1 Mga Hari 8
8
Ang Kaban sang Kasugtanan Gindala sa Templo
(2 Cron. 5:2–6:2)
1Dayon#2 Sam. 6:12-16; 1 Cron. 15:25-29. ginpatawag ni Haring Solomon ang tanan nga mga pangulo sang mga tribo kag mga kabarangayan sang Israel sa pagkadto sa iya sa Jerusalem agod sa pagkuha sang Kaban sang Kasugtanan sang Ginoo sa Sion, ang Siudad ni David, agod dalhon ini sa Templo. 2Nagtipon#Lev. 23:34. sila tanan sing tingob sa Piesta sang mga Palasilungan sa bulan sang Etanim, ang ikapito nga bulan. 3Sang makatipon ang tanan nga mga pangulo, ang mga pari nagkuha sang Kaban sang Kasugtanan, 4kag sa bulig sang mga Levita gindala ini, upod ang Tolda sang presensya sang Ginoo kag ang tanan nga mga kagamitan sini, pakadto sa Templo. 5Si Haring Solomon kag ang tanan nga mga tawo sang Israel nagtipon sa atubangan sang Kaban sang Kasugtanan kag naghalad sang indi maisip nga kadamuon sang mga karnero kag mga baka. 6Dayon ang mga pari nagdala sang Kaban sang Kasugtanan pakadto sa Templo kag ginbutang ini sa Labing Balaan nga Duog, sa idalom sang mga pakpak sang mga kerubin. 7Ang ila mga pakpak nga nagahumlad nagatabon sang Kaban sang Kasugtanan kag sang mga yayungan sini. 8Ang mga yayungan tama kalaba nga ang mga punta sini makita kon ang tawo magtindog sa atubangan sang Labing Balaan nga Duog pero indi ini makita kon ang tawo magtindog sa gwa. Ini nga mga yayungan yadto pa didto tubtob sa sini nga adlaw. 9Wala#Deut. 10:5. sing iban nga sulod ang Kaban sang Kasugtanan luas sang duha ka mga lapida nga bato nga ginbutang ni Moises didto sa Bukid sang Sinai, sang ang Ginoo naghimo sing kasugtanan sa mga tawo sang Israel sang nagapagwa sila halin sa Ehipto.
10Sang#Exo. 40:34-35. makagwa ang mga pari sa Balaan nga Duog, sa hinali ang Templo napuno sang panganod 11nga nagabanaag ang kasanag sang presensya sang Ginoo kag indi na sila makabalik sa sulod sa paghimo sang ila mga katungdanan. 12Dayon#Sal. 18:11; 97:2. si Solomon nagpangamuyo:
“Ikaw, O Ginoo, nagbutang sang adlaw sa langit,
pero ginpili mo ang pag-estar sa madamol nga mga gal-om.
13Karon nagpatindog ako sing harianon nga templo para sa imo,
isa ka lugar nga imo pagaestaran sa walay katubtoban.”
Si Solomon Naghambal sa mga Tawo
(2 Cron. 6:3-11)
14Samtang ang mga tawo nagtindog didto, si Haring Solomon nagliso kag nag-atubang sa ila kag nagpangamuyo sia sa Dios nga pagabendisyunan sila. 15Nagsiling sia, “Dayawon ang Ginoo nga Dios sang Israel! Gintuman niya ang iya ginsaad sa akon amay nga si David sang ginsingganan niya sia, 16‘Halin#2 Sam. 7:4-11; 1 Cron. 17:3-10. sang pagpagwa ko sang akon mga tawo nga Israelinhon sa Ehipto, wala ako magpili sing siudad sa bug-os nga duta sang Israel nga pagapatindugan sang templo sa diin ako pagasimbahon. Pero ginpili ko ikaw, David, subong nga pangulo sang akon mga tawo.’”
