Kwan 36
36
Gir'alunja pa mon ma jonywomere
1Jotel ma pecin ma nonin pa nyikway Giliad wod pa Makir aka nyakwar Manase, janono pa Yozefu, jowok to joluwo ruwaŋ Musa kodi jotel ma pecin ma Isiraili. 2Jowaco ni, “Rwoth owodho or ri jadwoŋ mawan miyo Joisiraili lunjo lowo gi bolo kwir, aka Rwoth owodho or ri jadwoŋ mawan miyo gir'alunja p'omin wan Zelofehad ri nyiki go. 3To ka jonywomere i nono ma Isiraili man, kenyo gir'alunja pajo ilakwanyo woko wok i gir'alunja pa kwarere pajo t'imedo i gir'alunja ma nono ma jonywomer'iye, aka alunja mawan lamojere. 4Ka oro ma piero abic otundi, kenyo ilamedo gir'alunja pajo i nono ma jonywomer'iye, aka ilapoko woko kwoŋ gir'alunja ma nono pa kwarere mawan.”
5Kenyo Musa owodho or ri Joisiraili cungo kwoŋ wac pa Rwoth ka waco ni, “Nyikway Yozefu jotire i gima jowaco. 6Me apaka Rwoth owodho or kwoŋ nyir pa Zelofehad, ‘Weyi jowonywomere gi ŋata joparo nike ber; kende joripo nywomirok i nono pa bajo. 7I nger no wongoye gir'alunja pa Joisiraili m'ilakodo wok i nono man kadho i nono man. Kole Joisiraili je joripo doŋ gi gir'alunja ma nono pa kwarere pajo. 8Kisi nyathi manyako m'olunji lim i nono moro je ma Isiraili ripo nywomere gi janono pa bamere, ŋey Joisiraili jowomedere lunjo lim ma nono pa kwarere pajo. 9Ongoye lim m'ilakodo wok i nono man kadho i nono man. Kole kisi nono ma Isiraili ladoŋ gi lim pere won.’ ”
10Nyir pa Zelofehad jotimo paka Rwoth owodho or ri Musa. 11Mala, Tiriza, Hogla, Milika kodi Nowa, nyithindho pa Zelofehad jonywomere gi wot wutmin bajo. 12Jonywomere i nonin pa nyikway Manase wod pa Yozefu, aka lim pajo odoŋ i nono pa bajo.
13Me or kodi cik ma Rwoth owodho or luwo bongi Musa ri Joisiraili i kam'obipere ma Mowab i thengi malawa Yordan i Yeriko.
Currently Selected:
Kwan 36: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
