1 Mga Taga-Corinto 9
9
Mga Kinamatarong kag mga Katungdanan sang Isa ka Apostol
1Indi bala ako isa ka hilway nga tawo? Indi bala ako isa ka apostol? Wala ko bala makita si Jesus nga aton Ginoo? Indi bala kamo bunga sang akon pagpangabudlay sa Ginoo? 2Bisan nga ang iban wala nagakilala sa akon nga isa ka apostol, pero kamo iya nagakilala nga ako isa ka apostol. Tungod kay ang inyo kabuhi nahiusa sa Ginoo, kamo mismo nagapamatuod nga ako isa ka apostol.
3Ang akon pangapin sa mga nagausisa sa akon amo ini: 4Wala bala ako sing kinamatarong nga pagahatagan sang pagkaon kag ilimnon tungod sang akon pagpangabudlay? 5Wala bala ako sing kinamatarong sa pagdala sing tumoluo nga asawa sa akon mga pagpanglakaton, subong sang ginahimo sang mga utod sang Ginoo, kag ni Pedro kag sang iban nga mga apostoles? 6Ukon kami lang bala ni Bernabe ang dapat magpangabudlay para sa amon palangabuhian? 7May soldado bala nga sia ang nagabayad sang kagastohanan sang iya pag-alagad sa banwa? May mangungoma bala nga nagatanom sang ubas kag wala nagakaon sang iya bunga? May manugbantay bala sang mga karnero nga wala nagapulos sang gatas sang iya mga karnero?
8Wala ako nagasalig sa tawhanon lang nga panghunahuna, kay amo man ini ang ginasiling sang Kasugoan. 9Nasulat#Deut. 25:4; 1 Tim. 5:18. sa Kasugoan ni Moises ang masunod, “Indi pagbusali ang baka kon ini nagalinas sang inani.” Karon, nahanungod bala sa baka ang ginahambal sang Dios? 10Indi bala kita man ang iya ginapatungdan sang pagsiling niya sini? Matuod gid nga ginsulat ini para sa aton! Ang tawo nga nagaarado kag ang tawo nga nagaani, nagaobra nga nagalaom nga may parti sila sang patubas. 11Nakapanggas#Rom. 15:27. kami sing espirituhanon nga binhi sa inyo. Sobra gid bala kon mag-ani kami sa inyo sang mga butang nga kinahanglanon sang amon lawas? 12Kon ang iban may kinamatarong sa pagpaabot sini sa inyo, indi bala nga kami may mas labaw pa nga kinamatarong?
Pero wala kami maghimulos sini nga kinamatarong. Sa baylo, ginbatas namon ang tanan, agod indi namon masablagan ang pagwali sang Maayong Balita nahanungod kay Cristo. 13Nakahibalo#Deut. 18:1. gid kamo nga ang mga tawo nga nagaalagad sa Templo nagakuha sang ila pangabuhian sa Templo, kag ang mga nagaalagad sa altar may bahin sang mga ginhalad sa altar. 14Sa#Mat. 10:10; Luc. 10:7. amo man nga bagay, ang Ginoo nagsugo nga ang mga nagawali sang Maayong Balita dapat magkuha sang ila pangabuhian halin sa pagwali sang Maayong Balita.
15Pero wala ako maghimulos sini nga mga kinamatarong, kag wala man ako nagasulat sini agod sa pagpangayo sang akon mga kinamatarong. Kay mas maayo pa nga mapatay ako, sang sa kuhaon sang iban ang akon kinamatarong sa pagpabugal! 16Wala ako sing kinamatarong sa pagpabugal tungod kay nagawali ako sang Maayong Balita. Kon sa bagay, ginmanduan ako sa pagwali sang Maayong Balita. Makaluluoy man ako kon indi ko pag-iwali ang Maayong Balita! 17Kon ang pagwali ginahimo ko sa akon lamang luyag, ti magapaabot ako sing suhol. Pero ginahimo ko ini subong isa ka katungdanan tungod kay ini nga hilikuton gintugyan sa akon sang Dios. 18Karon, ano ang akon suhol? Ang akon suhol amo ang kahigayunan sang pagwali sang Maayong Balita nga wala nagapabayad kag wala ako nagagamit sang akon mga kinamatarong, sa akon pagpangabudlay para sa Maayong Balita.
19Hilway ako nga tawo kag indi ulipon ni bisan sin-o. Pero ginahimo ko ang akon kaugalingon nga ulipon sang tanan, agod madamo nga mga tawo ang madala ko sa Ginoo. 20Kon nagapangabudlay ako kaupod sa mga Judio, nagagawi ako subong isa ka Judio, agod madala ko sila sa Ginoo. Kag bisan nga ako akon wala masakop sang Kasugoan ni Moises, sa akon pagpangabudlay sa ila nga nasakop sang Kasugoan, nagagawi ako subong sa ila, agod madala ko sila sa Ginoo. 21Sa amo man nga bagay, kon nagapangabudlay ako upod sa mga Hentil, nagagawi ako kasubong sang isa ka Hentil nga wala masakop sa Kasugoan sang mga Judio, agod madala ko sila sa Ginoo. Ini wala nagakahulogan nga wala ko ginatuman ang kasugoan sang Dios, kay sa pagkamatuod gid, nasakop ako sang kasugoan ni Cristo. 22Sa mga maluya sing pagtuo nanginkasubong ako sa isa sa ila, agod madala ko sila sa Ginoo. Gani, nagapakigbagay ako sa mga kahimtangan sang tanan nga sahi sang mga tawo, agod nga maluwas ko ang iban sa ila bisan sa ano nga paagi.
23Ginahimo ko ini tanan tungod sa Maayong Balita, agod nga makaambit man ako sang mga kaayuhan sini. 24Nakahibalo gid kamo nga sa palumba, nagaentra ang madamo nga mga manugdalagan, pero isa lang sa ila ang makabaton sing premyo. Gani magdalagan kamo agod nga makuha ninyo ang premyo. 25Ang#Klm. Sol. 4:2; 5:16. tagsa ka humalampang nga nagahanas, nagasunod sing maid-id sang mga tulomanon, agod makoronahan sia sang korona nga umalagi lamang. Pero kita aton nagahimo sini, agod makaangkon sang korona nga nagapadayon. 26Amo ina nga nagadalagan ako sing tadlong padulong sa ginatapusan sang palumba, kag amo man ina nga kasubong ako sang boksidor nga wala nagasumbag sang hangin. 27Ginapaanad ko ang akon lawas sa mga sumbag kag ginadisiplina ko ini, kay basi sa tapos ako makaagda sa iban sa palumba ako akon sikwayon.
Currently Selected:
1 Mga Taga-Corinto 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
