Hagay 1

Or pa Rwoth ma geto Ot pa Were kendo

1 # Ezira 4:24—5:2; 6:14 I oro mar'ario ma dhum pa Kere Dario, k'acel ma dwe mar'aucel, wac pa Rwoth obino luwo kwoŋ Hagay, jatuci wac Were, ri Zerubabel wod Salitiel gavana ma Yuda, kodi Yesuwa wod Yehozadak, jadwoŋ pa jocway ri Were i wi migam. 2Rwoth pa lwak jolweny waco ama: Ji me jowaco ni hongo ma geto kendo Ot pa Rwoth fodi k'otundo. 3Wac pa Rwoth obino luwo kwoŋ Hagay jatuci wac Were ka waco ama: 4Me obedo hongo riwin ma bedo i udi mewin m'ocule, kareno ot me ŋare i gunda? 5Onyo riameno Rwoth pa lwak jolweny waco ama: Kethi win cuny win kwoŋ yo mewin. 6Wicwoyo mathoth, to wikeco manok, wicemo, to wikiyeŋ, wimedho, to wikimer, wirukere, to wikiwinji lietho, ŋata limo cul pere donjo i mugowa m'otuci. 7Rwoth pa lwak jolweny waco. Kethi win cuny win kwoŋ yo mewin. 8Idhi win malo wi got aka wikel mbawo, wigeti ot, aka ŋey anyal kisangala, t'alimo dwoŋ, apaka Rwoth waco.

9Wirango kweth, to neni, olokere mathin, aka munyo wikelo peco, akwadho woko. Raŋo? Rwoth pa lwak jolweny penjo. Kwoŋbedo Ot paran oŋare i gunda, kucel win kisi dhano riwin i ot pere. 10Riameno polo malo otweyo koth, aka piny otweyo ranyak mere. 11Atieko lwoŋo piny wothwo, kwoŋ gote, kwoŋ ŋano, kwoŋ vini manyen, kwoŋ mo, kwoŋ gima lowo nyak, kwoŋ ji, kwoŋ ogwaŋe, kodi kwoŋ tic ma cingi jo je.

Ji jowinjo Or pa Rwoth

12Zerubabel wod Salitiel, Yesuwa wod Yehozadak, gi ji je m'oyido joboth, jowinjo dwondi Rwoth Were pajo, kodi wac pa Hagay jatuci wac Were, paka Rwoth Were pajo ooro go; aka ji jobedo gi lworo ruwaŋ Rwoth. 13Kenyo Hagay jamikwenda pa Rwoth oluwo mikwenda pa Rwoth ri ji, ka waco ama: Anitie gi win, Rwoth waco. 14Aka Rwoth oguro cuny Zerubabel wod Salitiel gavana ma Yuda, kodi cuny Yesuwa wod Yehozadak, jadwoŋ pa jocway ri Were i wi migam, kodi cuny ji m'oyido joboth, aka jobino timo tic i Ot pa Rwoth pa lwak jolweny, Were pajo, 15ka piero ario g'aŋwen ma dwe mar'aucel i oro mar'ario ma dhum pa Kere Dario.

Currently Selected:

Hagay 1: DHOPE

Highlight

Copy

Compare