1 Samuel 16
16
Si David Ginhaplas nga Manginhari
1Ang Ginoo nagsiling kay Samuel, “Daw ano pa kalawig ang imo pagpangasubo tungod kay Saul? Ginsikway ko sia subong hari sang Israel. Pero karon kuha ka sing lana sang olivo kag dalha ini, kay pakadtuon ko ikaw sa Betlehem sa isa ka tawo nga ginahingalanan kay Jesse. Ginpili ko ang isa sang iya mga anak nga lalaki nga manginhari.”
2Nagpamangkot si Samuel, “Paano ang paghimo ko sina? Kon mabatian ini ni Saul, pagapatyon niya ako!”
Ang Ginoo nagsabat, “Dala ka sing tinday nga baka kag magsiling, ‘Nag-abot ako sa pagdulot sang halad sa Ginoo.’ 3Agdaha si Jesse sa imo paghalad, kag tudloan ko ikaw sang imo pagahimuon. Haplason mo subong hari ang tawo nga isiling ko sa imo.”
4Gintuman ni Samuel ang ginsiling sa iya sang Ginoo kag nagkadto sia sa Betlehem, sa diin ginsugata sia sang mga pangulo sang siudad nga nagakurog kag nagpamangkot, “Nag-abot ka bala sa paghidait?”
5Nagsabat sia, “Huo, nag-abot ako sa pagdulot sing halad sa Ginoo. Magpakabalaan kamo sang inyo kaugalingon kag mag-upod sa akon.” Ginpakabalaan man niya si Jesse kag ang iya mga anak nga lalaki, kag gin-agda sila sa paghalad.
6Sang mag-abot sila, nakita ni Samuel ang anak nga lalaki ni Jesse nga si Eliab, kag nagsiling sia sa iya kaugalingon, “Ini nga tawo nga nagatindog sa presensya sang Ginoo amo gid ang ginpili niya.” 7Pero ang Ginoo nagsiling sa iya, “Indi ang iya kataas ukon ka gwapo ang imo tan-awon. Ginsikway ko sia, tungod kay ang akon pagtan-aw indi pareho sang pagtan-aw sang tawo. Ang tawo nagatulok sa gwa nga dagway pero ako nagatulok sa tagipusoon.”
8Dayon gintawag ni Jesse ang iya anak nga si Abinadab kag gindala kay Samuel. Pero si Samuel nagsiling, “Ang Ginoo wala magpili sa iya.” 9Dayon gindala ni Jesse si Sama. Si Samuel nagsiling, “Ang Ginoo wala man magpili sa iya.” 10Sa sini nga paagi gindala ni Jesse ang iya pito ka mga anak nga lalaki sa kay Samuel, kag si Samuel nagsiling sa iya, “Ang Ginoo wala sing may ginpili sa ila.” 11Kag ginpamangkot sia ni Samuel, “May iban pa bala ikaw nga mga anak nga lalaki?”
Nagsabat si Jesse, “May ara pa, ang kamanghuran, pero wala sia diri kay nagabantay sia sang mga karnero.”
Nagsabat si Samuel, “Pakadtua sia diri, kay indi kita magdulot sang halad tubtob indi sia mag-abot.” 12Gani ginpatawag sia ni Jesse. Gwapo sia, maayo sing lawas kag manayanaya sing nawong. Ang Ginoo nagsiling kay Samuel, “Amo ina sia, haplasa sia!” 13Ginkuha ni Samuel ang lana sang olivo kag ginhaplas niya si David sa atubang sang iya mga utod nga lalaki. Sa gilayon ang Espiritu sang Ginoo naggahom kay David kag nagpabilin sa iya sugod sadto nga adlaw. Dayon nagbalik si Samuel sa Rama.
Si David Nag-alagad kay Saul
14Ang Espiritu sang Ginoo naghalin kay Saul kag ang malaut nga espiritu nga ginpadala sang Ginoo nagtublag sa iya. 15Nagsiling ang iya mga alagad sa iya, “Nahibal-an namon nga ang malaut nga espiritu nga ginpadala sang Dios nagatublag sa imo. 16Gani, mahal nga hari, tugoti kami sa pagpangita sing tawo nga makahibalo magtukar sang arpa. Kon ang malaut nga espiritu mag-abot sa imo, ang tawo magatukar sang arpa kag magaayo ang imo pamatyag.”
17Nagsugo si Saul sa ila, “Pangita kamo sing tawo nga maayo magtukar sang arpa kag dalha sia diri sa akon.”
18Ang isa sang iya mga suloguon nagsiling, “Si Jesse nga taga-Betlehem may isa ka anak nga lalaki nga maayo magtukar sang arpa. Maisog sia nga soldado, gwapo, kag maayo nga manughambal. Ang Ginoo nagaupod sa iya.”
19Gani si Saul nagpadala sing mga suloguon kay Jesse nga nagasiling, “Ipadala diri ang imo anak nga lalaki nga si David, yadtong nagabantay sang mga karnero.” 20Ginpadala ni Jesse si David kay Saul nga may dala nga isa ka sulodlan nga panit nga may bino, isa ka tinday nga kanding, kag isa ka asno nga may karga nga tinapay. 21Nagkadto si David kay Saul kag nag-alagad sa iya. Naluyagan gid sia ni Saul kag ginhimo niya si David nga manugdala sang iya mga hinganiban. 22Dayon si Saul nagpadala kay Jesse sing mensahe nga nagasiling, “Naluyagan ko gid si David, gani diri lang sia anay sa pag-alagad sa akon.” 23Halin sadto kon ang malaut nga espiritu nga ginapadala sang Dios mag-abot kay Saul, si David nagakuha sang iya arpa kag magtukar. Ang malaut nga espiritu nagahalin, kag si Saul maulian kag magaayo liwat ang iya pamatyag.
Currently Selected:
1 Samuel 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
