He Ekeny Gál Alb Fimiká 18
18
Báulo fayam Yiesu Korínto gaa ˈdiiyime
1Aalé af kinaal el ˈdaal Báulo Ádhenay gaa kie, Korínto ki ˈjie. 2Mu ál kinaal máá Yuuˈdi gaalí Akúla yegie-, Bóntos ki ˈdalidhe mare hol arge. Máá kinaallá ubaa minlé Biriskílla rám gáá ˈjóbká lés Talyan gáá fame. Gaal lés Talyan gaa kíéllá he ˈdaa giri Kaláúˈdias giri Káísar léká#18:2 Kaláúˈdias Káísar he máá bár kinaallá les lulle kansimle ˈgieká. ˈdéé mure-, gál Yuuˈdi lulle ˈjien Rooma gaa kekeenká. Aalé Báulo Akúla ubaa minlé kinaal ˈdú sedhe. 3Gálallá he gál đonganaam dhadhaw-, đongaanam mamarsatká. Aalé ˈdaa giri Báulo úba he máá đongaanam dhadhawká onnoyká, gáál hol af yíéđie, gáál hol hujich ˈgar nie. 4Báulo ˈjien Korinto kinaal bar lulle Kúlích Hef ˈGisanká ˈbíl ˈdiiyiminyká seeseme. Mu fayam Yiesu gálaat ki ˈdiiyime, gál Yuuˈdi ubaa gál Hellen ˈdéé af gaa kuokoy.
5Aalé Sílas ubaa Tímote Makeˈdónia gáá fameká, Báulo đonganaam dhaany hay, hol sillie, aadh lulle ˈdeeny Yiesu gálaat ki ˈdiiyime, gál Yuuˈdi Yíésu hát he Messíyaká geeđie.#18:5 Messíya he máá kíssóótí Waag hí gál Yisirayel af iđiche-, gaalí egeseká. Messíya hélle kieye, Máá Waag hí salab mé ki liiyye-, Waag hí kansím koyyeká. 6Aalé gál Yuuˈdi mú ˈdeenyle điidhe-, mú chaachareká Báulo đo đafaraamle hurgufe,#18:6 Đafaraam muí hurgufééllá, hélle kieye, Itlé. kieye, Ađaabkícho itle hí ki yíéđía, yú yáá konf hé ka ˈguoká mán. Yú aaléka káána ke gaa ijóóllá kidhdho bala ˈdú nannaa, yie.
7Aalé mu ˈbíl ˈdiiyiminy kinaal gaa kie, mu máá Waag iiy yie-, gaalí Titio Yóstos yegie-, ˈbil hí ˈbíl ˈdiiyiminy kinaal láá yiel mare ˈbílle sedhe. 8Aalé ˈbíl ˈdiiyiminy kinaal máállé hí mé ki yiel-, gaalí Kirísbos yegie mare ubaa ˈbíl geerle lulle Máá Guđo Yíésu iiy yie. Gál burnay Korinto-, ˈdiiyiminy Baulo nee kokoyká úba ˈdéé iiy yie, gáál gaalí bie gim nie.
9Aalé chuure tikiˈd Máá Guđo Yíésu Báulo hát amadhyoká geey, kieye, Ha biiy gaa kían, ˈdeenychú taalle ˈdiiyímo, ha shab chéen. 10Yú yáá ko hol ˈguo, yáá gál burnay-, ye iiy yieká úba ˈjienééllá ká ˈguo. Hé máá níínní ko đig yeget-, ko he ki ekemeyoká mán, Máá Guđo Yíésu hí mú yie. 11Aalé Báulo ál kinaal ˈguiyam tomon a síet gaa yíéđie, gáál ˈdeeny Waaˈgiet onisie.
