1 Macabeo 2
2
Ang Kamatinumanon ni Matatias
1Niadtong panahona, usa ka pari sa banay ni Joarib nga ginganlag Matatias, anak ni Juan ug apo ni Simeon, mibalhin gikan sa Jerusalem ug mipuyo sa Modin. 2Si Matatias adunay lima ka anak nga lalaki: si Juan (ginganlan usab ug Gadi#2:2 GADI: Sa ato pa, Palaran o Bulahan.), 3si Simon (ginganlan usab ug Tasi#2:3 TASI: Walay tino ang kahulogan.), 4si Judas (ginganlan usab ug Macabeo#2:4 MACABEO: Sa ato pa, ama sa Martilyo, o tingali laing porma sa ngalang Macabias nga sa ato pa, Pinili ni Yahweh.), 5si Eleazar (ginganlan usab ug Abaran#2:5 ABARAN: Sa ato pa, abtik.) ug si Jonatan (ginganlan usab ug Apus#2:5 APUS: Sa ato pa, Gipangandoy.).
6Sa pagkakita ni Matatias sa tanang mga sala nga gihimo didto sa Judea ug sa Jerusalem, 7miingon siya:
“Nganong natawo man ako aron pagtan-aw niining makalilisang nga mga butang,
sa pagkagun-ob sa akong nasod ug sa Balaan nga Siyudad?
Maglingkod ba lamang ako dinhi nga walay mahimo sa pagtabang
samtang ang siyudad gitahan ngadto sa mga kaaway
ug ang Templo nahulog ngadto sa mga kamot sa mga langyaw?
8Ang Templo nahisama sa usa ka tawo nga walay dungog.
9Ang iyang harianong mga kahimanan
gipanala ingon nga butang nga sinakmit.
Ang atong mga kabataan gipamatay didto sa kadalanan,
ug ang atong mga batan-ong lalaki gipatay sa espada sa kaaway.
10Tanang nasod sa kalibotan mianha sa siyudad
ug misakmit sa iyang mga kabtangan.
11Ang tanan niyang mga dayandayan gipanglangkat;
nahimo na karon siyang usa ka ulipon ug dili na gawasnon.
12Tan-awa ang atong Templo, gipanamastamasan sa mga dili Judio,
gikuhaan sa tanan niyang katahom.
13Nganong magpadayon man kita sa pagpakabuhi?”
14Tungod sa ilang kasakit, gigisi ni Matatias ug sa iyang mga anak ang ilang mga bisti, nagsul-ob sila ug bisting sako ug nagpadayon sa dakong pagbangotan.
15Unya ang mga opisyal sa hari, nga nagpugos sa mga tawo sa pagtalikod sa Dios, miabot sa lungsod sa Modin aron pagpugos sa mga tawo didto sa paghalad sa mga sakripisyo nga pagano. 16Daghan sa mga Israelita misugat kanila, lakip si Matatias ug ang iyang mga anak nga lalaki. 17Ang mga opisyal sa hari namulong kang Matatias, “Ikaw usa ka tinahod nga pangulo niining lungsora ug ikaw gipaluyohan sa imong mga anak ug mga paryenti. 18Nganong dili ka man mag-una dinhi sa pagbuhat sa gisugo sa hari? Ang tanang mga dili Judio, ang katawhan sa Judea ug ang tanang mga tawo nga nahabilin sa Jerusalem naghimo na niini. Kon magbuhat ka niini, ikaw ug ang imong mga anak pasidunggan sa titulo nga ‘Mga Higala sa Hari,’ ug gantihan ikawg plata ug bulawan ug daghan nga mga gasa.”
19Si Matatias mitubag sa makusog nga tingog, “Dili ko igsapayan kon ang tanang dili Judio niining emperyo magtahod sa hari ug motuman sa sugo sa pagbiya sa relihiyon sa iyang mga katigulangan. 20Ako, ang akong mga anak ug ang akong mga paryenti magpadayon sa pagtuman sa kasabotan nga gihimo sa Dios uban sa among mga katigulangan. 21Uban sa panabang sa Dios dili gayod kami mobiya sa iyang Balaod o mosupak sa iyang mga sugo. 22Dili kami motahod sa kasugoan sa hari ug dili namo ilisan ang among paagi sa pagsimba bisan sa labing gamay.”
