Hagay 2

Dwoŋ ma Ot pa Were manyen

1Ka piero ario g'acel ma dwe mar'abirio, wac pa Rwoth obino luwo kwoŋ Hagay, jatuci wac Were ka waco ama: 2Mondo waci ri Zerubabel wod Salitiel gavana ma Yuda, Yesuwa wod Yehozadak jadwoŋ pa jocway ri Were i wi migam, kodi ji ma joboth, aka ipenji jo ni: 3#Ezira 3:12Ŋa kwoŋ win ma fodi odoŋ ma cango oneno ot me i dwoŋ mere macon? Kical riwin i waŋ win paka gim'ongoye? 4Kucel pama, bedi m'icwiny Zerubabel, me wac pa Rwoth, bedi m'icwiny Yesuwa wod Yehozadak, jadwoŋ pa jocway ri Were i wi migam, bedi win ma wicwiny, ji je ma lowo, me wac pa Rwoth, tiyi win, kole anitie gi win. Rwoth pa lwak jolweny waco. 5#Wok 29:45-46Cungo kwoŋ cikirok m'atimo gi win munyo wiwok i Misir, cunyan nitie i dier win, wikiri wibwok.

6 # Ebu 12:26 Kole Rwoth pa lwak jolweny waco ama: Dicel kendo, i hongo macek, alayengo polo kodi piny, nam kodi lowo m'othwo, 7aka alayengo nonin je, ŋey lim pa nonin je labino, aka alapoŋo ot me gi dwoŋ, Rwoth pa lwak jolweny waco. 8Feza obedo aparan, zahabu obedo aparan, me wac pa Rwoth pa lwak jolweny. 9Dwoŋ ma ot me labedo madwoŋ loyo ot macon, Rwoth pa lwak jolweny waco; aka siem labedo i kabedo me, Rwoth pa lwak jolweny waco.

Apuse kodi cikirok

10Ka piero ario g'aŋwen ma dwe mar'abuŋwen, i oro mar'ario ma dhum pa Dario, wac pa Rwoth obino luwo kwoŋ Hagay jatuci wac Were. 11Rwoth pa lwak jolweny waco ama: Mondo penji jocway ri Were i wi migam, k'iwaco ni, 12Ka mogo otiŋo riŋo maleŋ to tiŋo i rinda ma law pere to rinda geyo mugat kosa cemo, kosa vini, kosa mo, kosa cemo mogo je, nyalo lokere maleŋ? Jocway ri Were i wi migam jodwoko aka jowaco ni be.

13 # Kwan 19:11-22 Hagay openjo kendo ama: Ka ŋata koc ro geyo delkwoŋ gim'otho ogeyo kwoŋ gigipiny me, nyalo lokere makoc? Jocway ri Were i wi migam jodwoko ni ey, lokere makoc.

14Hagay odwoko ka waco ama: Ameno apaka nitie gi ji me, kodi nono me manitie ruwaŋan, ama apaka Rwoth waco; apaka tic je ma cingi jo nitie, aka gima jomiyo kenyo koc.

15To riameno, mondo, kethi win cuny win wok i ndelo me kadho yuwaŋe, wok i ndelo mafodi k'ojiengi tele wi tele i Ot pa Rwoth, 16wok munyo nyatoro obino i kidhur ma piero ario, to nwaŋo nyaka apar; munyo nyatoro obino i bur vini twomo atewe piero abic ma vini, to nwaŋo nyaka piero ario. 17Agoyo win kodi tic ma cingi win gi two ma nyeko cemo kodi pe; kucel wikidwoko bongan, Rwoth ama luwo. 18Mondo kethi win adundo mewin i ndelo me kadho yuwaŋe, wok ka piero ario g'aŋwen ma dwe mar'abuŋwen, wok i ndelo m'ocak'iye misingi ma Ot pa Rwoth; kethi win iy'adundo mewin. 19Nitie kodhi m'odoŋ i dero, vini, kosa yen makuyu, kosa pomo ma bende jonyak gimoro? Wok i ndelo me kadho yuwaŋe alamiyo win silwany.

Rwoth ciko silwany pere

20Wac pa Rwoth obino kendo madirio ri Hagay ka piero ario g'aŋwen ma dwe. 21Luw gi Zerubabel, gavana ma Yuda, iwaci ni: Acegin yengo polo kodi piny, 22aka alamako kombere ma dhum ma kerin, alareyo woko meni pa kerin pa nonin, alamako cawilin kodi jogwey mere, aka kayinin kodi jogwey jolatho, kisi dhano g'abor pa nyawote. 23I ndelo no, Rwoth pa lwak jolweny waco, alaterin, Awi Zerubabel ŋeca paran, wod Salitiel, aka alalokin paka peta ma dhum; kole atieko yerin, apaka Rwoth pa lwak jolweny waco.

Currently Selected:

Hagay 2: DHOPE

Highlight

Copy

Compare