He Ekeny Gál Alb Fimiká 17
17
Báulo ˈdeeny Waaˈgiet Dhesaloníke gaa ˈdiiyime
1Aalé gaal he Amfíbolis ubaa Abollónia gáá nadheká gaal Dhesaloníke giri gál Yuuˈdi ˈbíllé ˈdiiyiminyká hí gaa yielká ki fame. 2Báulo hátlé aađaká Kúlích Hef ˈGisanká ˈbíl ˈdiiyiminyká sedhe. Mu Kúlích Hef ˈGisanká met seđ ˈbíl ˈdiiyiminy kinaal ˈdeeny Warˈgat Waaˈgiet gálaat af gaa koy. 3Aalé mu Warˈgat Waaˈgiet kinaal he veerit gaalí gaa veere-, giri Messíyalle maanyjaw-, tá he uushich yé gáá ˈdeˈdeenká gáál gaa argisie. Kor gáál geey, kieye, Yíésu yú hí ki ˈdiyeenallá he Messíya#17:3 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. ííni, muí gáál yie. 4Aalé gál Yuuˈdi-, ˈdáá tikiˈd ubaa gál burnay Hellen-, Waag kikiatká ubaa ˈdeglé luuteká ˈdeeny Báulo ubaa Sílas hí huogodheká iiy yie, gáál ˈdú fame.
5Aalé mú Báulo gál ilishká hí ˈdú fameká gál Yuuˈdi giri íín ˈdéé iiy ma yéenká đo hinááf hí faanne. Gaal đalaallá chure, gaal ˈjien gálle hol ˈdú vie, ˈjien gaalí shalal ˈdisie. Nyesebich lullé giriká Yáson#17:5 Rooma 16:21 ˈbílle ˈdú kirite, ˈbíl mure, giri Báulo ubaa Sílas gálaat met ká egewká. 6Aalé gaal he gáál ˈdabeká gaal Yáson ubaa gál nyaaram mare ká ˈgiiliˈgay, gáál ˈjien gállé hí met ki ˈgieká ˈdú eey. Gaal kúóˈd ˈdoy, kieye, Léskúnno hé gál les lúl ˈdeeneyká hí kí fame, 7gáál hé Yáson hí shuunne, hí dheeˈgle hote! Gálallá ubaa gál kinaallá lulle hé hemuumurit Kaisar el af gaa tame, kieye, Kánsích éíy taaka Yíésu lé mare hé les gaa ijo, he yegedhe, gaalí yie. 8Aalé nyesebich ubaa ˈjien gállé guguđoká lulle ˈdeenyéél maaleká seerey. 9Aalé gaal Yáson ubaa gál nyaaram kinaal bíre gaa guteká gáál hay, gaal sedhe.
ˈJien Berya gálle ˈdeeny mú Báulo hí ki ˈdiiyimeká iiy yie
10Aalé biiy he chuurayyeká gál giri nyaaramká đo Báulo ubaa Sílas é yé gaa ˈdeey, gáál ˈjien Berya ali ˈdú fie. Gaal he ál kinaal ki fameká gaal ˈbíl ˈdiiyiminy gál Yuuˈdiká sedhe. 11Gál ˈjien Berya hé gál ˈjien Dhesalonike ˈdú ˈdúwa, ˈdaa giri gaal ˈdeeny Báulo hí oonisieká hát he gaa feditiká nee kokoyká. Gaal bar lullé ˈdeeny Báulo hí ˈdiyimeká Warˈgat Waaˈgiet gaa dhaˈgame, ˈdéé eiy nanate, har Báulo ˈdeeny he hogodhe kinaal ˈdúúw kátaka. 12Aalé gál Yuuˈdi burnayká ubaa ˈdeg Hellen luuteká, tá gállé burnay yaab Hellenká fayam Báulo hí hogodheká iiy yie, lali Yiesu yie.
13Aalé gál Yuuˈdi-, giri ˈdeeny Yiesu điidhe-, Dhesaloníke gaa ijeká Báulo gálaat fayam Waaˈgiet ˈjien Berya gaa shigia maaleká, gaal geđi ál kinaal sedhe, gálaat chure, shalal les gaa eey. 14Aalé gál nyaaram-, Beryaká tíkíˈdé kinaal Báulo bás in eey. Sílas ubaa Tímote íín ˈjien kinaal ki ˈgite. 15Aalé gál giri Báulo eeyká mú Ádhenay đig hoy. Gaal Bérya hol ˈdu nanadheká Báulo gáál ˈdéé gaa kaay, giri Sílas ubaa Tímote mú ál ˈjob gaa higiloká.
