Matayo 17
17
Lokirok ma cal pa Yesu
(Mar 9:2-13; Luk 9:28-36)
1Rumacen ma ndelo aucel, Yesu okwanyo Petero kodi wutmere Yakobo gi Yohana, to tero jo wi got mabor kakendi gin. 2To go lokere ruwaŋ jo kenyo: Waŋe olokere maliel pa waŋceŋ, aka nangin pere olokere matar pa lero. 3Gikenyo jofonjirok no joneno menyirok pa Musa kodi Elia munyo joluwo gi Yesu. 4Gino omiyo Petero oluwo ka waco ri Yesu ni, “Rwoth, ber wabedi ka; k'iyenyo, abino gero ka kayindere adek, acel aperin, man apa Musa, gi man apa Elia.” 5#Cak 22:2; Zab 2:7; Isa 42:1; Mat 3:17; 12:18; Mar 1:11; Luk 3:22; Cik 18:15#2 Pet 1:17-18Munyo go oyido fodi luwo, pondeponde matar obino to thoko jo aka dwondi moro m'owok i pondeponde owaco ni, “Me Wodan m'amaro kendo asangala gine; winji win go!” 6Munyo jofonjirok jowinjo dwondi me, jogore piny ma jokulo wiy gin kareno lworo omako jo. 7Yesu obino bongi jo to geyo jo, to waco ni, “Ay win malo. Wikiri wibedi malwor!” 8Aka munyo joŋiyo malo jok'oneno dhano moro je kwanyo woko Yesu won kende.
9Munyo jotieko loro wok wi got, Yesu ociko jo teltel ni, “Wikiri wiwaci ri moro kwoŋ gim'onenere me cuka Wod Dhano otiek cerino kwoŋ jom'otho.” 10#Mal 4:5Gikenyo jofonjirok jopenjo Yesu ni, “Raŋo ma jondiko jowaco ni Elia kutho ripo pen bino?” 11Yesu odwoko ni, “Elia ama kutho pen bino, aka go ripo yiko kisi gimoro wobedi i kare. 12#Mat 11:14To awaco riwin, Elia otieko kiri bino to ji jok'oŋeyo go, aka jotimo rigo paka joyenyo. I royo acel Wod Dhano bende bino candere i cingi jo.” 13Gikenyo jofonjirok joniaŋ nike go luwo rijo kwoŋ Yohana Jakibatisa.
Yesu botho jayac ma jwogi ni kwoŋe
(Mar 9:14-29; Luk 9:37-43a)
14Munyo jotundo bongi lwak ji, jal moro obino bongi Yesu, ogoyo conge ruwaŋe, 15aka owaco ni, “Jadwoŋ, tim wor ri wodan! Go tho fum ma monjo go marac aka miyo go podho noknok i mac kosa i pi. 16Akelo go bongi jofonjirok perin to jok'onyalo botho go.” 17Yesu odwoko ni, “A ji ma buyeyo ma jok'otire! Anobedi gi win kiri keraŋo? Anodiy cunyan gi win kiri keraŋo? Keli jayac no bongan ka!” 18Yesu ooro jwogi no wok to wok, to jayac no both gi i hongo no won.
19Gikenyo jofonjirok jobino bongi Yesu nyaliŋliŋ to jopenjo go ni, “Raŋo ma wakinyalo riemo woko jwogi no?” 20#Mat 21:21; Mar 11:23; 1 Kor 13:2Yesu odwoko ni, “Ro yeyo mewin manok. Adieri awaco riwin, bedi winitie gi yeyo marom gi nyingi kalantus, diwinyalo waco ri got me ni, ‘Eye ka ikadhi yukoca.’ To bende timo ameno, aka ongoye gima dik'onyalere riwin. 21[To jwogi nger me, kiwoki kwanyo woko ka kwayo gi riyo obedo”].
Yesu doko luwo kwoŋ tho pere
(Mar 9:30-32; Luk 9:43b-45)
22Munyo jofonjirok je jobino kanyacel i Galili, Yesu owaco rijo ni, “Wod Dhano icegin kisita go t'iketho go i cingi ji, 23aka jobino neko go; to ndelo mar'adek ibino cerino go kwoŋ jom'otho.” Jofonjirok cuny gin oramo jo swa.
Culo misolo ma Ot pa Were
24 #
Wok 30:13; 38:26 Munyo Yesu kodi jofonjirok pere jobino Kapernaum, jocoki misolo ma Ot pa Were jobino bongi Petero to jopenjo go ni, “Jafonji mewin culo misolo ma Ot pa Were?” 25Petero odwoko ni, “Go culo.” Munyo Petero odonjo i ot, Yesu ama open luwo malo ni, “Simon, iparo nedi? Kerin ma piny jocoko tonton kosa misolo kwoŋ jokune? Kwoŋ ji pajo wegi kosa kwoŋ jowiloka?” 26Petero odwoko ni, “Kwoŋ jowiloka.” Ana Yesu, “Am'omiyo, dwoŋ mere ni ji ma piny no jonitie i siem, jokicul. 27To wakimiti ramo cuny jome, am'omiyo kidhi i wakawaka ibol'iye siraget; kwany rec m'inoyway marapena, aka i dhoke ibino nwaŋ'iye pesa ma feza ma roman kodi win culo misolo ma Ot pa Were; kwany iculi jo misolo mawan.”
Currently Selected:
Matayo 17: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
