Kwan 4
4
Tic pa Jolevi ma Kohath
1Rwoth oluwo gi Musa kodi Aron, ka waco ni: 2Kwan nyikway Kohath wok i dier nyikway Levi gi nonin pajo gi udi pa kwarere pajo, 3cako oro piero adek tundo i oro piero abic. Jono je ma jonyalo timo tic ma makere kodi Wema ma romo. 4Tic pa nyikway Kohath me i Wema ma romo mako kwoŋ gigipiny maleŋ loyo.
5Ka kambi oay, Aron gi wote jobino donjo to jolunyo nanga ma umo, to joumo Kakan ma Cikirok gine. 6Nyaka jobino jengo i wiye pien mafoth ma umo, to joyaro i wiye nanga manyabululu iye je, aka jobino ketho gute mere i kare. 7I wiy meza ma mugat maleŋ m'imiyo Rwoth jolayaro nanga manyabululu, t'ijengo i wiye sendere mere, bakulere ri buban, siniya, kodi jagi ma mic ma math; mugat ma kisi ndelo bende labedo i wiye. 8Kenyo jolayaro i wiy jo nanga m'obokere, to joumo gi pien mafoth, to joketho gute i kare. 9Jobino kwanyo nanga manyabululu, to joumo gine raŋaw tala ri lero, gi talin mere, kitambi mere, kabangala mere, kodi atewe ma mo mere ma jolaoro ma poko. 10Jobino ketho gi gigipiny mere je i giumo ma pien mafoth, to joketho i miango ma tiŋo.
11I wiy migam ma zahabu jolayaro nanga manyabululu, to joumo gi pien mafoth, aka jobino ketho gute mere i kare. 12Jobino kwanyo gigipiny ma tic je m'ioro i Kabedo Maleŋ, to joketho i nanga manyabululu, to joumo gi pien mafoth, to joketho jo i wiy miango ma tiŋ. 13Jobino jowo woko buru wok i migam, to joyaro nanga ma rangi ariŋo i wiye. 14Jobino ketho i wiye gigipiny ma migam je, m'ioro ma timo tic kenyo, kabangala, uma, kitiyin, kodi kalayere, gigipiny je ma migam; aka jolayaro i wiye giumo ma pien mafoth, to joketho gute mere i kare. 15Ka Aron kodi wote jotieko umo Kabedo Maleŋ kodi kombere mere, kareno kambi ay, rumacen nyikway Kohath jolabino to jotiŋo, to jokiripi geyo gigipiny maleŋ, kosa jonyalo tho. Me gigipiny ma Wema ma romo ma nyikway Kohath joripo tiŋo.
16Eliazar wod pa Aron jacway ri Were i wi migam labedo jakur ma mo ma lero, buban maŋwe kur, mic ma kodhi ma kisi hongo, gi mo ma wir, kuro tabenakulo parom gi gimoro je manitie i iye, i Wema kodi gigipiny mere.
17Kenyo to Rwoth luwo gi Musa kodi Aron, ka waco ni: 18Wikiri wiŋadi woko nono madwoŋ ma nono pa Kohath wok i dier Jolevi. 19Me apaka wiripo tic gi jo ŋey jowokwo ma jok'otho ka jocore cegin gi gigipiny maleŋ loyo: Aron gi wote jobino donjo to jomiyo kisi ŋat'acel tic kosa bieto. 20To Jolevi ma nono pa Kohath jokiripi donjo i iye ma mito neno gigipiny maleŋ kada nyak'adec; kosa jolatho.
