Jolevi 4
4
Mic ma cwako reco
1Rwoth oluwo gi Musa, ka waco ama: 2Luw gi Joisiraili iwaci rijo ni: Ka moro otimo reco ma k'oŋeyo to turo or pa Rwoth moro je, gi timo acel kwoŋ gigipiny ma kiripi timo.
3Ka jacway ri Were i wi migam m'owir gi mo am'otimo reco, to kelo banja kwoŋ ji, go lamiyo rwath m'ongoye gi ŋolo paka mic ma cwako reco ri Rwoth. 4Go lakelo thwon i dhiot ma wema maleŋ ruwaŋ Rwoth, laketho cinge i wic thwon; aka ilathumo thwon ruwaŋ Rwoth. 5Jacway ri Were i wi migam m'owir gi mo lakwanyo remo moro to kelo i Wema ma romo. 6Jacway ri Were i wi migam lalutho lwet cinge i remo to kiro remo moro dibirio ruwaŋ Rwoth yuwaŋ nanga m'oliero i Kabedo Maleŋ. 7Jacway ri Were i wi migam laketho remo moro i tunge migam ma buban maŋwe kur manitie ruwaŋ Rwoth i Wema ma romo. Aka remo m'odoŋ go lakonjo i tiendi migam ma mic awaŋa, manitie i dhiot ma Wema ma romo. 8Go lawaro woko bor je ma thwon ma mic ma cwako reco; bor je ma umo gigipiny ma iye, 9roge ario je kodi bor mere, kodi adec maber loyo ma cuny, 10paka ikwanyo wok i thwon ma cowirok ma siem. Jacway ri Were i wi migam lawaŋo i wi migam ma mic awaŋa. 11To pien thwon kodi riŋo mere, wic mere, olenge, gigipiny ma iye, kodi woyo mere, 12thwon gibe m'odoŋ, go latiŋo woko kam'olony woko ma kambi, kam'idhur'iye buru, aka ilawaŋo gi yen kam'ikonj'iye buru.
13Ka lwak Joisiraili gibe jotimo reco ma jok'ogendera to panere i waŋ jo, to jotimo gimoro acel kwoŋ gigipiny ma or pa Rwoth kwero timo aka jobedi gi banja; 14ka joniaŋ rumacen reco ma jotimo, kenyo lwak lakelo rwath ri mic ma cwako reco ruwaŋ Wema ma romo. 15Jodongo pa lwak jolaketho cingi jo i wic thwon ruwaŋ Rwoth, aka ilathumo ruwaŋ Rwoth. 16Jacway ri Were i wi migam lakelo remo thwon moro i Wema ma romo. 17Jacway ri Were i wi migam lalutho lwet cinge i remo to kiro dibirio ruwaŋ Rwoth kodi yuwaŋ nanga m'oliero. 18Go laketho remo moro i tunge migam manitie ruwaŋ Rwoth i Wema ma romo. Aka remo m'odoŋ go lakonjo i tiendi migam ma mic awaŋa manitie i dhiot ma Wema ma romo. 19Go lawaro woko bor mere je to waŋo i wi migam. 20Go latimo gi thwon me paka otimo gi thwon ma mic ma cwako reco. Jacway ri Were i wi migam lamiyo mic ma cwako reco pajo, aka ilacwako rijo. 21Go latiŋo thwon me gibe to tero woko ma kambi, aka lawaŋo paka thwon marapena; obedo mic ma cwako reco pa lwak.
22Ka jadhum otimo reco, ma go k'oŋeyo, to timo acel kwoŋ gigipiny ma or pa Rwoth Were pere kwero to bedo jabanja, 23tekin go niaŋ kwoŋe, go lakelo paka mic pere wod diel m'ongoye gi ŋolo. 24Go laketho cinge i wic diel, aka ilathumo kam'ithum'iye mic awaŋa ruwaŋ Rwoth, paka mic ma cwako reco. 25Jacway ri Were i wi migam lakwanyo remo moro gi lwet cinge to ketho i tunge migam ma mic awaŋa, aka remo m'odoŋ go lakonjo i tiendi migam ma mic awaŋa. 26Bor mere je go lawaŋo i wi migam, paka bor ma cowirok ma siem. Ameno jacway ri Were i wi migam lamiyo mic ma cwako reco pere, aka ilacwako rigo.
27 #
Kwan 15:27-28
Ka nyatoro kwoŋ ji ma lowo me otimo reco ma k'oŋeyo, gi timo acel kwoŋ gigipiny ma or pa Rwoth kwero, to bedo jabanja, 28tekin go niaŋ kwoŋe, go lakelo min diel m'ongoye gi ŋolo paka mic, ri reco ma go otimo. 29Go laketho cinge i wic mic ma cwako reco, aka ilathumo i kabedo ma mic awaŋa. 30Jacway ri Were i wi migam lakwanyo remo moro gi lwet cinge to ketho i tunge migam ma mic awaŋa. Aka remo m'odoŋ go lakonjo i tiendi migam. 31Go lawaro woko bor mere je, paka waro ma mic ma siem, aka jacway ri Were i wi migam lawaŋo i wi migam ri ŋwece kur mamit ri Rwoth. Ameno jacway ri Were i wi migam lamiyo mic ma cwako reco rigo, aka ilacwako rigo.
32Ka mic m'ikelo paka mic ma cwako reco obedo rombo, ripo bedo min rombo m'ongoye gi ŋolo. 33Ilaketho cingin i wic mic no, aka ilathumo paka mic ma cwako reco kam'ithum'iye mic awaŋa. 34Jacway ri Were i wi migam lakwanyo remo ma mic ma cwako reco moro gi lwet cinge to ketho i tunge migam ma mic awaŋa. Aka remo m'odoŋ go lakonjo i tiendi migam. 35Go lawaro woko bor je, paka bor ma wod rombo ma cowirok ma mic ma siem. Jacway ri Were i wi migam lawaŋo i wi migam, paka mic m'iwaŋo ri Rwoth. Ameno jacway ri Were i wi migam lamiyo mic ma cwako reco perin ri reco m'itimo, aka ilacwako rin.
Currently Selected:
Jolevi 4: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
