1 Mga Cronica 23
23
1Sang#1 Hari 1:1-40. tigulang na gid kaayo si David, ginhimo niya ang iya anak nga si Solomon nga hari sang Israel.
Ang Bulohaton sang mga Levita
2Gintipon sing tingob ni Haring David ang tanan nga mga pangulo sang Israel kag ang tanan nga mga pari kag mga Levita. 3Ginpaisip niya ang tanan nga mga Levita nga lalaki nga nagaedad halin sa traynta ka tuig paibabaw. Ang bug-os nila nga kadamuon 38,000. 4Ang 24,000 sa ila iya ginpadumala sang mga bulohaton sa Templo, kag ang 6,000 sa pagtago sang mga papeles kag sa paghukom. 5Ginhimo niya ang 4,000 nga gwardya, kag ang 4,000 sa pagdayaw sa Ginoo paagi sa mga instrumento sa musika nga iya ginpahimo para sa sini nga tinutuyo.
6Gingrupo ni David ang mga Levita sa tatlo ka bahin, suno sa mga kabarangayan nanday Gersom, Kohat, kag Merari.
7Si Gersom may duha ka mga anak nga amo sanday Ladan kag Simei. 8Si Ladan may tatlo ka mga anak nga amo sanday Jehiel, Zetam, kag Joel, 9nga mga pangulo sang mga kabarangayan nga mga kaliwat ni Ladan. Si Simei may tatlo ka mga anak nga amo sanday Selomit, Haziel, kag Haran. 10-11Si Simei may apat ka mga anak nga amo sanday Jahat, Zina, Jeus, kag Berias, halin sa kamagulangan pakadto sa kamanghuran. Si Jeus kag si Berias wala sing madamo nga mga kaliwat, gani gin-isip sila nga isa lang ka barangay.
12Si Kohat may apat ka mga anak nga amo sanday Amram, Izar, Hebron, kag Uziel, 13kag#Exo. 28:1. ang iya panganay nga anak nga si Amram amo ang amay ni Aaron kag ni Moises. Si Aaron kag ang iya mga kaliwat ginpain nga pagatugyanan sa walay katubtoban sang balaan nga mga butang, sa pagsunog sang insyenso sa pagsimba sa Ginoo, sa pag-alagad sa iya, kag sa pagbendisyon sa mga tawo sa iya ngalan. 14Pero ang mga anak ni Moises, ang tawo sang Dios, gin-isip subong mga katapo sang mga Levita. 15May duha sia ka mga anak nga amo sanday Gersom kag Eliezer. 16Ang pangulo sang mga anak ni Gersom amo si Sebuel. 17Si Eliezer may isa lamang ka anak nga amo si Rehabias, pero si Rehabias may madamo nga mga kaliwat.
18Ang ikaduha nga anak ni Kohat nga si Izar, may anak nga si Selomit, ang pangulo sang barangay. 19Ang ikatlo nga anak ni Kohat nga si Hebron, may apat ka mga anak nga amo sanday Jerias, Amarias, Jahaziel, kag Jecameam. 20Ang ikap-at nga anak ni Kohat nga si Uziel, may duha ka mga anak nga lalaki nga amo sanday Mica kag Isias.
21Si Merari may duha ka mga anak nga amo sanday Mali kag Musi. Si Mali may duha man ka anak nga amo sanday Eleazar kag Kis, 22pero si Eleazar napatay nga wala sing anak nga lalaki, kundi mga babayi lang. Ang iya mga anak nga babayi nagpamana sang ila mga pakaisa, nga mga anak ni Kis. 23Ang ikaduha nga anak ni Merari nga si Musi may tatlo ka mga anak nga amo sanday Mali, Eder, kag Jeremot.
24Amo ini ang mga kaliwat ni Levi, suno sa mga kabarangayan kag mga panimalay, nga ginlista sa tagsa nila ka ngalan. Ang tagsa niya ka kaliwat nga nagaedad sing baynte ka tuig paibabaw, may bahin sa bulohaton sa Templo sang Ginoo.
25Si David nagsiling, “Ang Ginoo nga Dios sang Israel naghatag sing kalinong sa iya mga tawo, kag sia gid magaestar sa Jerusalem sa walay katubtoban. 26Karon#Deut. 10:8. wala na sing kinahanglan para sa mga Levita ang pagdala sang Tolda sang presensya sang Ginoo kag sang tanan nga mga gamit sa pagsimba.” 27Tungod sining katapusan nga mga ginhambal ni David, ang tanan nga mga Levita ginlista sa pag-alagad kon makaabot sila sa edad nga baynte ka tuig. 28Ang#Num. 3:5-9. ila mga katungdanan amo ang pagbulig sa mga pari nga mga kaliwat ni Aaron sa mga bulohaton sa pagsimba sa Dios sa Templo, sa pagtinlo sang mga pasiyuhan kag mga kwarto sang Templo, kag sa pagtipig nga indi madagtaan ang tagsa ka butang nga balaan. 29Sila ang gintugyanan sang tinapay nga nahalad sa Dios, sang harina nga ginagamit nga mga dulot, sang manipis nga mga tinapay nga wala sing lebadora, sang mga tinapay nga naluto sa horno, kag sang harina nga nasamuan sing lana sang olivo. Sila man ang gintugyanan sa pagtimbang kag pagsukob sang mga dulot sa Templo. 30Dapat sila magdayaw kag magpasidungog sa Ginoo sa tagsa ka aga kag tagsa ka gab-i, 31kag kon may mga halad nga sinunog sa Ginoo sa Adlaw nga Inugpahuway, sa Piesta sang Lati, kag sa iban nga mga piesta. May mga pagsulondan kon pila ka mga Levita ang magahimo sini nga obra sa tagsa ka tion sang ila turno. Ang ila katungdanan sa tanan nga tion amo ang pagsimba sa Ginoo. 32Sila ang gintugyanan sa pagtatap sang Tolda sang presensya sang Ginoo, kag sang Templo, kag sa pagbulig sa ila mga pariente, ang mga pari nga kaliwat ni Aaron, sa ila pagsimba sa Dios sa Templo.
Currently Selected:
1 Mga Cronica 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
