Jolevi 3
3
Mic ma siem
1Ka nyatoro miyo mic ma siem, k'obedo dhiaŋ, thwon kosa merikwa, ripo bedo m'ongoye gi ŋolo ruwaŋ Rwoth. 2Ilaketho cingin i wic mic t'ithumo i dhiot ma Wema ma romo. Jocway ri Were i wi migam, wot Aron jolakiro remo thoko migam. 3Aka ilamiyo wok i cowirok ma mic ma siem, paka mic ma siem ri Rwoth, bor je ma umo gigipiny ma iye, 4roge ario je kodi bor mere, kodi adec maber loyo ma cuny. 5Wot Aron jolawaŋo i wi migam, gi mic awaŋa manitie i wi yen i mac, paka mic m'owaŋ gi mac maŋwe kur mamit ri Rwoth.
6Ka mic perin obedo rombo kosa diel paka cowirok ma mic ma siem ri Rwoth, siwen kosa wode, ripo bedo m'ongoye gi ŋolo. 7K'ikelo wod rombo paka mic perin, iripo kelo ruwaŋ Rwoth, 8t'iketho cingin i wic mere. Ilathumo ruwaŋ Wema ma romo, aka wot Aron jolakiro remo mere thoko migam. 9Ilamiyo bor ma cowirok ma mic ma siem, paka mic m'owaŋ ri Rwoth; yiwe maleny gibe, m'ilathumo gi ligongolo, kodi bor ma umo gigipiny ma iye. 10Roge ario je kodi bor ma umo i kowino, kodi adec mabor m'omakere ma wi cuny kodi i wi roge, go lakwanyo woko. 11Jacway ri Were i wi migam lawaŋo i wi migam paka mic ma cemo manyinge m'owaŋ gi mac ri Rwoth.
12Ka mic perin obedo wod diel, ilakelo ruwaŋ Rwoth, 13t'iketho cingin i wic mere. Ilathumo ruwaŋ Wema ma romo, aka wot Aron jolakiro remo mere thoko migam. 14Ilamiyo paka mic perin wok kwoŋe, paka mic ri Rwoth, bor ma umo gigipiny ma iye je, 15roge ario gi bor ma umo kowino, kodi adec maber loyo ma cuny. 16Jacway ri Were i wi migam lawaŋo i wi migam paka mic ma cemo manyinge m'owaŋ gi mac maŋwe kur mamit ri Rwoth. Bor je obedo apa Rwoth. 17Me obedo cik ma cil gi cil i luse mewin je, kama winobed'iye je; wikiripi camo bor je kodi remo je.
Currently Selected:
Jolevi 3: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
