AWIT SA MGA AWIT 5
5
Ang Lalaki
1Mianhi ako sa akong tanaman, igsoon ko, akong pangasaw-onon,
gitigom nako ang akong mira uban ang akong panakot,
gikaon nako ang akong udlan uban ang sa akong dugos
giinom nako ang akong bino uban ang akong gatas.
Ang Babaye
Pangaon kamo, O mga higala, ug panginom;
daghana pag-inom, O mga hinigugma.
Ang Ikaupat nga Awit
Ang Babaye
2Ako natulog, apan ang akong kasingkasing nagmata.
Pamatia! Ang akong hinigugma nagtuktok.
Ang Lalaki
“Ablihi ako, igsoon ko, akong hinigugma,
akong salampati, hingpit nga walay sama;
kay ang akong ulo nabasa sa yamog,
ang akong mga buhok sa mga tinulo sa kagabhion.”
Ang Babaye
3Gihukas na nako ang akong bisti,
unsaon man nako pagsul-ob niini?
Nahugasan na nako ang akong mga tiil,
unsaon man nako paghugaw niini?
4Ang akong hinigugma mibutang sa iyang kamot diha sa buho sa pultahan,
ug natandog ang akong kasingkasing alang kaniya.
5Mibangon ako aron sa pag-abli alang sa akong hinigugma;
ug ang akong mga kamot nagtulo sa mira,
ang akong mga tudlo uban sa nagtubod nga mira,
diha sa mga kuptanan sa trangka.
6Ako miabli alang sa akong hinigugma,
apan ang akong hinigugma mipahawa na ug milakaw.
Ang akong kalag nagpakyas kanako
sa diha nga misulti siya.
Gipangita nako siya, apan wala nako
siya makaplagi;
gitawag nako siya, apan wala siya
motubag kanako.
7Ang mga tigbantay nakakita kanako,
samtang naglibot sila sa siyudad;
ila akong gibunalan, ila akong gisamaran;
ang mga tigbantay sa mga paril,
ilang gikuha ang akong kupo.
8Ako maghangyo kaninyo, O mga anak
nga babaye sa Jerusalem,
kon makaplagan ninyo ang akong hinigugma,
nga inyo siyang suginlan nga
ako nasakit gumikan sa gugma.
Ang mga Babaye
9Unsa bay labaw sa imong
hinigugma kay sa lain nga hinigugma,
O labing maanyag sa mga kababayen-an?
Unsay bay labaw sa imong hinigugma kay sa lain nga hinigugma,
nga naghangyo man ikaw kanamo sa ingon?
Ang Babaye
10Ang akong hinigugma masanag ug himsog,
inila taliwala sa napulo ka libo.
11Ang iyang ulo lunsay gayod nga bulawan;
ang iyang buhok kulongon,
itom sama sa uwak.
12Ang iyang mga mata sama sa mga salampati
daplin sa mga tubig sa kasapaan,
hinugasan sa gatas, ug maayo nga
pagkahiluna.#5:12 Lisod sabton ang bersikulo sa Hebreo.
13Ang iyang mga aping sama sa tanaman sa mga panakot,
naghatag sa kahumot.
Ang iyang mga ngabil mga liryo, nga nagtulo sa mira.
14Ang iyang mga bukton bulawan
nga gibutangan ug mga mahalong bato.
Ang iyang lawas tango sa elepante nga kinulitan,#5:14 Ang kahulogna sa Hebreo lisod sabton.
dinayandayanan ug mga sapiro.
15Ang iyang mga paa
mga haligi nga alabastro,
gipahiluna sa mga tungtongan nga bulawan.
Ang iyang panagway sama sa Lebanon,
pinili sama sa mga sedro.
16Ang iyang pagpanulti labing tam-is,
siya sa kinatubuk-an angayng tinguhaon.
Kini mao ang akong hinigugma, ug mao kini ang akong higala,
O mga anak nga babaye sa Jerusalem.
Currently Selected:
AWIT SA MGA AWIT 5: ABCEB
Highlight
Share
Compare
Copy
Want to have your highlights saved across all your devices? Sign up or sign in
©Philippine Bible Society, 2011
