1 Mga Cronica 13
13
Ang Kaban sang Kasugtanan Ginkuha sa Siudad sang Kiryat-jearim
(2 Sam. 6:1-11)
1Si Haring David nagpakigsapol sa tanan nga mga pangulo sang mga grupo sang tag-1,000 kag tag-100 ka mga tawo. 2Dayon nagpahibalo sia sa tanan nga mga tawo sang Israel nga nagtipon didto, “Kon luyag kamo kag kon amo ini ang kabubot-on sang Ginoo nga aton Dios, magpadala kita sing mga mensahero sa iban naton nga mga kasimanwa, kag sa mga pari kag mga Levita sa ila mga banwa, kag singganon sila sa pagtipon diri upod sa aton. 3Dayon malakat kita kag kuhaon naton ang Kaban sang Kasugtanan sang Dios nga ginpatumbayaan sang si Saul pa ang hari.” 4Naluyagan ini sang mga tawo, kag nagpasugot sila.
5Gani,#1 Sam. 7:1-2. gintipon ni David sing tingob ang mga tawo sang Israel gikan sa bug-os nga pungsod halin sa dulonan sang Ehipto sa nabagatnan pakadto sa Alagyan sang Hamat sa naaminhan. Nagtipon sila sa pagdala sang Kaban sang Kasugtanan halin sa siudad sang Kiryat-jearim pakadto sa Jerusalem. 6Si#Exo. 25:22. David kag ang mga tawo sang Israel nagkadto sa siudad sang Baala, nga amo ang siudad sang Kiryat-jearim, sa kadutaan sang Juda, sa pagkuha sang Kaban sang Kasugtanan sang Dios, nga nagarepresentar sang ngalan sang Ginoo nga ang iya trono yara sa ibabaw sang mga kerubin. 7Ginkuha nila sa balay ni Abinadab ang Kaban sang Kasugtanan kag ginbutang ini sa isa ka bag-o nga karo. Si Uza kag si Ahio nagpaguyod sang karo, 8samtang si David kag ang tanan nga mga tawo sang Israel nagsaot sa bug-os nila nga kusog sa pagpasidungog sa Dios. Nagkanta sila kag nagtukar sang mga arpa, mga bombo, mga platilyos, kag mga trumpeta.
9Sang makaabot sila sa linasan ni Quidon, nasandad ang baka, kag gindab-ot ni Uza ang Kaban sang Kasugtanan kag gin-uyatan. 10Sa gilayon naakig ang Ginoo kay Uza, kag ginpatay sia sang Ginoo, tungod kay gintandog niya ang Kaban sang Kasugtanan. Didto napatay sia sa atubang sang Dios. 11Naakig gid si David, tungod kay sa kaakig sang Ginoo iya ginsilutan si Uza. Gani, halin sadto gintawag yadto nga lugar nga Perez-uza.#13:11 PEREZ-UZA: Ini nga ngalan sa Hebreo nagakahulogan “Pagsilot kay Uza”.
12Dayon#2 Mac. 7:19. si David hinadlukan sa Dios kag nagsiling, “Karon, ano na lang ang pagdala ko pauli sang Kaban sang Kasugtanan?” 13Gani wala ini pagdalha ni David sa Jerusalem. Sa baylo, ginbilin niya ini sa balay sang isa ka tawo nga si Obed-edom, nga taga-siudad sang Gat. 14Nagpabilin#1 Cron. 26:4-5. ini didto sing tatlo ka bulan, kag ang Ginoo nagbendisyon sang panimalay ni Obed-edom kag sang tanan niya nga mga pagkabutang.
Currently Selected:
1 Mga Cronica 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
