Róóma 10
10
1Nyaaramchú, hé geerchú hí fedo-, tá yú Waag ki vivisatká, he giri gál chia Yisirayelallá rubach aargiroká. 2Gaal hát góf he Waag el ki igiroká ˈguoká, yáá tág óg. Tá gaal hát Waag hí feˈdoká hé eiy ma náásan. 3Gaal hé ˈgíérích Waag hí gálaat gál ˈdúwaká ki chegetoká eiy ma náásan. Gaal ˈgíéríchlé éíy taaka-, kasleka hol innum Waaˈgietka hol gál ˈdúwaká hođuoká he nanadha. Tá ˈdaa giri gaal he ˈgíérích Waag hí feˈdoká iiy ma yéen-, ma náanká, gáál hé Waag hí gál ˈdúwaká ma chegen. 4ˈGíérích Waag hí feˈdóóllá he Kirísto. Af giri Kirísto ka yimieká in hemuumurít bárle me hí ˈgidhe. Aalé káána ameeny gál Kirísto iiy yegetká lulle Waag innumleka gál ˈdúwaká hai yegedhe.
5Móshe hemuumurít el gaa igiritle ubaa máádhat máá ˈdúwaká yegetká ˈdaalleka hé veereká kieye, máádhat hemuumurít lulle el gaa veere-, ˈduwasieka, luolmít hai aargira,#10:5 Biiy hé máá níínní hemuumurít lulle ki yaal-, ma ˈdeđenenyká mán. Aaléka, gálaat lulle ađaabano ubaa nyuogimmo he gim gaa ija, ˈdaab he Yíésu iiy ma yéen-, muí ađaabanolle ubaa nyuogimle ma gaa éenyká. (ˈDeemano Gál Levi 18:5) he yie. 6Tá gál Waag iiy yie-, iiy yeenlé kinaal hí gál ˈdúwaká hoycheká hai kieye, Mááya úr mé nannaa, Kirísto les ˈdu gáá egedhdhe? yíen. 7Gaal úba hai kieye, Mááya bííy gál kufeká mé nannaa,#10:6-7 Hemuumurít ˈDéé Hótlé 30:13 Kirísto les ˈdug ˈdu gáá egedhdhe? yíen. 8Warˈgat Waaˈgiet kieye, Fayám hé tág ˈjób. Fayamééllá hé agerkícho ubaa gerkícho gaa iđo,#10:8 Hemuumurít ˈDéé Hótlé 30:12-14 he chie. Fayamééllá he iiy yeen ki Kirísto iiy yie-, káána ke gálaat ki ˈdiyeenallá. 9Har kuun afkú ki kieye, Yíésu he Máá chia Guđoká, chie-, tá mú hát Waag hí geđi loolnoyche-, hí uushich yé gáá ˈdeeycheká geerkú úba iiy ki chieka, af kinaalka Waag hai ko rianna.
10Aalé máá Yiesu Kirísto geerle iiy ki yeget-, afle he ki hogodho-, kieye, Yiesu Kirísto he Máá chia Guđoká, yegetká in Waag hí máá ˈdúwaká chegedhe, máá kinaallá rubach hai aargira. 11Hát Warˈgat Waaˈgiet hí hote-, kieye, Ameeny máá mú iiy yeetká, hé innum Waaˈgiet kern hí ma gaa ˈgiˈgin,#10:11 Yisááya 28:16 chieká. 12Hééllá ˈdaa gál Yuuˈdi-, ubaa gál gál Yuuˈdi muuniny-, Yiesu Kirísto iiy yieká ˈdaallé he ki yaalla. Gáál Máállé Guđoká íín tikiˈde. Ameeny gál mú veveenká ha muí ˈdú ˈjeeme. 13Aaléka, ameeny gál Máá Guđóóllá veveenká ha muí riima.#10:13 Yówel 2:32
14Tá gálaat har Máá Guđóóllá móíytaka, háteeye mú veveme, muí ririma? Tá gálaat hátlé mú fayamle ma máálinyká, háteeye mú og, mú iiy yegedhe? Héétí ˈdaab gálaat hí fayam Máá Guđóóllá ma ki ˈdiiyíminyká, háteeye mú fayamle mamala? 15Tá gál gálaat ki ˈdiyeenká ˈdaab gaalí alb ma fíinyká háteeye gáál fayamééllá ki ˈdiyime? Hát Warˈgat Waaˈgiet hí hote-, kieye, Gál fayam midhabká hol gaa sisidhoká ebá ˈgas met hí mídhab!#10:15 Yisááya 52:7 chieká.
16Tá hé kinaallá hé kieye, gál gaalí Fayam Midhaballá ki ˈdiiyimeká lullé fayám iiy yie muuniny. Hát káána héle Yisááya Waag yiete-, kieye, Máá Guđo, mááya fayam kuun hí ye ká shiiche-, yú gáál ki ˈdiiyimeká iiy yie?#10:16 Yisááya 53:1 yieká. 17Aaléka, iiy yeen fayám maalíti he yé gáá ˈdeˈdeenne, fayam kinaallá he Fayam Midhab Kiristóóllá.
18Aalé gál Yisirayel hé fayamééllá ma máálinyo ke yeedhe? Híʼi, gaal hé fayám maale. Hát Warˈgat Waaˈgiet hí hote-, kieye,
Fayám hé les lulle eiy bash ki chie,
ˈdee hé les lulle mé ki ˈdoy,#10:18 Warˈgat Arram 19:4
chieká.
19Aaléka, gál Yisirayelallá hé fayamééllá eiy ma náásanno ke yeedhe? Híʼi, gaal hé fayám eiy naate, in fayám điidhe. Móshe hé ˈdeeny héle Waag hí gál Yisirayel geeycheká veere, Waag kieye,
Itín gál é meenykícho muuninyká hinaafle ha yu hí gaa verene,
kídh hí gál đéeská ka dhaˈgasannoká ha yú ˈdú ˈjeeme,
idholle haí cheese,#10:19 Hemuumurít ˈDéé Hótlé 32:21
Waag hí chie.
20Héétí Yisááya hé Waag hí hoteká hát sierm mantiká ˈdiiyime, giri Waag kieye,
Yú gál ye hol ma gaa ˈgéˈgenká hé ye shuunne,
gál ye ma hegésenká yáá hol argisie,#10:20 Yisááya 65:1
chieká.
21Tá ˈdaa gál Yisirayelalláka, Waag úba kieye,
Yáá aadh lulle gáál gil ki egefo,
giri gaal ye ˈdu gáá yiimetká,
kor gaal ˈdaa giri met guogoká hé ye gaa điidhe,#10:21 Yisááya 65:2
he chie.
Currently Selected:
Róóma 10: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
