga tinawo sa inaway, 14kag nagmadinalag-on sia sa tanan nga iya ginahimo, tungod kay ang Ginoo nag-upod sa iya. 15Nahibaluan ni Saul ang mga kadalag-an ni David kag nagdugang pa gid ang iya pagkahadlok sa iya. 16Pero ang tanan sa Israel kag sa Juda naluyag kay David, kay sia madinalag-on nga pangulo.
Si David Nagpangasawa sang Anak ni Saul
17Karon si Saul nagsiling kay David, “Yari ang akon magulang nga anak nga babayi nga si Merab. Ipaasawa ko sia sa imo, sa kondisyon nga mag-alagad ka sa akon subong isganan kag mainunongon nga soldado, kag mag-away sang mga inaway sang Ginoo.” Kay si Saul naghunahuna nga sa sini nga paagi ang mga Filistinhon magapatay kay David, kag indi na sia kinahanglan magpangamot sini.
18Nagsabat si David, “Sin-o gid bala ako, kag ano gid bala ang akon panimalay, nga mangin-umagad ako sang hari?” 19Pero sang mag-abot ang tion nga si Merab ipaasawa na kay David, sa baylo ginpaasawa sia sa isa ka tawo nga ginahingalanan kay Adriel nga taga-Mehola.
20Pero si Mikal nga anak nga babayi ni Saul naghigugma kay David, kag sang pagkabati sini ni Saul nalipay gid sia. 21Nagsiling sia sa iya kaugalingon, “Ipaasawa ko si Mikal kay David, kag himuon ko sia nga paon agod nga mapatay si David sang mga Filistinhon.” Gani sa ikaduha nga tion nagsiling si Saul kay David, “Mangin-umagad ka nakon.” 22Ginmanduan niya ang iya mga opisyales sa paghambal kay David sa tago lamang kag singganon sia, “Ang hari naluyag gid sa imo, kag subong man ang iya mga opisyales. Karon amo ang maayo nga tion para sa imo sa pagpangasawa sa iya anak.”
23Gani ginsingganan nila sini si David, kag nagsabat sia, “Isa ka daku nga kadungganan nga mangin-umagad sang hari, kag indi bagay para sa isa ka imol kag kubos nga subong sa akon.”
24Ang mga opisyales nagsugid kay Saul sang ginsiling ni David, 25kag si Saul nagsugo sa ila sa pagsiling sa iya: “Ang ginakinahanglan sang hari sa imo subong bili sang nobya amo ang punta nga mga panit sang kinatawo sang 100 ka patay nga mga Filistinhon bilang pagtimalos sa iya mga kaaway.” Karon amo ini ang plano ni Saul agod mapatay si David sang mga Filistinhon. 26Ang mga opisyales ni Saul nagsugid kay David sang ginsiling ni Saul, kag si David nalipay gid nga mangin-umagad sang hari. Sa wala pa ang adlaw sang kasal, 27si David kag ang iya mga tinawo naglakat kag nagpatay sang 200 ka mga Filistinhon. Ginkuha niya ang punta nga panit sang ila mga kinatawo kag gindala sa hari kag gin-isip nila ini sa atubang sang hari, agod mangin-umagad sia sang hari. Gani ginpaasawa ni Saul si Mikal nga iya anak nga babayi sa kay David.
28Nahibal-an gid ni Saul nga ang Ginoo nagaupod kay David kag ang iya anak nga babayi nga si Mikal naghigugma sa iya. 29Gani nagkahadlok pa gid sia kay David kag nanginkaaway niya sia tubtob buhi sia.
30Ang mga hangaway nga Filistinhon naggwa kag nagpakig-away, pero sa tagsa ka pag-away si David nagmadinalag-on labaw sang sa bisan kay sin-o nga mga opisyales ni Saul, gani nanginbantog pa gid sia.
Currently Selected:
1 Samuel 18: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
