Róóma 9
9
Gál Yisirayel Kirísto điinle Báulo geer gaa ˈdeeneyche
1-2Yú ˈdaa giri Kirísto máálléká in hé ˈdúwaká hogodho, yáá hé hódhoká ma hogon. Yáá tág kídhchú geerle ye gaa ˈdeenedhe, geer gaa ˈdeenen chiallá hé ali ma ki ˈdeˈdeminy. Kaschú ubaa Hím Naasan Waaˈgiet hé yú hogodhóóllá hát he ˈdúwaká hé óg. 3Har káána Waag ye điite-, ye Kirísto gaa ˈgidhiche-, tá hé kinaal kídh chia-, nyaaram chiallá ririanka, af kinaalka kalat máámaʼ? 4Kídh chia Yisirayelallá he gál Waag hí gálle hosote-, Waag hí ˈduuwle argisiche-, Waag hol ˈdéé af iđie-, Waag hí hemuumuritle ká shiiche-, atim he naasan ˈBíl Waaˈgietká Waag hí geeyche-, Waag hí ˈdúˈjímle af iđicheká. 5Gál Yisirayelallá he gál mú eshim eshim kúnnaa-, Abirááyam yé gáá ˈdieká.#9:5 Eshimééllá he Abirááyam, Yísak, tá Yákob, giri Yísirayel lééllá. Kirísto he lulle mé ki yaalallá ˈdaa gálaatka úba ˈbíl íllallá he yé gáá ˈdie. Waag taalle bííyyo gaalí meemeyo. Iiy-hí, he hí hát kinaallá yeet.
Gál Waag he af iđinyle hát ˈduuwayoká iiy yegetká he um Waaˈgiet
6Aaléka, gál Yisirayel burnayká ˈdúˈjím Waag hí gálle af iđicheká ma árginyallá, he in kieye, Waag he af iđinyle hé ma ˈduwânyo ke yeedhe? Híʼi, he kieye, gál kídh Yisirayel yé gáá ˈdíéllá ˈbaal tákáma he gál Waaˈgiet, yegedhe. 7Héétí ameeny gál ˈbíl íl Abiraayam yé gáá ˈdíéllá ˈbaal tákáma hí um Abiraayam. Waag Abirááyam geeyche, kieye, ˈBíl ílkú iny kua Yísako he hol gáá hođicha,#9:7 Erkob 21:12 chie. 8Hééllá kieye, gál ˈbíl íl Abiraayam yé gáá ˈdíéllá ˈbaal tákáma hí um Waaˈgiet. Um Waaˈgiet he gál hé Waag hí gálaat af iđicheká iiy yieká. Gálallá in Waag hí um Abiraayam ˈdúwaká ká dhaˈgasanna. 9Waag hatallá in Abirááyam ˈdéé af iđiche, kieye, Yú wár ka chimetallá aflé afeelloká hollo hol ká naadha, Sáára min kuallá veel yab hai ˈdaalla,#9:9 Erkob 18:10 #9:9 Veel yab Waag hí Abirááyam ubaa Sáára af iđichééllá he Yísak. chie.
Hé Waag hí muˈdoká hé tagle muuninyká ha ke yégen
10Aalé ebá eshi eshim kúnnaa Yísak umlé manđaana-, minlé Rebéka hí ki ˈdalleká kí dhaayo. 11-12Umééllá hátlé ma ka ˈdaláan-, hé midhabká ubaa hé ˈdeđewká ma ekênyká, gáál ˈjiellé Rebéka Waag hí geeyche, kieye, Um kuallá máá guđoká máá ninniká gédéchle hai yeedhe,#9:11-12 Erkob 25:23 chie. Hééllá hé kieye, máádhat héllé ekeyká ˈdaalle in Waag hí kí veveenne muuniny, Waag hátlé he feˈdoká in máádhat kí veveenne. 13Hát Warˈgat Waaˈgiet hí hote-, kieye, Yákob yáá geelney, Ésaw yáá điidhe,#9:13 Maláki 1:2-3 chieká.
14Aalé háte ke yeedhe? Waag hé tagle muuninyo ke yeedhe? Híʼi, Waag hé ˈdúwaká tákáma ekemeyche! 15Waag hé Móshe geeyche, kieye,
Geer guuráchú máá yú fedo-, yú aargisuoká ha yú aargisia,
máá yú fedo-, yú ˈdú ˈjeˈjeenká, ha yú ˈdú ˈjeeme,#9:15 Yíéˈdími 33:19
he chie.
16Aaléka, har Waag geer guuralle máádhat aargisichoka, hé kinaallá hé máádhat hí fedoká ubaa hí ekemeyoká ˈdaalle ma ki yaaliny, hé Waag hí feˈdoká ˈdaallé ki yaalla. 17Hát Warˈgat Waaˈgiet hí hote-, Waag Fárro geeyche-, kieye, Yú ko kansím koyallá he giri mé gogint kuallá ˈdaalleka yú ko fargogintchú aargisuo-, meenychú les geer lulleka ˈdeernetká,#9:17 Yíéˈdími 9:16 Waag hí mú chieká. 18Aaléka, Waag hát he feˈdoká in mááká geer guurá aargisicha, mááká mé googonoycho.