23Igo siyang nahuman sa pagsulti, usa sa mga lalaki nga gikan sa Modin mihukom sa pagtahod sa kasugoan sa hari ug milakang atubangan sa tanan aron paghalad ug usa ka sakripisyo nga pagano ibabaw sa altar nga nagbarog didto. 24Sa pagkakita ni Matatias kaniya, nasuko siya pag-ayo ug sa iyang kasuko gibuhat niya ang angay buhaton. Mikurog siya sa kapungot, midagan ug gipatay niya ang tawo didto gayod sa altar. 25Gipatay usab niya ang opisyal sa hari nga nagpugos sa mga tawo sa pagsakripisyo ug unya iyang giguba ang altar. 26Niining#Num. 25:6-15. paagiha gipakita ni Matatias ang iyang dakong gugma sa Balaod sama sa gibuhat ni Pinehas nga pagpatay kang Zimri, anak nga lalaki ni Salu.
Ang Gerilyang Pamaagi sa Pakiggubat ni Matatias
27Unya si Matatias milatas sa lungsod ug misinggit, “Kamong tanan nga matinumanon sa kasabotan sa Dios ug nagsugot sa iyang Balaod, sunod kamo kanako!” 28Human niini, siya ug ang iyang mga anak mikagiw ngadto sa kabukiran ug gibiyaan nila ang tanan nga ilaha.
29-30Niadtong panahona usab, daghan sa mga Israelita nga nangita sa pagkamatarong atubangan sa Dios pinaagi sa pagtahod sa Balaod, nanlakaw aron adto mopuyo sa kamingawan. Gidala nila ang ilang mga anak, ang ilang mga asawa ug ang ilang mga kahayopan tungod sa makalilisang nga pagdaugdaog nga ilang giantos. 31Wala madugay ang taho miabot ngadto sa mga opisyal sa hari ug sa mga sundalo didto sa kota sa Jerusalem nga may pipila ka mga tawo nga naghagit sa sugo sa hari ug nangagiw ngadto sa kamingawan aron pagtago. 32Usa#2 Mac. 6:11. ka dakong pundok sa mga sundalo migukod kanila ug hiapsan sila. Nagkampo atbang kanila ang mga kaaway ug nangandam sa pag-asdang kanila sa Adlaw nga Igpapahulay. 33Gisinggitan nila ang mga Judio sa pag-ingon, “Aduna pay panahon. Panggula kamo ug tahora ang sugo sa hari ug dili kamo namo patyon!”
34Mitubag sila, “Dili kami manggula. Dili kami motahod sa sugo sa hari ug dili namo panamastamasan ang Adlaw nga Igpapahulay.”
35Dihadiha gisulong sila sa mga sundalo. 36Apan ang mga Judio walay gihimo aron pagsukol ug wala gani sila molabayg bato o motak-op sa mga ganghaan sa mga langub diin sila nanago. 37Miingon sila, “Magpakamatay kaming tanan nga hinlo ug konsensya. Pasaksiha ang langit ug ang yuta nga gipatay kami ninyo nga walay katarongan.” 38Busa giataki sila sa kaaway sa Adlaw nga Igpapahulay ug gipatay ang mga lalaki, ang ilang mga asawa, ang mga kabataan ug ang ilang mga hayop. Usa ka libo ka tawo ang nangamatay.
39Sa pagkadungog ni Matatias ug sa iyang mga higala sa balita mahitungod niini, nasubo sila pag-ayo 40ug nag-ingnanay, “Kon kitang tanan magbuhat sama sa gibuhat sa atong mga isigka-Judio ug magdumili kita sa pagpakiggubat sa mga dili Judio aron pagpanalipod sa atong mga kinabuhi ug sa atong relihiyon, sa dili madugay mapapas kita sa nawong sa yuta!” 41Niadtong adlawa mihukom sila nga kon adunay bisan kinsa nga mosulong kanila sa Adlawng Igpapahulay, manalipod sila sa ilang kaugalingon aron dili silang tanan mangamatay sama sa nahitabo sa ilang isigka-Judio nga nanago didto sa mga langub.
42Unya miabin kang Matatias ug sa iyang mga higala ang usa ka pundok sa mga matinumanon kaayo sa Balaod nga gilangkoban sa labing kusganon ug maisog nga mga lalaki sa Israel nga miboluntaryo sa paglaban sa Balaod. 43Dugang niini, ang tanan nga milikay sa panglutos mitipon kanila ug milig-on sa ilang pundok. 44Karon nga aduna na silay pundok sa kasundalohan, gipahungaw nila ang ilang kasuko pinaagi sa pagsulong sa mga Judio nga mabudhion. Kadtong nakalingkawas napugos sa pagdangop ngadto sa mga dili-Judio aron dili sila mamatay. 45Si Matatias ug ang iyang mga higala nanuroy sa tanang dapit ug gipangguba nila ang mga altar nga pagano 46ug gipugos nila pagpanuli ang tanang mga kabataang lalaki nga ilang hikaplagan nga wala pa matuli sulod sa mga utlanan sa Israel. 47Malampuson usab sila sa pagpangita sa mga mapahitas-on nga mga opisyal nga dili Judio. 48Gipalingkawas nila ang Balaod ni Moises gikan sa pagpasipala sa mga dili Judio ug sa ilang mga hari ug gibungkag nila ang gahom sa daotang hari nga si Antioco.
