1 Samuel 15
15
Pag-inaway batok sa mga Amaleknon
1Nagsiling#1 Sam. 10:1. si Samuel kay Saul, “Ako amo ang ginpadala sang Ginoo sa paghaplas sa imo nga hari sang mga tawo sang Israel. Karon pamatii ang ginasiling sang Ginoo nga Makagagahom. 2Pagasilutan#Exo. 17:8-14; Deut. 25:17-19. niya ang mga Amaleknon tungod kay ginsumpong sang ila mga katigulangan ang mga Israelinhon sang nagapanglakaton sila halin sa Ehipto. 3Lakat ka, kag salakaya ang mga Amaleknon, kag laglaga sing bug-os ang tanan nila nga mga pagkabutang. Indi sila pagbilini bisan ano. Pamatya ang tanan nga mga lalaki, mga babayi, mga kabataan, kag mga lapsag; ang mga baka kag mga karnero, mga kamelyo kag mga asno.”
4Gintipon ni Saul ang iya mga hangaway kag gin-isip sila sa Telaim: may 200,000 ka mga hangaway halin sa Israel kag 10,000 halin sa Juda. 5Dayon sia kag ang iya mga hangaway nagkadto sa siudad sang Amalek, kag ginbanggaan nila sila sa namalhan nga suba. 6Ginpaandaman niya ang mga Kenhanon nga nagasiling, “Lakat kamo kag bayai ninyo ang mga Amaleknon, agod indi ko kamo pagpamatyon upod sa ila. Nanginmaayo ang inyo mga katigulangan sa mga Israelinhon sang paggwa nila sa Ehipto.” Gani naghalin ang mga Kenhanon.
7Ginlutos ni Saul ang mga Amaleknon, halin sa Havila tubtob sa Sur, sa nasidlangan sang Ehipto. 8Gindakop niya nga buhi si Agag nga hari sang Amalek, pero ginpamatay niya ang tanan nga mga tawo. 9Si Saul kag ang iya mga tinawo nagluwas sang kabuhi ni Agag, kag wala nila pagpamatya ang pinakamaayo nga mga karnero, mga baka, pinakamaayo nga mga tinday sang baka, mga kordero, ukon ang bisan ano nga maayo; pero ginlaglag nila ang tanan nga indi mapuslan ukon wala sing pulos.
Si Saul Ginsikway subong Hari
10Ang Ginoo nagsiling kay Samuel, 11“Nagahinulsol ako nga ginhimo ko si Saul nga hari kay nagtalikod sia sa akon kag wala magtuman sang akon mga sugo.” Naakig si Samuel, kag sa bilog nga gab-i nagpakitluoy sia sa Ginoo tungod kay Saul. 12Aga pa sa madason nga adlaw naglakat sia sa pagpangita kay Saul. Nakabati sia nga si Saul nagkadto sa banwa sang Carmel, sa diin nagpatindog sia sing monumento para sa iya kaugalingon, kag sa tapos nagkadto sia sa Gilgal. 13Si Samuel nagkadto kay Saul, kag gin-abiabi sia ni Saul nga nagasiling, “Samuel, ang Ginoo magbendisyon sa imo! Gintuman ko ang iya ginsugo.”
14Nagpamangkot si Samuel, “Ngaa man nga may mabatian ako nga mga baka nga nagamama kag mga karnero nga nagababa?”
15Nagsabat si Saul, “Ang akon mga tinawo nagkuha sina sa mga Amaleknon. Ginbilin nila ang pinakamaayo nga mga karnero kag mga baka nga idulot subong halad sa Ginoo nga imo Dios, kag ang iban ginlaglag namon sing bug-os.”#15:15 GINLAGLAG SING BUG-OS: Ini nga mga sapat ginhalad sa Ginoo sing bug-os kag dapat laglagon (tan-awa ang Leviticus 27:28).
16Nagsiling si Samuel, “Maghipos ka, kay sugiran ko ikaw sang ginsiling sang Ginoo sa akon kagab-i.”
Nagsiling si Saul, “Sugiri ako.”