Báulo ˈdeeny Waaˈgiet Ádhenay gaa ˈdiiyime
16Aalé Báulo hátlé Sílas ubaa Tímote Ádhenay ki egeseká mu ˈjien Adhenay kinaal waagam hodhoká hí koch arge, mú súm geer hí gaa ˈdeenedhe. 17Aalé Báulo gál Yuuˈdi-, ubaa gál Hellen-, Waag iiy yieká ˈbíl ˈdiiyiminyká álle fayam Yiesu af gaa kuokoy. Mu úba alb gabaayaká bar lulle gál hí gaa ijeká ˈdeeny kinaal af gaa kuokoy. 18Mu ál gabaaya kinaal gál gaalí Ebekúre yeget-, ubaa gál éíy taaka gaalí Sitóyik yeget-, lullé kas hí he ká shugunat mare hol ˈdéé ˈdú naannie. Gál kinaal ˈbáál hí kieye, Máá éésh mánnal in meete ká hogodho? yie. Aalé gáál ˈdáá tikiˈd kieye, Máállá in taalle waagam éíy taaka kidhdhoká gáál má ki ˈdiyéen? yie. Gaal hatal yíéllá he ˈdaa giri mu gáál fayam Yiesu ubaa gálaat uushim yé gáá ˈdímle ˈdeenyle ki ˈdiiyimeká.
19Aalé gaal Báulo gurmit gaalí Areyobágus yeget-, álle karu hí le ˈdaraan-, hí ˈdeem gaa iđimuo mare ˈdú eedhdhe. Gaal ál kinaal ki ˈdieká mú heete, kieye, Ebá he onisiny kua káána ˈdiyeennóóllá nyí ka géesh, nyí maalla. 20Kuun ˈdeeny kálta nétkínyo hí ma máálinyká nyí ká geđicha. Aalé káána ˈdeenyééllá hélle nyí eiy kí nanniyyoká nyí feˈde, gaalí mú yie. 21(Gál ˈjien Adhenay ubaa gál lés éíy taaka ál kinaal gaa ijeká hé éíy taaka he nannieká mán, gaal bar lulle he oonisiny kaanaká ubaa kas kaana galaatká he nee kokoy, he hol geđie.)
22Aalé Báulo Areyobágus álle kinaal karu ˈdeem iđimuoká met ki ˈdie, gáál geey, kieye, It Adhenayallo, itín hát hí waagam kíchia burnayká hát ˈdabaanká el gaa igiˈdaká yáá arge. 23Yú af giri ˈjienkícho gaa seseme-, hé giri hí waagam ki ˈditeká yú dhaˈgameká, kúb suoryo gaalí gaar gaa ˈgeˈgey-, gaar veeritle kieye,hééllá waag gaalí muogká ke ki ˈdisse, chieká yú arge. Waag hí muog-, kor hí vivisat kinaallá he Waag yú hí kí ˈdiyeenallá.
24Waag giri les ubaa héllé lúl hí gaa ijoká ká kuonneká he Máá Guđo-, úr ubaa les mé ki yaalká. Mu hé ény gil gálaat hí mú ki ˈdisseká ma gaa yíéđiminy. 25Waag kinaal hé níínní ˈdabiyye-, gálaat hí tág ki nannuoká mán, ˈdaa giri íín tuuˈdle gálaat sidham gaa koyye-, gálaat he lulle shigichoká. 26Waag kinaallá kidh lullé les ˈdú ijóóllá mú tikiˈde he yé gáá ˈdeeyche, giri gaal les lúl gaa yíéđianká. Ííni úba kidh albanollé he yíéđianká ubaa kidh ˈdaab les gaa yíéđianká muˈde. 27Waag hééllá tág ka niiyyééllá he giri gálaat hí hol gaa ˈgeˈgedho-, hí hol gaa eebisat-, hí af kí ˈdeenká. Tá muun hé máá níínní muí gaa fágká mán, 28ˈdaa giri mu gáál sidh gaa koy-, ke mú gim gaa ijo-, ke mú gim gaa seseenká. Hát tikiˈdééllá gál kíchia ˈdeem hí kar ma gaa ˈdaraminy mare úba hé hí hodhe-, giri gaal kieye, Muun ke mú umlé, gaalí yieká.
29Aalé ˈdaa giri múún ke um Waaˈgietká ha ke Waag gil ony hí kate-, hí hórkí ubaa sibilaam tá waar tág gaa niiyyeká ke gaa sísin. 30Bííy heleká Waag hé gálaat đeemléél hol ma héésen, kor káána hé gálaat he ki muˈde, giri gaal héllé ˈdeđew-, gaa seseenká haađuo-, mú makan fafaanká. 31Waag hé kúlích ˈdeeká taak koyye. Kúlích kinaallá máá muí gíl ki helieká ˈdeem hát ˈduwantiká gálaat eiy hai ki nannaa. Waag hééllá ˈduuwle hé gálaat lulle argisiche, hé máá kinaal uushich yé gáá ˈdeeyche, Báulo hí gáál yie. 32Aalé gál giri mú af nee kokoyká ˈbaal ˈdeeny uushich yé gaa ˈdímííl maaleká ˈdéé eeshey, ˈbaal hí kieye, Nyíín ˈdeenyééllá aadh éíy taaka ha nyí ko gaa maalla, gaalí mú yie. 33Aalé Báulo káru in ká sedhe. 34Aalé gál ˈbaal ál kinaal ijeká Báulo ˈdú fame, lali Yiesu yie. Gál kinaal mú tikiˈd he ˈDionúsios giri karu gurmit Areyobagus ˈdéé gaa iđimieká máállé, ubaa min gaalí ˈDámaris yegie mare, tá gál éíy taaka ˈdéé iiy yieká.
Currently Selected:
He Ekeny Gál Alb Fimiká 17: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