17Kag#2 Sam. 7:1-3; 1 Cron. 17:1-2. si Solomon nagsiling pa gid, “Ang akon amay nga si David luyag magpatindog sang templo para pagasimbahon ang Ginoo nga Dios sang Israel, 18pero ang Ginoo nagsiling sa iya, ‘Husto ang imo handom sa pagpatindog sang Templo para sa akon, 19pero#2 Sam. 7:12-13; 1 Cron. 17:11-12. indi ikaw kundi ang imo anak nga lalaki amo ang magapatindog sang akon templo.’
20“Kag karon ang Ginoo nagtuman sang iya saad: ako ang nagbulos sa akon amay nga si David subong hari sang Israel, kag napatindog ko ang Templo para pagasimbahon ang Ginoo nga Dios sang Israel. 21Naghanda man ako sing lugar sa Templo para sa Kaban sang Kasugtanan nga ginasudlan sang mga lapida nga bato sang kasugtanan nga ginhimo sang Ginoo sa aton mga katigulangan sang gindala niya sila pa gwa sa Ehipto.”
Ang Pangamuyo ni Solomon
(2 Cron. 6:12-42)
22Dayon sa atubang sang mga tawo, si Solomon nagkadto kag nagtindog sa atubangan sang altar. Ginbayaw niya ang iya mga kamot 23kag nagpangamuyo, “Ginoo nga Dios sang Israel, wala sing dios nga kaangay mo sa langit ukon sa duta. Matutom ka sa imo kasugtanan sa imo mga tawo, kag nagapakita sang imo mapinadayunon nga paghigugma sa ila nga nagakabuhi sing matinumanon sa imo sa bug-os nila nga tagipusoon. 24Gintuman mo ang imo ginsaad sa akon amay nga si David nga imo alagad, kag karon nga adlaw gintuman mo ang imo ginsiling sa iya. 25Kag#1 Hari 2:4. karon, Ginoo nga Dios sang Israel, nagapangamuyo ako nga imo man tumanon ang isa mo pa ka saad sa akon amay nga si David sang ginsingganan mo sia, ‘Hatagan ko ikaw sa gihapon sing kaliwat nga magabulos sa imo subong nga hari sa Israel, kon ang imo mga kaliwat magamatutom lamang sa pagtuman sa akon pareho sa imo.’ 26Gani karon nagapangamuyo ako, O Dios sang Israel, nga imo tumanon ang tanan nga imo ginsaad sa akon amay nga si David nga imo alagad.
27“Pero#2 Cron. 2:6. makaestar ka gid bala, O Dios sa duta? Bisan gani ang bug-os nga langit indi tuman kadako nga makaigo ikaw, gani ano ang pagkaigo mo sa sini nga Templo nga akon ginpatindog? 28Wala sapayan sini, pamatii ang akon pangamuyo kag mga pangabay sa sini nga adlaw, O Ginoo nga akon Dios, ako ang imo alagad. 29Bantayi#Deut. 12:11. ini nga Templo sa adlaw kag gab-i, ining lugar nga imo ginpili sa diin pagasimbahon ikaw. Pamatii ako sa nagapangamuyo ako nga nagaatubang sa sini nga Templo. 30Pamatii ang akon mga pangamuyo kag ang mga pangamuyo sang imo mga tawo kon mag-atubang sila sa sini nga lugar kag magpangamuyo. Sa imo balay sa langit, pamatii kag patawara kami.
31“Kon ang isa ka tawo ginsumbong nga nakahalit sa isa ka tawo kag gindala sia sa imo altar sa sini nga Templo sa pagsumpa nga wala sia sing sala, 32O Ginoo, magpamati ka sa langit kag hukmi ang imo mga alagad. Siluti ang nakasala suno sa nagakabagay sa iya, kag hilwaya ang wala sing sala.
33“Kon ang imo mga tawo nga Israelinhon malutos sang ila mga kaaway tungod kay nagpakasala sila batok sa imo, kag dayon magahinulsol sila kag magbalik sa imo, kag magpangamuyo sa sini nga templo nga patawaron sila, 34pamatii sila sa langit. Patawara ang mga sala sang imo mga tawo, kag dalha sila pabalik sa duta nga imo ginhatag sa ila mga katigulangan.
