1 Mga Cronica 14
14
Ang mga Ginhimo ni David sa Jerusalem
(2 Sam. 5:11-16)
1Si Hiram nga hari sang Tiro nagpadala sing mga tinawo kay David sa paghinun-anon tuhoy sa negosyo. Nagpadala man sia kay David sing mga troso nga sedro upod sa mga kantero kag mga panday sa pagpatindog sing palasyo. 2Kag nahibal-an ni David nga ang Ginoo nagpamat-od sa paghimo sa iya nga hari sang Israel, kag nagpauswag sang iya ginharian tungod sa mga tawo sang Israel.
3Didto sa Jerusalem, si David nakapangasawa pa gid sang madamo kag nagdamo ang iya mga anak nga lalaki kag babayi. 4Amo ini ang mga ngalan sang iya mga anak nga nagkalatawo sa Jerusalem: Samua, Sobab, Natan, Solomon, 5Ibhar, Elisua, Elpelet, 6Noga, Nefeg, Jafia, 7Elisama, Beeliada#14:7 BEELIADA: Ginatawag nga Eliada sa 3:8. kag Elifelet.
Ang Pagdaog sa mga Filistinhon
(2 Sam. 5:17-25)
8Sang pagkabati sang mga Filistinhon nga si David amo na ang hari sang bug-os nga pungsod sang Israel, ang ila mga hangaway naglakat sa pagdakop sa iya. Nabatian ini ni David kag naggwa sia sa pagsugata sa ila. 9Nag-abot ang mga Filistinhon sa Kapatagan sang Refaim kag nagsugod sa pagpanalakay. 10Nagpamangkot si David sa Dios, “Salakayon ko bala ang mga Filistinhon? Padag-on mo bala ako?”
Ang Ginoo nagsabat, “Sigi, salakaya, kay padag-on ko ikaw!”
11Gani ginsalakay sila ni David sa Baal-perazim kag ginlutos sila. Nagsiling sia, “Ang Dios naggamit sa akon sa pagbulwang sang mga kaaway kaangay sang isa ka baha.” Gani yadto nga lugar gintawag Baal-perazim.#14:11 BAAL-PERAZIM: Ini nga ngalan sa Hebreo nagakahulogan “Ginoo sang Pagbulwang”. 12Sang pagpalagyo sang mga Filistinhon, ila ginbayaan ang ila mga diosdios, kag nagmando si David nga sunogon ini.
13Sa wala madugay ang mga Filistinhon nagbalik sa kapatagan kag nagsugod sa pagpanalakay liwat. 14Sa liwat si David nagpamangkot sa Dios, kag ang Dios nagsabat, “Indi sila pagsalakaya sa atubangan, kundi maglibot ka kag salakaya sila sa pihak, malapit sa mga kahoy nga balsamo. 15Kon mabatian mo ang lapaklapak sang mga tiil sa ibabaw sang mga kahoy, magsalakay ka dayon, tungod kay ako magauna sa imo sa pagsalakay sang mga hangaway nga mga Filistinhon.” 16Gintuman ni David ang ginsugo sang Dios, kag gintabog ang mga Filistinhon pabalik sa Gabaon tubtob sa alagyan pakadto sa Gezer. 17Ang pagkabantog ni David naglapnag bisan diin, kag ginhimo sang Ginoo nga ang tagsa ka pungsod magkahadlok sa iya.
Currently Selected:
1 Mga Cronica 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
