Joroma 8
8
Kwo i Cuny
1Pama onyo kidok kethi banja kwoŋ jomakwo pajo nitie i Kristo Yesu, 2rupiri cik ma Cuny ma kelo riwan kwo i Kristo Yesu, otieko thekan gi cik m'okelo gimarac kodi tho. 3Gima Cik k'onyalo timo ro nyapo ma del pa dhano, Were onyalo timo. Othumo banja loyo gimarac ma del, munyo ooro Wode won, m'obino i cal ma del pa dhano ma jagimarac, aka wonyali reyo woko gimarac. 4Meno aka ŋey gima Cik mito ama wotimere i wan, ma wakiter kwo mawan i timo gima del yenyo, t'itimo gima Cuny ama yenyo. 5Kole joma tero kwo pajo i timo gima del yenyo joketho paro pajo i gigipiny manyadel. Aka joma miyo kwo pajo i timo gima Cuny yenyo joketho paro pajo i Cuny. 6Ketho paro i gigipiny manyadel meno tho, to ketho paro i gigipiny manyacuny meno limo kwo kodi siem. 7Meno am'omiyo paro m'oketh kwoŋ gigipiny manyadel lokere jakwor pa Were, rupiri kiwinji cik pa Were, aka iy'adieri go kitim ameno. 8Aka joma jotero kwo pajo i timo gima del yenyo jokinyal kisangala Were. 9To kwo mewin k'obedo manyadel, to manyacuny, k'inen Cuny Maleŋ pa Were nitie i win. Ŋat'ongoye gi Cuny pa Kristo i kwo pere, meno k'obedo apa Kristo. 10To ka Kristo nitie i in, meno delkwoŋin otieko tho ma nyutho ni ikwero gimarac, aka cunyin onyo nigi kwo ro tiro perin gi Were. 11#1 Kor 3:16Ka Cuny Maleŋ pa Were m'ocerino Yesu kwoŋ jom'otho nitie i win, meno ŋat'ocerino Kristo kwoŋ jom'otho bende bino miyo delkwoŋ win ma tho no kwo ro Cuny Maleŋ ma bedo i win.
12Am'omiyo, wutmera, wanitie gi banja, to ki ri del ni watim gima del yenyo. 13Kole ka kwo mewin nitie paka del yenyo meno wikidho tho; to ka wineko woko tim mareco gi meni pa Cuny, aka wibino kwo. 14Ato joma Cuny Maleŋ pa Were ama telo jo ama jobedo nyithindho pa Were. 15#Gal 4:5-7Kole wikilimo cuny ma lokirok ŋeca ma kelo riwin lworo; to witieko limo Cuny ma loko win nyithindho pa Were, aka ka waywak ri Were ni “Aba! Baba!” 16Meno meni pa Cuny no ama nyutho wan i cuny wan ni wabedo nyithindho pa Were. 17Aka ka wabedo nyithindho pa Were, meno bende wabedo jolunji gigipiny pere paka jom'isika kanyacel gi Kristo, aka wabende wabino limo dwoŋ kanyacel gi Kristo, ka bende wariwere gi go i candirok pere.
Dwoŋ ma bino rumacen
18Atero ni candirok ma pama kirom gi dwoŋ m'ibino nyutho wan be. 19Cwec gipi kiyo neno gima Were bino nyutho nyithindho pere. 20#Cak 3:17-19Kole omiy piny lokirok gim'ongoye kony, ki ro mito pere, to Were won am'omito ni wobedi ameno. Kad'ameno, geno oyido nitie ama: 21Nike ndelo moro ibino gonyo cwec wok kwoŋ topo mafodi dhumo go, to limo siem i dwoŋ ma nyithindho pa Were jobino limo. 22Kole waŋeyo kiri gunyo ni cwec gibe cur gi litho ma cale gi ŋedi. 23#2 Kor 5:2-4Aka k'ameno kende, to wan ma wanitie gi Cuny paka mic pa Were marapena, wabende wacur gi litho i iy wan koro munyo wakuro Were woloki wan nyithindho pere aka wokethi wan i siem. 24Kole geno am'omiyo obothi wan; to geno m'otieko nenere meno kidok bedi geno. Ŋa ma geno gima go neno? 25To ka wageno gima wakinen, meno aka wakuro ginago ma wadiyo cuny wan.
26I royo acel no bende, Cuny Maleŋ konyo wan i nyapo mawan; rupiri wakuya paka waripo kwayo; aka Cuny won ama pido riwan bongi Were gi cur ma wac kinyal tuco. 27Aka Were ma neno cuny ji, oŋeyo paro pa Cuny, rupiri Cuny pido bongi Were ri ji pere paka Were mito.
28Kole waŋeyo ni gimoro je timere kanyacel ma bero ri joma jomaro Were, jono ma go olwoŋo r'atoŋa pere won. 29Kole joma Were oŋeyo con, bende oyiko rijo kicutho bedo i cal pa Wode, ŋey Wode wobedi okayo i dier wutmin go. 30Am'omiyo joma Were oyiko rijo kabedo con kicutho, bende olwoŋo jo; aka joma go olwoŋo, bende okwanyo woko banja kwoŋ jo; aka joma go okwanyo woko banja kwoŋ jo, bende opoko jo dwoŋ pere.
Mar pa Were i Kristo Yesu
31Onyo wanyalo waco aŋo kwoŋ gigipiny me? Ka Were nitie yuthenge mawan, ŋata nyalo lwenyo gi wan? 32K'inen Were k'ogwoko kiri Wode won, to omiyo go ri wajoje! Onyo go k'omiy wan gimoro je nono kanyacel gi Wode? 33Ŋa ma bino kelo banja kwoŋ ji pa Were m'oyer? Kole Were won ama kwanyo woko banja kwoŋ jo! 34To ŋa m'odoko othum rijo banja? Ki Kristo Yesu m'otho, kendo ma Were ocerino go kwoŋ jom'otho, aka onyo obedo yu cingi Were maracuc aka pido riwan bongi Were! 35Ŋa m'opok wan gi mar pa Kristo? Teko di tim ameno, kosa aŋedha cuny, kosa acanda, kosa kec, kosa bedo kinyoro, kosa tho, kosa abor? 36#Zab 44:23Ato ndiko waco ni,
“Ro wac perin imito neko wan ndelo je,
itero wan pa rombo m'ikidho thumo.”
37I gigipiny me je, watieko loyo lweny i go m'omaro wan! 38Kole aŋeyo maber ni kada tho, kosa kwo, kosa jomalaika, kosa jodhum ma polo, kosa gima pama, kosa gima bino rumacen, kosa meni moro, 39kosa ŋawirok pa gimoro, kosa thutho pa gimoro, kosa gimoro je i cwec, kinyal poko wan gi mar pa Were i Kristo Yesu Rwodhiwan.
Currently Selected:
Joroma 8: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
