Jolevi 11

Ogwaŋe m'olony kodi makoc

(Cik 14:3-21)

1Rwoth oluwo gi Musa kodi Aron aka owaco rijo ni: 2Luw win gi Joisiraili wiwaci rijo ni: Me ogwaŋe ma jonyalo camo kwoŋ cwec je manitie i piny. 3Ogwaŋ moro je ma tiende opokere, manitie gi par tiende, aka nyamo cemo dirio, nger no winyalo camo. 4To kwoŋ ogwaŋe ma jonyamo cemo dirio kodi ma tiendi jo opokere, wikiripi camo me: Ŋamia, kwoŋbedo nyamo cemo dirio, to tiende k'opokere dirio, koc riwin. 5Oyeyo ma tele, makada nende nyamo cemo dirio, to tiende k'opokere dirio; koc riwin. 6Oculu, makada nende nyamo cemo dirio, tiende k'opokere dirio, koc riwin. 7Mbiji, makada nende tiende opokere dirio aka nitie gi par tiende, to kinyam cemo dirio; koc riwin. 8Wikiripi camo riŋo pajo kosa mako ma jotho, jokoc riwin.

9Me winyalo camo kwoŋ gima kwo i pi. Gima nitie gi thwoke kodi magambala, i nam kosa i malawa, winyalo camo. 10Gim'ongoye gi thwoke kodi magambala i nam kosa i malawa, kwoŋ gima wotho i pi kodi makwo i pi, jobedo amien riwin. 11Jobedo amien riwin, wikiripi camo riŋo pajo, aka ma jotho wiripo tero paka amien. 12Kisi gim'ongoye gi thwoke kosa magambala ma kwo i pi obedo amien riwin.

13Aka me winyin ma jobedo amien riwin, wikiripi camo, jokoc riwin. Ango, acut, naminaka, 14otengo m'obokere kodi otengo macol gi nger je, 15nger agak je, 16bwoŋ maya, nger tula je, winyin ma nam, 17tula mathindho kodi madongo, magwi, 18gweno ma pi, tula ma thim, acut ma camo jo 19mbuluku, nger acik je, kilapembe, kodi kilafundo.

20Cwec ma jobwombi gin je ma jowotho gi tiendi jo aŋwen jokoc riwin. 21Kucel kwoŋ cwec ma jobwombi gin aka jowotho gi tiendi jo aŋwen, winyalo camo ma tiendi jo olwowere, aka joay malo. 22Me kwoŋ jo, winyalo camo, nger bonyo je, nger senene je, nger nyenje je, nger otwoŋo je. 23To ma jobwombi gin man je aka jonitie gi tiendi jo aŋwen, jokoc riwin.

24Me gima loko win makoc, ŋat'ogey m'otho labedo makoc tundo othieno. 25Ŋat'ogey m'otho je ripo lwoko nangin pere, aka labedo makoc tundo othieno. 26Ogwaŋe je ma tiende k'opokere dirio, aka ongoye gi par tiende, kosa kinyam cemo dirio, koc riwin, ŋat'ogey m'otho je labedo makoc. 27Ogwaŋe je ma jowotho gi lwet tiendi jo, kwoŋ ogwaŋe ma jotiendi gin aŋwen, jokoc riwin, ŋat'ogey m'otho labedo makoc tundo othieno. 28Ŋat'ogey m'otho ripo lwoko nangin pere, aka labedo makoc tundo othieno.

29Kwoŋ cwec ma jolak piny i lowo, me jokoc riwin; fuko, oyeyin, nger ragwe je, 30kambelimbeli, ŋec, kikome, othiololo, kodi ŋokino. 31Me jokoc riwin, kwoŋ ogwaŋe ma jolak piny; ŋat'ogey m'otho labedo makoc tundo othieno. 32Gima jopodh'iye je ka jotho labedo makoc, obedi atewe ma mbawo, nanga, pien, kutiya, gimoro je m'itiyo gine, iripo lwoko, aka nyaka wotiy gine. Labedo makoc tundo othieno to bedo m'olony. 33K'opodho iy'atewe ma lowo, labedo makoc, aka iripo baro woko. 34Cemo moro je ma pi ooy'iye wok iy'atewe no labedo makoc, kosa gir'amadha moro je m'oyido nitie i nger atewe no labedo makoc. 35Kisi gima delkwoŋ jo opodh'iye labedo makoc, obedi kendo kosa sigiri, kosa degi, iripo turo woko, jokoc riwin. 36Waŋ pi kosa kacoko pi labedo m'olony, to gim'ogey delkwoŋ jo iye labedo makoc. 37Ka delkwoŋ jo opodho i kodhi m'iripo cwoyo, labedo m'olony. 38To k'oyido okethi pi i kodhi, to delkwoŋ jo podh'iye, labedo makoc.

39Ka ogwaŋ ma wicamo otho, ŋat'ogey delkwoŋe je labedo makoc tundo othieno. 40Joma jocam riŋo mere joripo lwoko nangin pajo aka jolabedo makoc tundo othieno; jono ma jotiŋ delkwoŋe joripo lwoko nangin pajo aka jolabedo makoc tundo othieno.

41Cwec je ma jolak piny jobedo amien, wikiripi camo. 42Cwec ma jowotho gi iy jo, ma jowotho gi tiendi jo aŋwen, kosa jonitie gi tiendi jo kweth, cwec je ma jolak piny, wikiripi camo, kole jobedo amien riwin. 43Wikiripi kelo amien kwoŋ win gi cwec ma jolak; wikiripi kocirok gi jo, aka wibedi makoc. 44#Jolevi 19:2; 1 Pet 1:16Kole an, abedo Rwoth Were mewin, lokere win maleŋ, aka wibedi maleŋ, kole Aleŋ. Wikiripi kocirok gi cwec ma lak piny. 45Kole An abedo Rwoth, m'awodho win wok i lowo ma Misir, bedo Were mewin, riameno bedi win maleŋ, kole Aleŋ.

46Me cik ma mako kwoŋ ogwaŋe, winyin, kodi kisi cwec ma wotho i pi, kodi cwec je ma jolak piny, 47ma ketho pokirok i dier gimakoc kodi gim'olony, i dier cwec makwo m'icamo kodi ma kicam.

Currently Selected:

Jolevi 11: DHOPE

Highlight

Copy

Compare