1 Mga Cronica 18
18
Ang mga Pagdaog ni David sa Inaway
(2 Sam. 8:1-18)
1Sang ulihi ginsalakay liwat ni David ang mga Filistinhon kag ginlutos sila. Gin-agaw niya ang siudad sang Gat kag ang iya mga kabarangayan sa palibot gikan sa ila paggahom. 2Iya man ginlutos ang mga Moabnon, kag nangin-iya sila mga sakop nga nagabayad sing mga buhis sa iya.
3Dayon, ginsalakay ni David si Haring Hadadezer sang Soba, malapit sa kadutaan sang Hamat, tungod kay si Hadadezer nagtinguha sa paggahom sang kadutaan sa naibabaw nga bahin sang Suba sang Eufrates. 4Gin-agaw ni David ang iya 1,000 nga mga karwahi, gindakop man niya ang 7,000 ka mga soldado nga nagasakay sa kabayo, kag 20,000 ka mga soldado nga nagalakat lang. Nagbilin sia sing mga kabayo nga para sa 100 ka mga karwahi kag ginpamiang niya ang iban.
5Sang ang mga Sirianhon sang Damasco nagpadala sing hangaway sa pagbulig kay Haring Hadadezer, ginsalakay sila ni David kag ginpamatay ang 22,000 ka mga soldado. 6Dayon nagpatindog sia sang mga kampo para sa mga hangaway sa ila duta, kag nanginsakop niya sila nga nagabayad sing mga buhis sa iya. Ginpadaog sang Ginoo si David bisan diin sia magkadto. 7Gin-agaw ni David ang mga taming nga bulawan nga ginadala sang mga opisyales ni Hadadezer kag gindala niya ini sa Jerusalem. 8Nagkuha#1 Hari 7:40-47; 2 Cron. 4:11-18. man sia sing madamo nga bronsi halin sa mga siudad sang Tibha kag Cun nga gingamhan ni Haring Hadadezer. Sang ulihi gingamit ni Solomon ini nga bronsi sa paghimo sing daku nga kawa, mga haligi, kag mga gamit nga bronsi para sa Templo.
9Si Haring Toi sang Hamat nakabati nga si David naglutos sang bug-os nga hangaway ni Hadadezer. 10Gani ginpadala niya ang iya anak nga si Joram sa pag-abiabi sa kay Haring David kag sa pagpanginbulahan sa iya tungod sang iya pagdaog batok kay Hadadezer, nga nag-away kay Toi sa madamo nga beses. Si Joram nagdala sa kay David sing mga regalo nga nahimo sa bulawan, pilak, kag bronsi. 11Ginhalad ini ni Haring David agod gamiton sa pagsimba, lakip ang mga pilak kag bulawan nga iya ginkuha sa mga pungsod nga iya ginpangdaog nga amo ang masunod: Edom, Moab, Amon, Filistia, kag Amalek.
12Si#Sal. 60 Titulo. Abisai nga ang iya iloy amo si Seruya, naglutos sang mga taga-Edom sa Kapatagan sang Asin kag nagpamatay sang 18,000 sa ila. 13Naghimo sia sing mga kampo para sa mga hangaway sa bug-os nga Edom, kag ang mga tawo didto nanginsakop ni Haring David. Ang Ginoo nagpadaog kay David bisan diin sia magkadto.
14Si David naggahom sa bug-os nga Israel kag ginpat-od niya nga ang iya mga sakop ginatratar sing nagakaigo kag matarong. 15Si Joab nga utod ni Abisai amo ang pangulo sang mga hangaway. Si Josafat nga anak ni Ahilud amo ang gintugyanan sang maragtas. 16Si Sadoc nga anak ni Ahitub kag si Abimelec nga anak ni Abiatar amo ang mga pari. Si Seraya#18:16 Seraya: (Tan-awa ang 2 Sam. 8:17); sa HebreoSavsa. amo ang sekretaryo sang korte. 17Si Benaya nga anak ni Joiada amo ang pangulo sang mga gwardya ni David. Ini nga mga gwardya mga Keretnon kag mga Peletnon. Ang mga anak ni Haring David may mataas nga mga palangakuan sa iya ginharian.
Currently Selected:
1 Mga Cronica 18: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