17Nagsabat si Samuel, “Bisan ginkabig mo ang imo kaugalingon nga indi importante, pero ikaw ang pangulo sang mga tribo sang Israel. Ang Ginoo naghaplas sa imo nga manginhari sang Israel, 18kag nagsugo sa imo nga laglagon yadtong mga malaut nga mga tawo sang Amalek. Ginsingganan niya ikaw sa pagpakig-away tubtob nga mapamatay nimo sila tanan. 19Karon, ngaa bala nga wala ka magtuman sa iya? Ngaa bala nga nagdinaguso kamo sa pag-agaw sang ila mga pagkabutang, kag naghimo sang kontra sa Ginoo?”
20Nagsabat si Saul, “Nagtuman ako sa Ginoo. Naglakat ako suno sa iya ginsiling, kag gindala ko diri si Haring Agag, kag ginpamatay ang tanan nga mga Amaleknon. 21Pero ang akon mga tinawo wala magpamatay sang pinakamaayo nga mga karnero kag mga baka nga ila gin-agaw, sa baylo gindala nila ini diri sa Gilgal agod idulot subong halad sa Ginoo nga imo Dios.”
22Nagsiling si Samuel, “Ano bala ang ginapasulabi sang Ginoo: ang pagtuman bala ukon ang mga dulot kag mga halad? Labing maayo pa ang pagtuman sa iya sang sa paghalad sa iya sang pinakamaayo nga karnero. 23Ang pagsupak sa iya pareho kalain sang pagkababaylan, kag ang pagkadi-matinumanon pareho kalaut sang pagsimba sa mga diosdios. Tungod kay ginsikway mo ang sugo sang Ginoo, ginsikway ka man niya subong hari.”
24Nagsabat si Saul, “Nakasala ako, wala ako magtuman sa sugo sang Ginoo kag sang imo mga ginsiling sa akon. Nahadlok ako sa akon mga tinawo kag ginhimo ko ang ila luyag. 25Pero#1 Sam. 28:17; 1 Hari 11:30-31. karon nagapakitluoy ako sa imo, patawara ako sang akon sala kag mag-upod ka sa akon pabalik, agod nga makasimba ako sa Ginoo.”
26Nagsabat si Samuel, “Indi ako mag-upod sa imo pabalik. Ginsikway mo ang sugo sang Ginoo, kag ginsikway ka niya subong hari sang Israel.”
27Dayon nagtalikod si Samuel sa paglakat, pero ginhawiran sia ni Saul sa bayu kag nagisi ini. 28Si Samuel nagsiling sa iya, “Ang Ginoo nagkuha sang ginharian sang Israel gikan sa imo karon nga adlaw kag ginhatag sa isa nga mas maayo pa sang sa imo. 29Ang gamhanan nga Dios sang Israel wala nagabutig, ukon nagabaylo sang iya panghunahuna. Indi sia tawo nga nagabaylo sang iya panghunahuna.”
30Nagsabat si Saul, “Nakasala ako, pero karon pasidunggi ako sa atubang sang mga pangulo sang akon mga tawo kag sang bug-os nga Israel. Mag-upod ka sa akon pabalik agod makasimba ako sa Ginoo nga imo Dios.” 31Gani si Samuel nag-upod sa iya pabalik, kag si Saul nagsimba sa Ginoo.
32Nagmando si Samuel, “Dalha diri si Haring Agag sa akon.” Si Agag nagpalapit nga nahadlok kag nagakurog, nga naghunahuna sa iya kaugalingon, “Daw ano kapait ang mapatay!”#15:32 nahadlok kag nagakurog…mapatay: ukonmay pagsalig nga naghunahuna sa iya kaugalingon, “Sigurado hilway na ako sa kapait sang kamatayon!” 33Si Samuel nagsiling, “Subong nga ang imo espada nagkuha sa mga babayi sang ila mga bata, amo man karon ang imo iloy manginwala sing bata.” Kag ginhatukhatok niya si Agag sa atubangan sang altar sa Gilgal.
34Dayon si Samuel nagkadto sa Rama, kag si Haring Saul nagpauli sa iya balay sa Gebeat. 35Tubtob sang pagkapatay ni Samuel wala na gid sia magpakigkita sa hari, pero nagpangasubo gid sia nahanungod kay Saul, kay ang Ginoo nagkasubo nga ginhimo niya si Saul nga hari sang Israel.
Currently Selected:
1 Samuel 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