19Aaléka, itín kálmaréél mú tikiˈd hai ye hegete, kieye, Máádhat hát Waag hí ki muˈdoká in hát níínní điidho man háluke, tá Waag háteka gálaat ˈdeđensetóol? hai ye yeedhe. 20Tá máá kinaal mááya, Waag hatal yegetal? Máá Waag hí ka kuonneká hé Waaglé hí ka kuonneká hatal hegeset, kieye, Háteka ye hatal ka kuonnéel?#9:20 Yisááya 29:16; 45:9 yeget? 21Máá ibilaam tág nannuoká sháˈd he iyaayká hé héllé fedoká tág ma gaa nanniny? Ibilaam naam tág nieka, har fedoka hé ibil tikiˈd ibil he naasanká ma hođisan? Ibilléétí ibil aađaká ma hođisan?
22Tá Waag ííni fargogintle gálaat aargisicheká feˈde-, gál hí điidheká idholle ˈdú iđimicheká feˈdééllá, har hol tiiyye-, gál onnônyka he beđisate-, idholle ˈdú iđimiche kinaal har nog ki sieteka, hééllá meete ˈdeew ke gaa hogodho? 23Waag hééllá ekemeychóóllá, he giri guchlé ˈdúúw ˈgayyóóllá gál he waarateká aargisichoká. Tá Waag har gálallá he gál geer guuralle aargisicho-, ubaa hí guchle higiloká hođichoka, hééllá meete ˈdeew ke gaa hogodho?
Gál gál Waaˈgiet muuninyká gál Waaˈgiet yie
24Múúni ˈbáál ke gál Yuuˈdi-, ˈbáál ke gál Yuuˈdi muuninyallá, hé ke gál Waag hí waaratééllá hurt gaa ijo. 25Hát Waag hí warˈgat Hoseya gaa hote-, kieye,
Gál kis gálchú muunînyká gálchú ha yú yeedhe,
gál kis yú ma geelnênyká gál yú gielká ha yú yeedhe,#9:25 Hoséya 2:23
Waag hí chieká.
26Hoséya úba hé veereká kieye, Ál Waag hí gáál gaa geeyche-, Waag kieye, Itín it gálchú muuniny, muí gáál yieká, ál kinaal gál hí gaa ijoká Waag haí geđicha, Waag kieye, Itín he um Waag bííyyo ali iđoká, ha muí yegedhe,#9:26 Hoséya 1:10 Hoséya hí yie.
27ˈDéé hót héle Yisááya hí gál Yisirayel ˈdaalleka af gaa gúch ki hodheká he kieye, Har káána túóy gál Yisirayel hát bás yúóchle kátaka, gál iraam mánká tákáma rubach aargira. 28Waag les gálle ˈdéé ki iđinyle ál ˈjóbo ˈdéé ki iđimicha, ˈdéé mé muuˈda,#9:28 Yisááya 10:22-23 yie. 29Yisááya kíssóótíá hé úba hodheká kieye, Onnônyka Máá Guđo Waag fargogínt lulle ˈgúóllá hídhkúnno ˈbáál ma ká hanyka, hé ke onnônyka hát gál ˈjien Soˈdom ubaa ˈjien Gomora me hí ˈgidhéétíá yie,#9:29 Yisááya 1:9 yie.
Gál gúúđo Yuuˈdiká Kirísto điidhe
30Aalé hééllá háte ki gaa yeedhe? Har káána úba gál gál Yuuˈdi muuninyká Waag hí gál ˈdúwaká chegetoká kis mé ma ká ˈgiinyka, ˈdaa giri he Kirísto iiy yieká in Waag hí gál ˈdúwaká chie. 31Tá gál Yisirayel-, gál Yuuˈdi lééllá íín har káána úba Waag hí gál ˈdúwaká chegedheká fedeka, hé Waag hí gál ˈdúwaká ma chéen. Gáál hemuumurit el gaa igiritle hé hí gál ˈdúwaká ma hôny. 32Tá háteka hemuumurit Waag hí gáál ka shiichééllá el gaa igiritle gáál gál ˈdúwaká innum Waaˈgiet ma gaa hónyal? Hééllá he ˈdaa giri gaal hemuumurít hélle ekemeyká fede-, kor gaal Kirísto iiy ma yéenká. Gáál hé wár gálaat ˈgas mé ki ˈdaraanká hí riigirsie, 33hát káána Warˈgat Waaˈgiet hí hote-, kieye, Bá dhaayyíe, yú mááchú Síyon ha gaa iđimia. Máá kinaallá he hát wár gálaat ˈgas met ki ˈdaraan-, gálaat riigirsuoká, héétí hát nyátáábá gálaat les ki ˈdaraannoká. Máá máállá iiy yeetká, hé innum Waaˈgiet kern hí ma gaa ˈgiˈgin,#9:33 Yisááya 8:14; 28:16 chieká.
Currently Selected:
Róóma 9: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
