Kwan 3
3
Wot Aron
1Me a nyikway Aron kodi Musa i hongo ma Rwoth oluw'iye gi Musa wi Got Sinai. 2#Kwan 26:60Me a nyingi wot Aron: Nadab obedo okayo, Abihu, Eliazar, kodi Ithamar. 3Me a nyingi wot Aron, jocway ri Were i wi migam m'owir jo gi mo, timo tic paka jocway ri Were i wi migam. 4#Jolevi 10:1-2; Kwan 26:61To Nadab kodi Abihu jotho ruwaŋ Rwoth munyo jocowere gi mac ma k'oyey ruwaŋ Rwoth i thim ma Sinai, aka onwaŋo jongoye gi nyithindho. Eliazar kodi Ithamar jotiyo paka jocway ri Were i wi migam i hongo pa bajo Aron.
Iketho Jolevi tic paka jocway ri Were i wi Migam
5Rwoth oluwo gi Musa ka waco ni: 6Keli nono pa Jolevi cegin, aka ikethi jo ruwaŋ Aron jacway ri Were i wi migam, ŋey jowonyal konyo go. 7Jolatimo rigo tic kodi ri kweth ro nyim Wema ma romo, ka jotiyo i tabenakulo. 8Jolabedo jokur gigipiny je ma makere gi Wema ma romo, to jotimo tic je ri Joisiraili ka jotiyo i tabenakulo. 9Ibino miyo Jolevi ri Aron kodi nyikwaye; omiyo jo kicutho rigo wok i dier Joisiraili. 10Ibino ketho Aron kodi wote ma timo tic pa jocway ri Were i wi migam; nyatoro man je ma bende otemi timo ameno iripo neko.
11Rwoth oluwo gi Musa ka waco ni: 12E ajolo Jolevi wok i dier Joisiraili i kabedo pa nyithindho makayo ma joyawo ici i dier Joisiraili. Jolevi jolabedo aparan, 13kole nyithindho makayo je jobedo aparan; munyo aneko nyithindho makayo je i piny ma Misir, aketho gicen okayin je i Isiraili ri an won, ji kodi ogwaŋe parom; jolabedo aparan. An abedo Rwoth.
Kwano Jolevi
14Kenyo to Rwoth luwo gi Musa i thim ma Sinai, ka waco ni: 15Kwan Jolevi gi udi pa kwarere pajo kodi nonin. Ibino kwano kisi jacwo cako i dwe acel kadho malo. 16Ameno to Musa kwano jo cungo kwoŋ wac pa Rwoth, paka omiyo go or. 17Me a nyingi wot Levi, gi nyingi jo: Gerison, Kohath kodi Merari. 18Me a nyingi wot Gerison gi nonin pajo: Libini kodi Simey. 19Wot Kohath gi nonin pajo: Amran, Izar Hebron, kodi Uziel. 20Wot Merari gi nonin pajo: Mali kodi Musi. Me a nonin pa Jolevi, gi udi pa kwarere pajo.
21Wok kwoŋ Gerison obedo nono pa Libini kodi nono pa Simey; me am'oyido jonono pa Gerison. 22Kwan pajo, k'okwan cwo je cako i dwe acel kadho malo, onwaŋo obedo gana abirio gi miya abic. 23Nonin pa Gerisom oyido joripo jocokirok yucen ma tabenakulo yuwok ceŋ, 24gi Eliasaf wod pa Layel paka jatel ma ot pa kwarere ma udi pa Gerison. 25Tic pa wot Gerison i Wema ma romo onwaŋo obedo kuro tabenakulo, wema kodi giumo mere, nanga ma geŋo kadonjo ma Wema ma romo, 26gima umo kapido, nanga umo kadonjo ma kapido m'othoko tabenakulo kodi migam, gi thondhe kodi tic je ma mako kwoŋ gime.
