AWIT SA MGA AWIT 6
6
Ang mga Babaye
1Diin ba padulong ang imong hinigugma,
O labing maanyag sa mga babaye?
Diin ba padulong ang imong hinigugma,
aron nga kami mangita kaniya uban kanimo?
Ang Babaye
2Ang akong hinigugma miadto sa iyang tanaman,
ngadto sa tanaman sa mga panakot,
aron magpasibsib sa iyang panon sa mga karnero sulod sa mga tanaman,
ug sa pagtigom ug mga liryo.
3Ako iya sa akong hinigugma, ug ang akong hinigugma akoa;
siya nagpasibsib sa iyang panon sa mga karnero taliwala sa mga liryo.
Ang Ikalimang Awit
Ang Lalaki
4Maanyag ikaw sama sa Tirsa, O akong hinigugma,
matahom sama sa Jerusalem,
makalilisang sama sa kasundalohan uban sa mga bandila.
5Ilingiw ang imong mga mata gikan kanako,
kay sila naghasol kanako.
Ang imong buhok sama sa usa ka panon sa mga kanding
nga naglugsong sa mga bakilid sa Gilead.
6Ang imong mga ngipon sama sa usa ka panon sa mga karnero nga baye
nga nanungas gikan sa pagpanghugas;
ang tanan nanganak ug kaluha,
ug walay bisan usa nga namatay gikan kanila.
7Ang imong mga aping sama sa mga pinikas nga granada
luyo sa imong pandong.
8Adunay 60 ka rayna ug 80 ka puyopuyo,
ug mga ulay nga dili maihap.
9Ang akong salampati, hingpit nga walay sama, usa ra,
ang pinalangga sa iyang inahan,
walay tatsa niadtong nanamkon kaniya.
Ang mga dalaga nakakita kaniya ug nagtawag kaniya nga bulahan;
ang mga rayna ug ang mga puyopuyo usab, ug sila nagdayeg kaniya.
10“Kinsa ba kana siya nga naglantaw sama sa kabuntagon,
matahom sama sa bulan, sanag sama sa adlaw,
makalilisang sama sa kasundalohan uban sa mga bandila?”
11Ako miadto sa tanaman sa mga almendras,
sa pagtan-aw sa mga bag-ong nanubo sa walog,
sa pagtan-aw kon namulak na
ba ang paras, ug namutot na ba ang granada.
12Sa wala pa nako kini hibaloi, ang akong kalag mipahiluna kanako
diha sa karwahi tupad sa akong pangulo.#6:12 Ang bersikulo 12 lisod sabton sa Hebreo.
Ang Mga Babaye
13Balik, balik, O Sulamhanon,
balik, balik, aron kami makasud-ong kanimo.
Ang Babaye
Ngano nga motan-aw kamo sa Sulamhanon,
ingon sa sayaw sa duha ka sundalohan?#6:13 duha kasundalohan o Mahanaim.
Currently Selected:
AWIT SA MGA AWIT 6: ABCEB
Highlight
Share
Compare
Copy
Want to have your highlights saved across all your devices? Sign up or sign in
©Philippine Bible Society, 2011