35“Kon ang imo mga tawo magpakasala batok sa imo kag indi ikaw magpadala sing ulan sa ila, kag dayon kon maghinulsol sila kag mag-atubang sa sini nga Templo, kag magpangamuyo sa imo nga may pagpaubos, 36pamatii sila sa langit. Patawara ang mga sala sang hari kag sang mga tawo sang Israel. Tudloi sila sang matarong nga pagkabuhi, kag O Ginoo, padalhi sing ulan ang imo duta nga imo ginhatag sa imo mga tawo subong ila panublion nga walay katubtoban.
37“Kon may gutom sa duta, ukon pamalatian, ukon ang mga tanom nalaya sang mainit nga hangin, ukon pagdagsa sang madamo nga apan, ukon ang imo mga tawo ginasalakay sang ila mga kaaway, ukon may makamamatay nga pamalatian sa ila, 38pamatii ang ila mga pangamuyo. Kon ang imo mga katawhan nga Israelinhon tungod sang ila kasubo, magbayaw sang ila mga kamot sa pagpangamuyo nga nagaatubang sa sini nga Templo, 39pamatii ang ila pangamuyo. Pamatii sila sa imo balay sa langit, patawara kag buligi sila. Ikaw lamang ang nakahibalo sang mga panghunahuna sang tanan nga mga tawo. Himua sa tagsa ka tawo ang nagakabagay sa iya, 40agod ang imo mga tawo magtuman sa imo sa bug-os nga tion nga sila nagaestar sa duta nga imo ginhatag sa amon mga katigulangan.
41-42“Kon ang isa ka dumoluong nga nagaestar sa malayo nga duta makabati sang imo pagkabantog, kag sang dalagku nga mga butang nga imo ginhimo sa imo mga tawo, kag mag-abot sia sa pagsimba sa imo kag sa pagpangamuyo sa sini nga Templo, 43pamatii ang iya pangamuyo. Pamatii sia sa langit sa diin ikaw nagaestar, kag himua ang ginapangayo niya sa imo, agod ang tanan nga mga katawhan sa kalibutan makakilala kag magatuman sa imo, pareho sang imo mga tawo nga Israelinhon kag sila makahibalo nga ining Templo nga akon ginpatindog amo ang lugar sa diin ikaw pagsimbahon.
44“Kon magsugo ikaw sa imo mga tawo sa pagpakig-away batok sa ila mga kaaway, kag magapangamuyo sila sa imo nga nagaatubang sa sini nga siudad nga imo ginpili, kag sa sini nga Templo, nga akon ginpatindog sa imo, 45pamatii ang ila mga pangamuyo. Pamatii sila sa langit kag padauga sila.
46“Kon ang imo mga tawo magpakasala batok sa imo—kag wala gid sing bisan isa nga wala nagapakasala—kag sa imo kaakig ginpalutos nimo sila sa ila mga kaaway kag ginpadala sila subong nga mga bihag sa iban nga duta, bisan daw ano kalayo, 47pamatii ang mga pangamuyo sang imo mga tawo. Kon didto sa sadto nga duta maghinulsol sila kag magpangamuyo sa imo nga nagatuad sang ila pagkamakasasala kag pagkamalaut, pamatii ang ila mga pangamuyo, O Ginoo. 48Kon sa sina nga duta magahinulsol sila sing maminatud-on, kag magapangamuyo sila sa imo sa nagaatubang sila sa sini nga duta nga imo ginhatag sa amon mga katigulangan, sa sini nga siudad nga imo ginpili, kag sa sini nga Templo nga akon ginpatindog sa imo, 49dayon pamatii ang ila mga pangamuyo. Pamatii sila sa imo balay sa langit, kag magmaluloy-on ka sa ila. 50Patawara ang tanan nila nga mga sala kag ang ila pagbato sa imo, kag himua nga ang ila mga kaaway magkaluoy sa ila. 51Kaugalingon mo sila nga mga tawo nga gindala mo pa gwa sa Ehipto, inang nagadabadaba nga horno.