27Wok kwoŋ Kohath owok nono pa Amran, nono pa Izar nono pa Hebron, kodi nono pa Uziel; me a jonono pa Kohath. 28Cwo je m'okwan, cako dwe acel kadho malo, onwaŋo nitie gana aboro gi miya aucel, m'oyido jotimo tic ma Kabedo Maleŋ Loyo. 29Jonono pa nyikway Kohath jolacokere yuthenge ma yupiny ma tabenakulo, 30kodi Elizafan wod pa Uziel paka jatel ma nono pa Kohath. 31Tic pajo oyido obedo ma kuro Kakan ma Cikirok, meza, raŋaw tala, migame, atewe ma jocway ri Were i wi migam oyido jooro i Kabedo Maleŋ, kodi nanga ma geŋo dhiot ma Kabedo Maleŋ Loyo kodi tic je ma makere gine. 32Eliazar wod pa Aron jacway ri Were i migam oyido obedo jadwoŋ kwoŋ jotel pa Jolevi aka jatel pa jokur waŋkac.
33Wok kwoŋ Merari obedo jonono pa Mali kodi nono pa Musi: Me a nonin pa Merari. 34Joje kanyacel k'okwan cwo wok dwe acel kadho malo, oyido obedo gana aucel gi miya ario.
35Jatel ma nono pa Merari onwaŋo obedo Zuriel wod pa Abihayili; oyido joripo ketho kambi pajo yumalo ma tabenakulo. 36Aka tic pa wot Merari oyido obedo kuro gi tiŋo tabenakulo, nywenye, sirin, pende, kodi gigipiny je ma makere gine, kodi tic man je ma mako gime; 37bende gi sirin ma diedipo thoko, gi pendi jo, loce, kodi thondhe mere.
38Jono m'oyido joripo ketho kambi pajo yuwaŋ tabenakulo yuwok ceŋ, ruwaŋ Wema ma romo yuthenge ma yuwok ceŋ oyido obedo Musa kodi Aron gi wote, ka jotimo tic ma Kabedo Maleŋ, kisi gimoro je m'oyido iripo timo ri Joisiraili; aka japath moro je m'ocore cegin iripo neko. 39Jolevi je ma Musa kodi Aron jokwano luwo kwoŋ or pa Rwoth, cungo kwoŋ nonin pajo, cwo je wok i dwe acel kadho malo, onwaŋo obedo 22,000.
Jolevi jotero kabedo p'okayin
40Kenyo to Rwoth waco ri Musa ni, “Kwan nyithindho ma cwo makayo je ma Isiraili, wok dwe acel kadho malo, aka ikwani jo gi nyingi jo. 41Iripo kwanyo ran Jolevi, Abedo Rwoth; i kabedo p'okayin je i dier Joisiraili, aka gi le pa Jolevi i kabedo p'okayin je i dier le pa Joisiraili.” 42Ameno bende Musa okwano okayin je i dier Joisiraili, paka Rwoth omiyo go or. 43Nyithindho makayo je kanyacel m'okwan wok i dwe acel kadho malo, kwano nyingi jo, onwaŋo obedo 22,273.
44Kenyo Rwoth oluwo gi Musa, ka waco ni: 45Kwany Jolevi i kabedo p'okayin je i dier Joisiraili, kodi le pa Jolevi i kabedo pa le pajo; aka Jolevi jolabedo aparan. Abedo Rwoth. 46Ma botho okayin ma Isiraili 273 maloyo kosa kalo apa Jolevi iripo nyewo, 47Ilakwanyo nusu siringi abic, k'ipima kodi siringi ma Kabedo Maleŋ, siringi piero ario m'opima paka mitere. 48Pesa me ibino miyo Aron gi wote m'obothi gine welo pajo m'okale.
49Ameno Musa okwanyo pesa ma both kwoŋ jono m'oyido jokalo jono ma Jolevi jobotho; 50okwanyo pesa kwoŋ okayin pa Joisiraili, 1,365 m'opima kodi pesa ma Kabedo Maleŋ. 51To Musa miyo Aron gi wote pesa ma both cungo kwoŋ wac pa Rwoth, paka Rwoth oyido otieko miyo Musa or.
Currently Selected:
Kwan 3: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
