He Ekeny Gál Alb Fimiká 19
19
Báulo Eféso kí ˈjie
1Aalé af giri Abóllos Korínto gaa ijeká, Báulo lés Galatia ubaa lés Firgia gaa kie, mu ˈgíérích ˈdug iifeká nadhe, Eféso ki ˈjie. Mu ál kinaal gál Yíésu iiy yie mare hol gaa arge. 2Mu gáál yiete, kieye, Af giri hí Yíésu iiy chieká it Hím Naasan Waaˈgiet hí ˈdú gáá leete? muí gáál yie. Aalé gaal mú ˈdéé hol ˈdú nie, kieye, Hím Naasan Waaˈgiet hát biiy gaa iđoká nyáá nyí nétle mán, gaalí mú yie. 3Aalé Báulo gáál yiete, kieye, Bie gím ním máre hí argiyye? yie. Gaal kieye, Bie gím ním Yuána hí gáál onisieká, gaalí yie. 4Báulo kieye, Yuána he onisinylé bie gim nimiká hélle kieye, hé kíchia ˈdeđewká hayyíe, Waag makan famíe, he chie. Tá mu úba hé gálaat geey, giri máá mú el gáá ˈjeenká gaalí iiy yegetká. Máá kinaallá he Yíésu, Báulo hí gáál yie. 5Gaal héél maaleká, gáál đo gaalí Máá Guđo Yíésu meenyle bie gim ki nie. 6Aalé Báulo gáál gil ˈdú fieká, Hím Naasan Waaˈgiet gáál ˈdú gáá leete, gaal af hol ká eiy eiyye-, Hím Naasan Waaˈgiet hí shiicheká ˈdeem ki huogodhe, gaal ˈdeeny Waag hí shiicheká ˈdiiyime. 7Gál yááb ál kinaal gaa ijeká amú lúl tomon tikiˈde a naama.
8Aalé ameeny kinaallá Báulo ˈbíl ˈdiiyiminy-, al kinaalloká ˈguiyam seđ gaa sedhe, gálaat Guch Waaˈgiet ˈdeenyle hát ˈdabaanká af gaa kuokoy. 9Kor gáál ˈbáál hí ˈdéé điidhe, gaal ˈgíérích Yiesúúllá gálaat met gaa fichile. Aalé Báulo gál giri láli ˈdéé iiy yieká hol eedhdhe, gaal gál giri ˈdéé điidheká taak yé gaa ˈdie. Mu bar lulle máá gaalí Turáno yegie mare ˈbíllé ˈdiiyiminyká álle gáál fayam Yiesu af gaa kuokoy. 10Mu warram naam gáál ˈdeenyéél hatal gaa onisie, ˈjíig gál giri lés Asia gaa ijeká, gál Yuuˈdi yíekaʼ, gál Hellen yíekaʼ, lulle hí ˈdeeny Máá Guđoká gaa maale.
Hele Sekewa hé aryáán hí met ma gaa kíiny
11Waag Báulo hujich ki naasate, hé súm gálaat hí af ˈdaˈdabeká eekemeyche. 12Báulo shaashamle ubaa đafaraamlé muí đafaraam ˈdug ˈdú higiteká úba gaalí gál basham ˈgieká ˈdú eedhdheka, gaal đo hai bie, aryáán đo gálaat yiem hai gaa ˈdiiyye.
13Aalé gál Yuuˈdi hol gaa seseme-, gálaat aryáán yiem gaa ˈdeđie mare kerka Máá Guđo Yíésu meenylé he gálaat aryáán yiem ki ˈdeđie. Gaal aryáán geđuoká kieye, ˈDaa meeny Yiesu giri Báulo hí ki ˈdiyeenká ha yú ko ki geey, máállá yé gaa ˈdé, he yegie. 14Máá guđo suoryo-, Waaˈgiet gaalí Sekéwa yegieká helellé yaab tiiya mare he gál ˈbaal hí hééllá ekemeteká. 15Aalé gaal kulich tikiˈd hátlé giri aryáán geđie, Máállá yé gaa ˈdé, yegieká, aryáán gáál ˈdéé hol ˈdú niiyye, aryáán kieye, Yíésu yáá óg, Báulo úba yáá óg, tá itín hí gálya? gáál chie. 16Aalé máá giri aryáán ˈgieká gáál hurt ˈjie, gáál tune, gáál ká adhdhe, gaal lulle đafaraam dhiire, hol fasam ki tune, ˈbíl kar gaa ˈdane.
17Gál Yuuˈdi ubaa gál Hellen ˈjien Efeso kinaal gaa ijeká ˈdeenyéél maaleká sierm hí faanne, gaal Máá Guđo Yíésu meenyle ˈduway. 18Aalé gál Yíésu iiy yie-, burnayká ká yimie, héllé ˈdeđew-, he eekemeyká gálaat met gaa huogodhe, ˈdeentle iiy yie. 19Gál kinaallá gállé burnay-, gil ka he ním ˈgieká, warˈgasamlé he nimiká hol ˈdu gáá sisidhe, gálaat metle ˈjiet gaa veere. Warˈgasam kinaallá hímle gaalí tuoyká bíre hí shíí tomon chen. 20Yaalmitééllá in ˈdeeny Máá Guđoká hí far ki gogoy, hí biiy eiy bash ki yie.
21Aalé héél lulle đueká Báulo Hím Naasan Waaˈgiet hí koch chie, giri mu lés Makeˈdonia ubaa lés Akaya af gaa vereno-, tá ˈjien Yerusalem mé nannuoká. Aalé mu kieye, Yú ál kinaal nyuoreka, Róóma úba ha yú seeme, muí yie. 22Aalé mu gállé naama hí hujich yiir ki chichiˈde-, Tímote ubaa Erástos lééllá Makeˈdónia ali ˈdú fie, mu íín dhúrle lés Asia kinaal rám ilishká gaa yíéđie.