12Af giri Gallíyo lés Akaya#18:12 ˈJien Korinto Báulo hí gaa ije kinaallá lés Akaya he gaa tiel. mé ki yielká gál Yuuˈdi giri Báulo nebeneyká hol af vedhdhe, mú ˈbíl gaalí gálaat ˈdeem ki iđimuoká ˈdú eedhdhe, mú Gallíyo met eey. 13Gaal Gallíyo geey, kieye, Máállá hé gálaat chure. ˈGíérích muí gálaat Waag ki oonisúóllá hé gálaat nyátálkúnno gaa bađisie, gaalí mú yie. 14Aalé Báulo hátlé onnônyka af eiy ˈdeđite-, ˈdéé hogodheká Gallíyo gál Yuuˈdi geey, kieye, It Yuuˈdííllo, ˈdeenyééllá har máálle máá hé ˈdeewká, muuninyka, ađááb ekeyká onnônyka, taglé, yáá hí af nee koy. 15Kor héél káána hol ki fáláám ˈdeem ubaa meet nyatalaam kíchiaká háluke, itle hí hol eiy gaa náa. Yú yáá hé hatalloká hol eiy ma gaa nanniny, muí gáál yie. 16Mu đo gáál ˈbíl kinaal gaa arie. 17Aalé gaal lulle Sóstenes giri ˈbíl ˈdiiyiminy mé ki yielká fame, mú ˈbíl gaalí gálaat ˈdéé ki iđimuo kinaal met gaa tune. Kor Gallíyo íín hé ˈgúl kinaal hol ma héésen.
Biriskílla ubaa Akúla Abóllos fayam Yiesu hát ˈdabaanká ˈgas gaa koy
18Báulo ˈjien Korinto kinaal rám éíy taaka ilishká gaa yíéđieká mu gál nyaaramká in ká kie. Mú kímlé kinaal Biriskílla ubaa Akúla hé mú hol ˈgie. Gaal hátlé kadich ma híliny-, Kenkéra ma gaa kíiny-, Síria mé ma níinyká, Báulo he af iđiny kis Waag af iđieká ˈduwasie-, mé đig yieká, đo mé gaa dhuurte. 19Gaal he Eféso kí fameká Báulo Biriskílla ubaa Akúla ál kinaal ki hay. Mu ˈbíl ˈdiiyiminyká sedhe, gál Yuuˈdi hol ki falme. 20Gaal mú heete-, kieye, Kí rám guđoká hol af yíéđuo, yieká, mu gáál gaa điidhe. 21Kor mu gáál in ká kekemeká mu gáál geey, kieye, Har Waag hí feˈdoka, yú geđi hollo hí hol ˈdú gáá naadha, gáál yie. Aalé mu đo kadich hile, Eféso gaa kie.
22Aalé mu Kaisária ki ˈjieká mu Yerúsalem sedhe, gál nyaaramká naa yie, đo ál kinaal gaa kie, Ántiok mé nie. 23Mu Ántiok állé kinaal ram gaa rafe, đo kie, lés Galatia ubaa lés Firgia lulle gaa sedhe, lali Yiesu alb kinaal gaa ijeká yiir gaa chiˈde, gáál guofsie.
24Aalé máá Yuuˈdi gaalí Abóllos yegie-, Alekesánđara gaa ˈdalidhe mare Eféso kí ˈjie. Mu íín he máá ˈdaalím hí guđo-, Warˈgat Waaˈgiet hát ˈdabaanká ógká. 25Mu íín kisso gaalí ˈgíérích Máá Guđoká af gaa koy. Mu chira ˈdeeny Yiesu ki ˈdiyeenká he ˈgie, mu ˈdéé hát ˈdabaanká ˈdiiyime. Kor mu íín he onisiny Yuana bie gím nímle tákáma onnoy. 26Aalé Abóllos hát nyaalimiká ˈbíl ˈdiiyiminyká gaa ˈdiiyime. Biriskílla ubaa Akúla ˈdiiyiminy muí ˈdiiyime kinaal maaleká mú ˈbílle ˈdú eedhdhe, mú ˈgíérích Waaˈgiet hát ˈdabaanká af gaa koy.
27Aalé Abóllos sieny Akaya hí ka hileká, gál nyaaram al kinaalloká hí guofsie. Gál nyaaram kinaal warˈgát gál nyaaram Akayaká ˈdú veere, giri gaal mú egeet-, mú máállé dheeˈgo hođisatká. Aalé Abóllos Akaya ki ˈjieká mu gál ˈdaa gielmit Waaˈgiet ˈdugaka Yíésu iiy yieká hát ˈdabaanká yiir gaa chiˈde. 28Aalé Abóllos gálaat metle gál Yuuˈdi hát ˈdabaanká hol ki ˈdiiyimeká, gáál a mé kí ˈjie. Mu Yíésu hát Messíyaká gáál Warˈgat Waaˈgiet gaa argisie.
Currently Selected:
He Ekeny Gál Alb Fimiká 18: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
