Kwan 35

Tindin madongo m'opok Jolevi

1 # Yos 21:1-42 Rwoth oluwo gi Musa i kam'obipere ma Mowab i thengi malawa Yordan i Yeriko ka waco ni, 2Wodhi or ri Joisiraili miyo Jolevi tindin ma jolabed'iye wok i lim pajo. Iripo bende miyo jo lowo ma kwath m'othoko tindin. 3Tindin labedo apa joma jolabed'iye, aka lowo ma kwath labedo ri dhok pajo, ri mwendi pajo kodi ri ogwaŋe pajo. 4Lowo ma kwath, m'ilamiyo ri Jolevi, lawok yuwoko wok i kor tindi madwoŋ mita 450 i kisi thenge. 5Ilakipima woko ma tindi madwoŋ mita 900 i kisi thenge, gi tindi madwoŋ i diere. Me labedo kakwath ri tindi pajo. 6Ilamiyo Jolevi tindin aucel ma pondo kama dhano nyalo ring'iye ka oneko nyawote ma k'ogendera. Medo i wiye ilamiyo Jolevi tindin piero aŋwen g'ario. 7Tindin m'ilamiyo Jolevi je ripo bedo piero aŋwen g'aboro, kiri gi lowo ma kwath pajo je. 8K'imiyo Jolevi tindin wok i lim pa Joisiraili, wok i nonin madongo ilakwanyo mathoth, aka wok i nonin mathindho ilakwanyo manok, cungo kwoŋ dwoŋo ma adec mere rom.

Tindin madongo ma pondo

(Cik 19:1-13; Yos 20:1-9)

9 # Cik 19:2-4; Yos 20:1-9 Rwoth oluwo gi Musa ka waco ni, 10Luw gi Joisiraili aka iwaci rijo ni, “Ka wiŋado malawa Yordan kadho i lowo ma Kanan, 11wiripo yero tindin madongo paka kapondo mewin, ŋey ŋat'oneki nyawote ma k'oŋeyo nyalo ringo kenyo. 12Tindin madongo no labedo riwin kapondo kwoŋ ŋata mito culo kwor, ŋey nyatoro m'oneko dhano wokiri wotho cuka iwinjo banja ruwaŋ Lwak. 13Tindin madongo ma wilayero labedo aucel. 14Wilayero tindin madongo adek kalo Yordan, kodi tindin madongo adek i lowo ma Kanan paka tindin madongo ma pondo. 15Tindin madongo aucel me jolabedo paka kapondo ri Joisiraili kodi jopath je i dier win, ŋey nyatoro ma oneki dhano ma k'oŋeyo woringi kenyo.”

16“To nyatoro m'ogoy nyawote gi cuma, to wok'iye tho, obedo janek aka iripo neko go. 17Nyatoro m'ogoy nyawote gi tele i cinge manyalo kelo tho, aka owok'iye tho, obedo janek, aka iripo neko go. 18Nyatoro m'ogoy nyawote gi mbawo manyalo kelo tho, aka owok'iye tho, obedo janek, aka iripo neko go. 19Ŋata culo kwor ama ripo neko janek; ka joromo, to jaculi kwor neko janek.”

20“I nger acel ka nyatoro odhiro nyawote ro dakirok, kosa okur nyawote to bolo kwoŋe gimoro. To wok'iye tho, 21kosa ro kwor nyatoro ogoy nyawote g'adol cinge, to wok'iye tho, ŋat'owito adol obedo janek. Jaculi kwor ripo neko go ka joromo.”

22“To ka nyatoro odhiro nyawote abwap m'ongoye kwor, kosa obol gimoro kwoŋe ma k'okuro go, 23kosa ka oyido omako tele manyalo neko dhano, to bolo kwoŋ nyawote to wok'iye tho, makada nende oyido jok'obedo jokwor, aka atoŋa moro je oyido ongoye, 24kenyo lwak ripo thumo banja i dier jaculi kwor kodi janek, cungo kwoŋ cik me. 25Lwak ripo botho janek wok i cingi jaculi kwor to dhiro janek gik i tindin madongo ma pondo. Janek ripo bedo kenyo cuka jadwoŋ pa jocway ri Were i wi migam m'owir gi mo maleŋ otho. 26To ka janek i hongo moro je owok woko ma kew ma tindi madwoŋ ma pondo, 27aka jaculi kwor orom gi go to neko go, jaculi kwor kilabedo gi banja ma nek. 28Janek ripo doŋ i tindi madwoŋ ma pondo cuka jadwoŋ pa jocway ri Were i wi migam otho. Rumacen ma tho pa jadwoŋ pa jocway ri Were i wi migam, janek nyalo dok peco. 29Me labedo cik riwin kodi nyikway win je i luse je kisi kama winobed'iye.”

30 # Cik 17:6; 19:15 “Ka nyatoro oneko nyawote, iripo neko janek ka ji jotieko miyo jakony; to wongoye dhano ma woneki gi miyo kony pa dhano acel. 31Wikiripi jolo cul ri kwo pa janek m'iripo neko, janek iripo neko. 32Wikiripi jolo cul ri ŋat'oringo i tindi madwoŋ ma pondo, yeyo janek dok peco mafodi jadwoŋ pa jocway ri Were i wi migam k'otho. 33Wikiripi koco lowo ma wibed'iye, kole remo koco lowo, aka ongoye cul m'inyalo miyo ri lowo ri remo m'ooy'iye, kwanyowoko gi remo pa ŋat'oy'iye. 34Wikiripi koco lowo ma wibed'iye, ma an bende abed'iye, kole an Rwoth abedo i dier Joisiraili.”

Currently Selected:

Kwan 35: DHOPE

Highlight

Copy

Compare