Gál nigiˈd Efesoká ˈjien shalal fie
23Af kinaal he onisiny ˈgíérích Yiesúúl ˈdugaka gálaat shalal kaadhdhe. 24ˈJien Efeso állé kinaal mú tikiˈd máá gaalí ˈDemétiros yegie mare hí gaa ije. Máá kinaal ény súm nigini gaalí yaalmit ˈbíl gaalí waag Artémes léká gaa viviteká he sibilaam tagano gaa nannie, birm higidhdhe. Gál éíy taaka gil óg-, mú hujich ki chichiˈdeká hát kinaallá úba tírfí aargire. 25Mu gál hí hujich ki chichiˈde kinaal ubaa gál éíy taaka hújích hát gáál hújíchléél tagano nannieká hol ˈdú vie, kieye, Gál yaab, kamurkúnno hát he hújíchallá yé gáá ˈdeˈdeenká ití óg. 26Aalé káána it argiyye, ubaa it maalle, hát máá Báulo léél gál ilishká ˈjien Efesóól ubaa lés Asia hátlé taalal lulle gálaat gaa chure-, gálaat bađisíéllá. Mu hé gálaat geđuoká kieye, Waagam gálaat hí gil tagano ki níéllá hé waagam muuninyo, he yegedhe. 27Aalé hééllá hát muun gáál ki ˈgereká onnóo! Hújích kúnnaallá meenylé midhaballá hai baađaa, ˈbíl waag guđo-, Artémeslééllá gaalí gaa vivisatallá úba ˈdúúw hai ˈdaaba. Artémes íín giri gaalí lés Asíállá tá biiy lulle gaa vivisatallá tuuˈdle meenylé ˈdérallá hai gaanadha, muí gáál yie.
28Aalé gálaat ˈdeenyéél maaleká súm idhane, kúóˈd ˈdoy, kieye, Artémes Efesóóllá ííni ˈdúwa! gaalí yie. 29ˈJien lulle ós kaadhdhe, gaal máá gaalí Gáyyos yegie-, ubaa máá gaalí Aristákos yegie-, Báulo hol Makeˈdónia gáá eedhdhe mare kas tikiˈdeká ki ˈgiiliˈgay, gáál ki ˈdoˈdodhe, gáál ˈjien náble ˈdú eedhdhe. 30Báulo nááb álle seseme-, nyesebich met ki ˈdeˈdemeká he fede, kor gál nyaaram láliká mú síé rie. 31Báulo sheellé kaansúo-, Asiaká úba mú gáál ali ˈdu gáá fie, giri mu nááb állé kinaal ma seeminyká.
32Aalé gál nááb álle hol ˈdú sedhe kinaal ˈdee hí hol af ká điidhe, gálal héél hodheka, gálatí íín héétí hai hodhe. Gáál gúch úba hé hí ál kinaal eeyká hé muog. 33Aalé gál giri Yuuˈdiká máá gaalí Alekesánda yegie mare nyesebich met gaa koy. Nyésébích giri ál kinaal ijeká ˈbaal Alekesánda ˈdéé af gaa koy. Alekesánda biiy met ki ˈdieká gíl úr ki eey, gíl waanie, giri gaal lulle hátlé ali ijóóllá hol ˈdéé ˈdú hogodhoká. 34Aalé nyesebich Alekesánda hát máá Yuuˈdiká kimiteká gaal lullé giriká aadh ˈgas naam koˈdam gaa ˈdane, gaal kieye, Artémes Efesóóllá ííni ˈdúwa! yiegie.
35Aalé máá ˈjien kinaal warˈgasamlé nyatalaamká gilka ˈguoká gáál shab hoy, kieye, It Efesóóllo, múúni giri ke gál ˈjien Efesóóllá Artémes guđóóllá ˈbíllé ke gaa vivisatká ubaa wárlé úr gáá ˈjieká hát ke ˈdeˈdeenká les lulle gálya hí gaa muog? 36Aaléka, ˈdaa giri hééllá lulle máá níínní hí điidho-, mánká nógúóllá sedhíe, haí ˈdeem hugusam ki mumúriny. 37Itín it gálallá állá ká eeyye, kor gaal íín hé ény gaalí waagam gaa vivisatká ma gaa buráany, hé waag kúnnaa Artémes úba ma chaacháriny. 38Aalé ˈDemétiros ubaa gállé hol hujich ˈgar nannuoká har máádhat hol ˈdéé ká ˈguoka, ˈbíl ˈdeeká hé ali yaal, karu ˈdeem iđimuoká hé les gaa ijo, gaalí ál kinaallá hol ˈdú eet, gaalí ˈdeem eiy ki nuo. 39Har ˈdeem éíy taaka hí ger ká ˈgayya-, gaalí eiy kí nannuoká hí feˈdeka, ˈdeem kinaallá hé állé hí eiy nanniyyoká ˈgayyo, ál kinaal ˈdú eedhdhíe. 40Aaléka shalal kulichallóóllá ˈdeenyle hát gáál ˈdú ˈdoyká onnóo! Hééllá har he ˈduwayka, muun nyesebim ke ˈdoméél ˈdaalleka hé níínní ke ká ˈgiiliˈgaw-, ke gáál geeyoká mán, muí gáál yie. 41Aalé mu gáál hatal geeyká, mu đo nyesebich eiy galie.
Currently Selected:
He Ekeny Gál Alb Fimiká 19: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
