1 Mga Cronica 17
17
Ang Mensahe ni Natan kay David
(2 Sam. 7:1-17)
1Karon si Haring David nagaestar na sa iya palasyo. Isa ka adlaw ginpatawag niya si Natan nga propeta kag ginsingganan, “Yari ako nagaestar sa balay nga nahimo sa kahoy nga sedro, pero ang Kaban sang Kasugtanan sang Ginoo yara lang sa isa ka tolda!”
2Si Natan nagsabat, “Himua ang yara sa imo hunahuna, tungod kay ang Dios nagaupod sa imo.”
3Pero sadto nga gab-i ang Dios nagsugo kay Natan, 4“Lakat kag singgana ang akon alagad nga si David nga ako nagasiling sa iya, ‘Indi ikaw ang magapatindog sang templo nga akon pagaestaran. 5Halin sang pagluwas ko sang mga Israelinhon gikan sa Ehipto tubtob karon, wala gid ako makaestar sa templo, kundi nag-estar ako sa mga tolda, kag naghalin sa isa ka lugar pakadto sa isa. 6Sa akon pagpanglakaton upod sa mga tawo sang Israel wala gid ako magreklamo sa kay bisan sin-o nga mga pangulo nga akon ginpili, kon ngaa man wala nila ako ginpatindugi sing isa ka templo nga nahimo sa kahoy nga sedro.’
7“Gani karon, singgana ang akon alagad nga si David nga ako, ang Ginoo sang mga hangaway, nagasiling sa iya, ‘Ginkuha ko ikaw gikan sa pagbantay sang mga karnero sa mga palahalban kag ginhimo ko ikaw nga pangulo sang akon mga tawo nga Israelinhon. 8Nag-upod ako sa imo bisan diin ikaw nagkadto, kag ginlutos ko ang tanan mo nga mga kaaway samtang ikaw nagasalakay. Himuon ko ikaw nga pareho ka bantog sang labing gamhanan nga mga pangulo sa kalibutan. 9-10Nagpili ako sing isa ka lugar para sa akon mga tawo nga Israel kag ginpaestar ko sila didto, sa diin magaestar sila nga wala na sing magapigos sa ila. Halin sang ila pag-abot sa sini nga duta, masami sila ginasalakay sang mapintas nga mga tawo, pero indi na ini matabo liwat. Nagasaad ako nga lutoson ko ang tanan mo nga mga kaaway, kag hatagan ko kamo sing mga kaliwat. 11Kon mapatay ka kag ilubong upod sa imo mga katigulangan, himuon ko nga hari ang isa sang imo mga anak, kag pabakuron ko ang iya ginharian. 12Magapatindog sia sing templo para sa akon kag pat-uron ko nga magapadayon ang iya ginharian sa walay katubtoban. 13Ako#2 Cor. 6:18; Heb. 1:5. mangin-iya amay kag sia mangin-akon anak. Indi ko sia pagbayaan subong sang akon pagbiya kay Saul, nga akon ginsikway agod ikaw manginhari. 14Himuon ko sia nga pangulo sang akon mga tawo kag sang akon ginharian sa walay katubtoban. Ang iya ginharian manginwalay katapusan.’”
15Ginsugiran ni Natan si David sang tanan nga ginpahayag sang Dios sa iya.
Ang Pangamuyo sang Pagpasalamat ni David
(2 Sam. 7:18-29)
16Si David nagsulod sa Tolda sang presensya sang Ginoo, nagpungko, kag nagpangamuyo, “Indi ako takos sang imo ginhimo para sa akon kag sa akon panimalay, O Ginoong Dios! 17Wala sapayan ginahimo mo ang sobra pa, nagsaad ikaw nahanungod sa akon mga kaliwat sa palaabuton nga mga tinuig, kag ikaw, O Ginoong Dios, nagakabig na sa akon nga kaangay sang isa ka gamhanan nga tawo. 18Ano pa bala ang akon sarang masiling sa imo! Kilala mo gid ako, wala sapayan sini, ginapasidunggan pa nimo ako nga imo alagad. 19Imo kabubot-on kag tinutuyo ang paghimo sini sa akon kag sa pagpakita sa akon sang akon palaabuton nga pagkagamhanan. 20O Ginoo, wala na sing kaangay sa imo; ikaw lamang amo ang Dios, suno sa amon nahibaluan sa gihapon. 21Wala sing pungsod sa duta nga kaangay sa Israel, nga imo ginluwas halin sa pagkaulipon agod himuon mo sila nga imo mga tawo. Ang dalagku kag makatilingala nga mga butang nga imo ginhimo para sa ila nagpalapnag sang imo pagkabantog sa bug-os nga kalibutan. Ginluwas nimo ang imo mga tawo gikan sa Ehipto kag gintabog mo ang mga kapungsoran samtang nagaabanse ang imo mga tawo. 22Ginhimo mo ang Israel nga mangin-imo kaugalingon nga mga tawo sa walay katubtoban, kag ikaw, O Ginoo, nangin-ila Dios.
23“Kag karon, O Ginoo, tumana ang imo ginsaad nahanungod sa akon kag sa akon mga kaliwat kag himua ang imo ginsiling. 24Ang imo pagkabantog magalapnag, kag ang mga tawo magasiling sa walay katubtoban, ‘Ang Ginoo sang mga hangaway amo ang Dios sang Israel.’ Kag ikaw magapadayon sang akon ginharian paagi sa akon mga kaliwat sa walay katapusan. 25May kaisog ako sa pagpangamuyo sini sa imo, O Dios ko, tungod kay imo ini ginpahayag sa akon nga imo alagad, kag ginsingganan mo ako nga himuon mo nga mga hari ang akon mga kaliwat. 26Ikaw, O Ginoo, amo ang Dios, nagsaad ikaw sa akon sining maayo nga butang. 27Nagapangabay ako nga bendisyunan mo ang akon mga kaliwat agod magapadayon sila sa pag-agom sang imo kaayo. Ikaw, O Ginoo, nagbendisyon sa ila. Kabay pa nga bendisyunan mo sila sa walay katapusan.”
Currently Selected:
1 Mga Cronica 17: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