Ang Kamatayon ni Matatias
49Sa pag-abot sa panahon nga hapit na mamatay si Matatias, miingon siya ngadto sa iyang mga anak, “Kini mao ang mga panahon sa katalagman ug sa paggamit sa kusog. Ang mga tawo nga mapahitas-on maoy anaa sa gahom ug gibugalbugalan kita nila. 50Apan kamo, mga anak ko, kinahanglan nga magmahigugmaon sa Balaod ug andam sa pagpakamatay aron paglaban sa kasabotan sa Dios uban sa atong mga katigulangan. 51Hinumdomi ninyo unsa ang gihimo sa atong mga katigulangan ug pagkadaghan sa ilang nabuhat sa ilang panahon. Sunda ang ilang panig-ingnan ug gantihan kamog dakong himaya ug kabantog nga walay kamatayon. 52Hinumdomi#Gen. 15:6; 22:15-18. ang pagsalig ni Abraham sa Ginoo sa diha nga siya gisulayan ug ang pagkahimuot ug pagdawat sa Ginoo kaniya. 53Si#Gen. 39:1–45:28. Jose, sa panahon sa iyang kagul-anan, mitamod sa mga sugo sa Dios ug nahimong magmamando sa yuta sa Ehipto. 54Si Pinehas nga atong katigulangan, tungod sa iyang nagdilaab nga gugma, gisaaran nga ang iyang mga kaliwat sa kanunay maoy mahimong mga pari. 55Si#Num. 13:1–14:12. Josue gihimong usa ka maghuhukom sa Israel tungod kay mitahod siya sa sugo ni Moises. 56Si Caleb nagdala pagbalik sa usa ka maayong taho ngadto sa katilingban ug gihatagan ug usa ka bahin sa yuta agig ganti. 57Si#2 Sam. 7:16. David gihimong hari ug gisaaran nga ang iyang mga kaliwat sa kanunay maoy mahimong hari tungod sa iyang pagkamakanunayon sa pag-unong sa Dios. 58Si#2 Hari 2:9-12. Elias, tungod sa iyang dakong gugma sa Balaod, gidala ngadto sa langit. 59Si#Dan. 3:8-30. Ananias, si Azarias ug si Misael giluwas gikan sa kalayo tungod kay aduna silay pagtuo. 60Si#Dan. 6:1-24; Bel 31-42. Daniel maoy tawo nga maligdong ug giluwas siya sa Ginoo sa baba sa mga liyon. 61Himoa ang tagsatagsa niining atong mga katigulangan nga usa ka panig-ingnan ug makaamgo kamo nga walay bisan kinsa nga mosalig sa Ginoo nga nakulangan sa kusog. 62Ayaw kamo kahadlok sa mga hulga sa usa ka tawo nga daotan. Hinumdomi ninyo nga mamatay siya ug ang tanan niyang kaharianon matapos, ug ang nagkadunot niyang lawas kan-on sa mga wati. 63Karon tingali siya pinasidunggan kaayo, apan ugma mahanaw siya. Ang iyang lawas mobalik ngadto sa yuta ug ang iyang pakalaki mosangko sa pagkatapos. 64Apan kamo nga akong mga anak, pagmalig-on ug pagmaisog diha sa paglaban sa Balaod kay pinaagi sa Balaod makadangat kamo sa dakong himaya.
65“Ang inyong igsoon nga si Simon maalamon busa pamati kamo kanunay kaniya sama sa inyong pagpamati kanako. 66Si Judas Macabeo makusganon sa tibuok niyang kinabuhi busa siya maoy mangulo ug magdala kaninyo sa gubat batok sa kaaway. 67Tawga ang tanan nga nagtuman sa Balaod sa Dios aron modapig sila kaninyo unya ipanimalos ninyo ang mga kalapasan nga gihimo batok sa inyong katawhan. 68Panimasli ninyo ang mga dili Judio tungod sa ilang mga nabuhat ug tumana kanunay ang Balaod ug ang mga kasugoan niini.”
69Unya gipanalanginan sila ni Matatias ug namatay siya. 70Gilubong siya sa lubnganan sa iyang banay didto sa Modin ug ang tanang mga tawo sa Israel nagbangotan pag-ayo tungod kaniya. Nahitabo kini sa tuig 146.#2:70 TUIG 146: Mitakdo kining petsaha sa tuig 166 B.C.
Currently Selected:
1 Macabeo 2: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.