1 Mga Cronica 10
10
Ang Pagkapatay ni Haring Saul
(1 Sam. 31:1-13)
1Ang mga Filistinhon nagpakig-away batok sa mga Israelinhon sa Bukid sang Gilboa. Madamo sang mga Israelinhon ang nagkalamatay didto, kag ang iban sa ila, lakip si Haring Saul kag ang iya mga anak nagpalalagyo. 2Pero nalambot sang mga Filistinhon si Saul kag ang iya tatlo ka mga anak, kag ginpamatay ang iya mga anak nga lalaki nga amo sanday Jonatan, Abinadab, kag Malkisua. 3Ang inaway malapuyot sa palibot ni Saul, kag naigo sia sang mga baslay sang kaaway kag malubha ang iya pilas. 4Nagsiling sia sa pamatan-on nga nagadala sang iya mga hinganiban, “Gabuta ang imo espada kag patya ako, agod indi ako pagyagutaon sining mga di-diosnon nga mga Filistinhon.” Pero ang pamatan-on hinadlukan gid sa paghimo sini. Gani, ginkuha ni Saul ang iya kaugalingon nga espada kag ginhap-an ini. 5Nakita sang pamatan-on nga patay na si Saul, gani iya man ginhap-an ang iya espada kag napatay sia. 6Gani si Saul kag ang iya tatlo ka mga anak nagkalamatay sing dungan kag wala gid sang iya mga kaliwat nga nanginhari. 7Sang pagkabati sang mga Israelinhon nga nag-estar sa Kapatagan sang Jezreel nga ang mga hangaway nagpalalagyo kag si Saul kag ang iya mga anak nagkalamatay, ginbayaan nila ang ila mga banwa kag nagpalagyo. Dayon nag-abot ang mga Filistinhon kag ginpanag-iyahan nila ang mga banwa.
8Sang madason nga adlaw, ang mga Filistinhon nag-abot sa pagpanguha sang malahalon nga mga butang sang mga bangkay, kag nakita nila ang mga bangkay ni Saul kag sang iya mga anak nga nagahamyang sa Bukid sang Gilboa. 9Ginpugotan nila si Saul, gin-ubahan kag ginkuha ang iya hinganiban, kag nagpadala sila sing mga mensahero sa bug-os nga Filistia sa pagsugid sang maayong balita sa ila mga diosdios kag sa ila mga kasimanwa. 10Ginbutang nila ang iya hinganiban sa templo sang ila mga dios, kag ginpakabit ang iya ulo sa templo sang ila dios nga si Dagon. 11Sang pagkabati sang mga pumoluyo sang Jabes nga sakop sang Galaad sang ginhimo sang mga Filistinhon sa kay Saul, 12ang mga isganan nga mga lalaki naglakat kag ginkuha nila ang mga bangkay ni Saul kag sang iya mga anak, kag gindala nila ini sa Jabes. Ginlubong nila ang ila mga bangkay sa idalom sang kahoy nga terebinto, kag nagpuasa sila sing pito ka adlaw.
13Si#1 Sam. 13:8-14; 15:1-24; Lev. 19:31; 20:6; 1 Sam. 28:7-8. Saul napatay tungod kay nagmalalison sia sa Ginoo. Wala sia magtuman sang mga sugo sang Ginoo. Nagtinguha sia nga matuytoyan paagi sa pagpamangkot sa mga espiritu sang mga patay 14sa baylo nga magpamangkot sia sa Ginoo. Gani ginpatay sia sang Ginoo, kag ginhatag ang ginharian sa kay David nga anak ni Jesse.
Currently Selected:
1 Mga Cronica 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