Tic pa Jolevi ma nono pa Gerison
21Kenyo Rwoth oluwo gi Musa, ka waco ama: 22Kwan nyikway Gerison bende, gi udi pa kwarere pajo kodi nonin pajo. 23Cako i oro piero adek tundo oro piero abic ilakwano jo, joje ma jonyalo timo tic i Wema ma romo. 24Me a tic pa Jolevi ma Gerison, i timo tic kodi tiŋo gigipiny me. 25Jolatiŋo nanga ma umo tabenakulo, kodi Wema ma romo gi giumo mere, gi giumo ma woko ma pien mafoth manitie i wiye, kodi ndewiro ri dhiot ma Wema ma romo. 26Aka nanga ma umo kapido kodi ndewiro ma dhiot ma waŋkac ma kapido m'othoko tabenakulo kodi migam, gi thondhe kodi gigipiny ma tic pajo; aka jolatimo gimoro je ma ripo atima ma mako jo.
27Tic je mapa nyikway Gerison bino bedo paka Aron gi wote jowaci rijo, i kisi gimoro je ma jotiŋ, kodi i kisi gimoro je ma jotim; aka ibino miyo jo gimoro je ma jotiŋ. 28Me a tic pa nyikway Gerison ma mako kwoŋ Wema ma romo, aka Ithamar wod pa Aron ama laneno ni jotimo tic pajo.
Tic pa Jolevi ma nono pa Merari
29Paka ri nyikway Merari, ikwani jo gi nonin pajo kodi udi pa kwarere pajo. 30Cako i oro piero adek tundo i oro piero abic, joje ma jonyalo timo tic ma Wema ma romo.
31Me a tic pajo paka jotic i Wema ma romo: Joripo tiŋo miango ma tabenakulo, gi nywenye mere, sirin, kodi pende, 32sirin ma kapido thoko iye je gi pendi jo, loce, thondhe, kodi gigipiny mere je gi tic ma makere gi jo je. Iripo cwoko nyingi kisi gimoro ma joripo tiŋo. 33Me a tic pa nyikway Merari ma makere gi Wema ma romo, tic pajo je ma makere gi Wema ma romo, ma jadwoŋ mere obedo Ithamar wod pa Aron jacway ri Were i wi migam.
Kwano Jolevi
34Ameno Musa kodi Aron kodi jotel ma kacokirok jokwano nyikway Kohath, gi nonin pajo gi udi pa kwarere pajo. 35Cako i oro piero adek tundo oro piero abic, joje m'oyido jonyalo timo tic ma makere kodi Wema ma romo; 36aka welo pajo cungo kwoŋ nonin obedo 2,750. 37Me welo pa nyikway Kohath, jono je ma jotiyo i Wema ma romo, ma Musa kodi Aron jokwano luwo kwoŋ or pa Rwoth ri Musa.
38Me welo pa nyikway Gerison, gi nonin pajo kodi udi pa kwarere pajo, 39cako i oro piero adek tundo oro piero abic, joje ma jonyalo timo tic ma makere kodi Wema ma romo; 40welo pajo gi nonin pajo gi udi pa kwarere pajo oyido obedo 2,630. 41Me welo pa nyikway Gerison, joje ma jotiyo i Wema ma romo, ma Musa kodi Aron jokwano luwo kwoŋ or pa Rwoth.
42Me welo ji ma nonin pa nyikway Merari, gi nonin kodi udi pa kwarere pajo, 43cako i oro piero adek tundo oro piero abic, joje ma jonyalo timo tic ma Wema ma romo. 44Welo pajo gi nonin pajo oyido obedo 3,200. 45Me welo pa nyikway Merari, ma Musa kodi Aron jokwano luwo kwoŋ or pa Rwoth.
46Jono je m'okwan jo kwoŋ Jolevi, ma Musa kodi Aron gi jotel ma Isiraili jokwano, gi nonin pajo gi udi pa kwarere pajo, 47cako i oro piero adek tundo oro piero abic, joje ma jonyalo timo tic kodi tic ma bielo bieto ma makere kodi Wema ma romo, 48welo pajo je obedo 8,580. 49Luwo kwoŋ or pa Rwoth m'omiyo Musa omiyo jo timo tic kweth ma timo gigipiny kosa tiŋo. Ameno apaka go okwano jo, paka Rwoth omiyo Musa or.
Currently Selected:
Kwan 4: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
