Joroma 9
9
Were gi ji pere m'oyer
1Aluwo gir'adieri i Kristo aka akitwodi; paro ma cunyan ridho gino gi meni pa Cuny Maleŋ. 2An gi rem kodi litho mathoth i cunyan. 3Aparo ni di Were wokwoŋan ayin aka wopokan kodi Kristo ma bero pa ji paran, wade paran won ma del! 4#Wok 4:22Jobedo Joisiraili, ma Were oloko nyithindho pere to poko jo dwoŋ pere. Otimo cikirok pere kodi jo, to miyo jo Cik. Jonitie gi royo ma lamo Were mar'adieri. Jotieko jolo cikirok pa Were; 5jowok kwoŋ kwarere wan macon, aka Kristo, paka dhano, onywole wok i dier jo. Weyi Were ma dhumo gimoro je, wopak cil gi cil. Ameno.
6Akiwaci ni cikirok pa Were othogaya ongoye kony; rupiri k'obedo ni Joisiraili je ji pa Were; 7#Cak 21:12odoko k'obedo ni nyikway Abraham je nyithindho pa Were. Kole Were owaco ri Abraham ni, “Nyikway Isaka kende am'ibino kwano paka aperin.” 8Ma nyutho ni nyithindho m'onywol i yo ma kisi ndelo manyadel jok'obedo nyithindho pa Were; kucel, nyithindho m'onywol cungo kwoŋ cikirok pa Were ama ikwano paka nyikway go mar'adieri. 9#Cak 18:10Kole cikirok pa Were otim i wac me: “I hongo marom gi ma pama yuwaŋe, abino dwoko aka Sara bino limo nyathi majayac.”
10Aka ki meno kende; nger gino bende otimere ri Rebeka munyo ogamo iye to limo nyithindho ma rut, go kodi kwari wan Isaka. 11#Cak 25:23Kada munyo fodi k'onywol jo aka onwaŋo fodi jok'otimo kiri gimoro maber kosa marac, (ma miyo yero pa Were wotimere, 12kareno kicungi kwoŋ tim pa nyithindho no, to kwoŋ lwoŋo pa Were), Were owaco ri Rebeka ni, “Wodin makayo bino tiyo ri mathin.” 13#Mal 1:2-3Meno obedo paka ondiki ni,
“Amaro Yakobo, to adaki Esau.”
14Onyo wawaci nedi? Nike Were k'otire? K'ameno be. 15#Wok 33:19Kole go owaco ri Musa ni,
“Abino mako wor gi ŋat'ayero timo rigo wor,
abino ramere ri ŋat'ayero ramirok rigo.”
16Am'omiyo, kicungi kwoŋ yero kosa meni pa dhano, to cungo kwoŋ Were ma nyutho wor. 17#Wok 9:16Kole ondiki kwoŋ Farawo ni, “Alokin kere ri atoŋa m'abino orin iye ma nyutho meni paran, gi miyo nyingan woŋeyere i piny gipi.” 18Am'omiyo Were mako wor gi ŋata go oyero, aka miyo dhano bedo jacay paka won oyero.
Keme pa Were gi wor pere
19Onyo moro kwoŋ win bino waco ran ni. “K'inen obedo ameno, Were nyalo nedi ketho banja kwoŋ dhano? To ŋa, manyalo geŋo paro pa Were?” 20#Isa 29:16; 45:9To jawodhan in iŋa, dhan'adhana, m'inyalo dwoko Were? Dak bende nyalo penjo ŋat'ocweyo go ni, “Raŋo m'icweyan ama?” 21Kole jacwec nigi siem ma oro lowo nyamasiga paka won oyero, gi cweyo degi ario wok i lowo acel m'odwany: Dak acel mar'aora i kabedo ma welo kodi man mar'aora i kabedo ma kisi ndelo.
22Iŋeyo nedi, kole ka Were otimo ameno ma mito nyutho keme pere gi miyo meni pere woŋeyere! Am'omiyo go odiyo cunye swa munyo ciro joma keme pere d'otiyo kwoŋ jo, m'oyido ikidho reyo woko jo. 23Aka iŋeyo nedi, kole ka Were otimo ameno ma mito nyutho dwoŋ pere m'oŋaŋ ri joma go kidho nyutho jo wor pere, ma go oyiko jolo i dwoŋ pere. 24Kole meno mako kwoŋ wan ma go olwoŋo, ki nyaka wok kwoŋ Joyuda kende, to kwoŋ Jopath bende. 25#Hos 2:23; 1 Pet 2:10Kole me a gima go waco i kitawo pa Hoseya:
“Ji me m'oyido jok'obedo aparan,
abino lwoŋo jo ni, ‘Ji paran.’
Nono m'onwaŋo akimaro, abino lwoŋo ni, ‘Migos paran.’
26 #
Hos 2:1
Aka i kabedo m'onwaŋo owac'iye rijo ni,
‘Wikibedo ji paran.’
Kenyo am'ibino lwoŋ'iye jo ni
nyithindho pa Were makwo.”
27 #
Isa 10:22-23
Aka Isaya luwo kwoŋ Isiraili ni, “Kada nyithindho pa Isiraili jothoth pa kwoyo ma nam, nyaka manok kwoŋ jo am'ibino botho. 28Kole Rwoth bino cowo thumo banja pere i yoto ri piny.” 29#Isa 1:9Aka gime nitie paka Isaya cango owaco ni, “Bedi Rwoth Majameni je k'oweyo ri waye nyikway wan moro, di wabedo paka Sodom, di walokere paka Gomora.”
Isiraili kodi Wac Manyen Maber
30To wanowaci nedi? Jopath m'onwaŋo jokitem bedo i tiro gi Were, onyo okethi jo i tiro gine ro yeyo pajo; 31kareno Joisiraili m'onwaŋo jorango tiro cungo kwoŋ Cik, jok'onyalo kuro Cik nago. 32To raŋo? Rupiri gima jotimo onwaŋo k'ocungo kwoŋ yeyo to kwoŋ tic mabeyo ayino. Jocer wi tele ma redho jo, 33#Isa 28:16ma ndiko luwo kwoŋe ni,
“Neni, aketho i Zayon tele ma bino miyo ji cer,
Tele ma bino miyo jo podho.
To ŋat'oyey go, k'owey wiye wokwoti.”
Currently Selected:
Joroma 9: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
