Agecin 2
2
Kemba ma rieko
1Nyathi paran, k'inowinji wac paran,
t'itero or paran paka gima dicwe i in.
2K'inociki ithin ri rieko,
t'iyawo adundo perin niaŋ,
3k'inorangi bero,
t'ilwoŋo niaŋ,
4k'inodwar go paka feza,
t'idwaro go paka gima dicwe m'opondo,
5nyaka ibino niaŋ dwoŋ ma lworo Rwoth,
t'inwaŋo ŋeyo Were.
6Kole Rwoth ama miyo rieko,
wok i dhok go ŋeyo gi niaŋ jobino.
7Go kano rieko manyakare ri joma timo gim'otire,
go obedo kwot pa ji ma bubanja.
8Go kuro jono ma jotimo bero ri wadi gin,
aka lithi gi jono ma jomaro go.
9Ka winowinjan, nyaka wilaniaŋ timo gim'otire, tiro gi bero,
wilaŋeyo gima wiripo timo.
10Wilabedo gi rieko iy'adundo mewin,
aka ŋeyo mewin lamiyo win kisangala.
11Adieri mewin lakuro win,
to niaŋ kwonga win.
12Bino botho win kwoŋ timo gimarac,
kwoŋ jono ma joluwo kicar.
13Jono ma joweyo yo m'otire,
aka jowotho i yo ma mudho,
14ma jofore i timo gimarac,
aka josiemere i gimiŋo marac,
15jono ma yo pajo k'otire,
aka tim pajo rac.
16Ibino nyalo ciro dhako ma jakidakana,
ma luwere kicar m'otemi dwoŋin gi wac pere mamit,
17dhako ma wiye wil gi cwore ma soye,
wiye wil gi cikirok pa Were pere.
18K'ikidho i ot pere,
meno iwotho i yo ma kidho i piny pa jom'otho.
19Jono je ma jowendo rigo jokidwoki,
jokigiki i yo ma kwo.
20Riameno woth i yo pa ji mabeyo,
aka idoŋ i yo pa jom'otire.
21Rupiri ji mabeyo jolabedo i piny,
aka ji ma bubanja joladoŋ'iye.
22To jokidakana ilaneko jo woko i piny,
t'ifudho woko joreco i iye paka doy.
Currently Selected:
Agecin 2: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.