52“O Ginoo nga Gamhanan, kabay nga magmaayo ka sa gihapon sa imo mga tawo nga Israelinhon kag sa ila hari, kag pamatii ang ila pangamuyo, kon magpangayo sila sa imo sing bulig. 53Ginpili mo sila gikan sa mga katawhan agod mangin-imo mga tawo, suno sa imo ginsiling sa ila paagi sa imo alagad nga si Moises, sang gindala mo ang amon mga katigulangan pa gwa sa Ehipto.”
Ang Katapusan nga Pangamuyo
54Sa tapos si Solomon makapangamuyo sa Ginoo, nagtindog sia sa atubangan sang altar, sa diin nagluhod sia nga nagabayaw sang iya mga kamot. 55Sa mabaskog nga tingog nagpangabay sia sa Ginoo nga bendisyunan ang tanan nga mga tawo nga nagatipon didto. Siling niya, 56“Dayawon#Deut. 12:10; Jos. 21:44-45. ang Ginoo nga naghatag sa iya mga tawo sing kalinong suno sa iya ginsaad. Gintuman niya sing may kaalwan ang tanan niya nga mga saad nga iya ginsiling paagi sa iya alagad nga si Moises. 57Kabay ang Ginoo nga aton Dios mag-upod sa aton subong sang iya pag-upod sa aton mga katigulangan, kabay nga indi gid niya kita pagbayaan ukon pagpatumbayaan. 58Kabay nga himuon niya kita nga magmatinumanon sa iya, agod nga magkabuhi kita sa gihapon suno sa luyag niya, kag tumanon ta ang tanan nga mga kasugoan kag mga sugo nga iya ginhatag sa aton mga katigulangan. 59Kabay nga ang Ginoo nga aton Dios magdumdom sa tanan nga tion sini nga pangamuyo kag mga pag-ampo nga akon ginpangayo sa iya. Kabay nga magmaluloy-on sia sa gihapon sa mga tawo sang Israel kag sa ila hari, suno sa ila kinahanglanon adlaw-adlaw. 60Tungod sini ang tanan nga mga pungsod sa kalibutan makahibalo nga ang Ginoo lamang amo ang Dios kag wala na sing iban. 61Kabay nga kamo nga iya mga tawo, magmatutom sa gihapon sa Ginoo nga aton Dios, nga nagatuman sang tanan niya nga mga kasugoan kag sugo, subong sang inyo ginahimo karon nga adlaw.”
Ang Paghalad sang Templo
(2 Cron. 7:4-10)
62Dayon si Haring Solomon kag ang tanan nga mga tawo didto nagdulot sing mga halad sa Ginoo. 63Naghalad sia sing 22,000 ka mga baka kag 120,000 ka mga karnero subong mga halad sa paghiambit. Gani ang hari kag ang tanan nga mga tawo naghalad sang Templo. 64Sa amo nga adlaw ginhalad man niya ang natunga nga pasiyuhan sa atubangan sang Templo, sa diin naghalad sia sing mga sapat nga ginsunog sing bug-os sa altar, ang mga halad nga kalan-on, kag ang sibo sang mga sapat para sa mga halad sa paghiambit. Ginhimo niya ini tungod kay ang altar nga bronsi sa pasiyuhan sang Templo tama ka diutay para sa sini tanan nga mga halad.
65Dayon didto sa Templo si Solomon kag ang tanan nga mga tawo sang Israel, isa ka daku nga katilingban, halin sa Alagyan sa Hamat sa aminhan tubtob sa dulonan sang Ehipto, sa bagatnan nagsaulog sang Piesta sang mga Palasilungan sa sulod sang pito#8:65 Ang isa ka dumaan nga pagbadbadpito; sa Hebreokatorse. ka adlaw. 66Sa ikawalo nga adlaw ginpapauli ni Solomon ang mga tawo. Tanan sila nagdayaw sa iya, kag nagpauli sila nga malipayon tungod sang tanan nga maayo nga mga butang nga ginhatag sang Ginoo sa iya alagad nga si David kag sa iya mga tawo nga Israelinhon.
Currently Selected:
1 Mga Hari 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
