PINADAYAG 21
21
Ang Bag-ong Langit ug ang Bag-ong Yuta
1 #
Isa. 65:17; 66:22; 2 Ped. 3:13. Unya akong nakita ang usa ka bag-ong langit ug ang usa ka bag-ong yuta, kay ang unang langit ug ang unang yuta nangahanaw na man, ug ang dagat wala na. 2#Isa. 52:1; Pin. 3:12; Isa. 61:10. Ug nakita nako ang balaang siyudad, ang bag-ong Jerusalem, nga nanaog gikan sa langit gikan sa Dios, inandam sama sa usa ka pangasaw-onon nga gidayandayanan alang sa iyang pamanhonon. 3#Ezek. 37:27; Lev. 26:11, 12. Ug nadungog nako gikan sa trono ang usa ka dakong tingog nga nag-ingon, “Tan-awa, ang puluy-anan sa Dios anaa uban sa mga tawo. Siya magpuyo uban kanila ug sila mahimo nga iyang mga katawhan, ug ang Dios gayod mao ang magkig-uban kanila ug mahimo nga ilang Dios.#21:3 ug mahimo nga ilang Dios: Wala sa ubang karaang sinulat. 4#Isa. 25:8; Isa. 35:10; 65:19. Iyang pahiran ang tanang luha gikan sa ilang mga mata, ug ang kamatayon wala na, ug wala na usab unyay pagminatay o paghilak o kasakit kay ang unang mga butang nangagi na.”
5Ug ang naglingkod sa trono miingon, “Tan-awa, akong gibag-o ang tanang mga butang.” Siya miingon, “Isulat kini, kay kining mga pulonga kasaligan ug matuod.” 6#Isa. 55:1. Ug siya miingon kanako, “Natapos na! Ako mao ang Alfa ug ang Omega, ang sinugdan ug ang kataposan. Kaniya nga giuhaw ihatag nako nga walay bayad ang tubig gikan sa tuboran sa tubig sa kinabuhi. 7#2 Sam. 7:14; Sal. 89:26-27. Ang magmadaogon makapanunod niini ug ako mahimo nga iyang Dios ug siya mahimo nga akong anak. 8Apan alang sa mga talawan, sa mga walay pagtuo, sa mga dulumtanan, sa mga mamumuno, ug sa mga makihilawason, sa mga salamangkiro ug sa mga nagsimba ug mga diosdios, ug sa tanang mga bakakon, ang ilang bahin anaa sa linaw nga nagdilaab sa kalayo ug asupri, nga mao ang ikaduhang kamatayon.”
Ang Bag-ong Jerusalem
9Unya mitungha ang usa sa pito ka anghel nga may pito ka panaksan nga napuno sa kataposang pito ka katalagman, ug kanako misulti siya nga nag-ingon, “Duol ngari, akong ipakita kanimo ang Pangasaw-onon, ang asawa sa Nating Karnero.” 10#Ezek. 40:2. Ug diha sa Espiritu gidala niya ako ngadto sa usa ka dako ug taas nga bukid, ug iyang gipakita kanako ang balaang siyudad nga Jerusalem nga nanaog gikan sa langit gikan sa Dios, 11nga may himaya sa Dios, nga ang kasanag sama sa usa ka batong mahalon nga talagsaon kaayo, sama sa batong haspe, tin-aw daw kristal. 12#Ezek. 48:30-35. Kini adunay dako ug habog nga paril nga may napulo ug duha ka ganghaan, ug sa mga ganghaan dihay napulo ug duha ka anghel, ug diha sa mga ganghaan nasulat ang mga ngalan sa napulog duha ka banay sa kaliwatan ni Israel. 13Diha sa silangan may tulo ka ganghaan, sa amihanan may tulo ka ganghaan, diha sa habagatan may tulo ka ganghaan, ug sa kasadpan may tulo ka ganghaan. 14Ug ang paril sa siyudad may napulo ug duha ka patukoranan, ug diha kanila ang mga ngalan sa napulo ug duha ka apostoles sa Nating Karnero.
15 #
Ezek. 40:3. Ug ang nakigsulti kanako may sukdanan nga bulawan aron isukod sa siyudad ug sa mga ganghaan ug mga paril niini. 16Ang siyudad nahimutang nga kuwadrado, ang iyang gitas-on sama sa iyang gilapdon, ug pinaagi sa iyang sukdanan iyang gisukod ang siyudad ug kini napulo ug duha ka libo ka stadion.#21:16 NAPULO UG DUHA KA LIBO KA STADION: Sa ato pa mga 2,400 ka kilometro. Managsama ang iyang gitas-on ug ang gilapdon ug ang kahabogon. 17Gisukod usab niya ang paril niini, kini usa ka gatos ug kap-atan ug upat ka maniko,#21:17 USA KA GATOS KAP-ATAN UG UPAT A MANIKO: mga 60 ka metro. sumala sa sinukdan sa tawo, ang gigamit sa anghel. 18#Isa. 54:11-12. Ang paril hinimo ug batong haspe, samtang ang siyudad lunsayng bulawan, tin-aw daw bildo. 19Ang mga patukoranan sa paril sa siyudad gidayandayanan sa tanang matang sa mga batong mahalon, ang una haspe, ang ikaduha sapiro, ang ikatulo kalsidonya, ang ikaupat esmiralda, 20ang ikalima sardonika, ang ikaunom kornalina, ang ikapito krisolito, ang ikawalo birilo, ang ikasiyam topasyo, ang ikanapulo krisopraso, ang ikanapulo ug usa hasinto, ang ikanapulo ug duha amatista. 21Ug ang napulo ug duha ka ganghaan hinimo gikan sa napulo ug duha ka perlas, ang matag ganghaan hinimo sa usa lamang ka buok perlas, ug ang kadalanan sa siyudad lunsayng bulawan, tin-aw daw bildo.
22Ug wala akoy nakitang templo sa siyudad, kay ang templo niini mao man ang Ginoong Dios nga Makagagahom sa Tanan ug ang Nating Karnero. 23#Isa. 60:19-20. Ug ang siyudad wala na magkinahanglan ug adlaw o bulan sa pagdan-ag niini, kay ang himaya sa Dios mao man ang kahayag niini, ug ang suga niini mao man ang Nating Karnero. 24#Isa. 60:3. Pinaagi sa kahayag sa siyudad manglakaw ang mga nasod, ug ang mga hari sa kalibotan magdala sa ilang himaya ngadto niini, 25#Isa. 60:11. ug ang iyang mga ganghaan dili gayod tak-opan panahon sa adlaw kay wala may gabii didto, 26Ilang dad-on ngadto niini ang himaya ug kadungganan sa kanasoran. 27#Isa. 52:1; Ezek. 44:9. Apan dinhi niini walay bisan unsa nga hugaw nga pasudlon, ang naghimo ug mga dulumtanan o bakak, kondili sila lamang nga nasulat diha sa basahon sa kinabuhi nga iya sa Nating Karnero.
Currently Selected:
PINADAYAG 21: ABCEB
Highlight
Share
Compare
Copy
Want to have your highlights saved across all your devices? Sign up or sign in
©Philippine Bible Society, 2011
