Zabuli 22
22
Ywak ma kidamba kodi wer ma pak
1Were paran, Were paran, raŋo ijwangan?
Raŋo initie bor m'ikikonyan,
ma kiuja paran kitundi bongin?
2 #
Mat 27:46; Mar 15:34 Awi Were paran, aywak rin odieceŋ,
t'ikidwokan,
Alwoŋin wor,
t'akinwaŋ ywomirok.
3Kucel ibedo ŋataleŋ,
ŋata Isiraili pako.
4Kwarere mawan joketho geno pajo i in;
jogenin, t'ibotho jo.
5Joywak rin t'ibotho,
jogenin aka ibotho jo.
6T'onyo akical dhano kendo, acalo kudin,
ma kisi nyatoro cayo aka dak!
7Kisi ŋata nenan jwiyan,
jopelan aka joyengo wiy gin.
8 #
Mat 27:39; Mar 15:29; Luk 23:35 Jowaco ni, “Iketho geno perin i Rwoth,
raŋo go kibothin?
Ka Rwoth omarin,
raŋo go kikonyin.”
9 #
Mat 27:43
Kucel in iŋat'iwodhan maber munyo inywolan,
aka munyo fodi abedo nyathi, ikuran maber.
10Atieko genin wok i ndelo m'anywol'iye,
aka noknok ibedo Were paran.
11Ikir'ibedi bor kodan,
kole teko nitie cegin,
aka ongoye ŋat'okony.
12Jokwor kweth jothokan paka thwondhe,
joje jothokere kwoŋan,
paka thwondhe mager ma jowok i piny Basan.
13Joyawo dhok gin paka simbwore,
ma johola aka jomito yecan mathindho thindho.
14Meni paran orumo,
paka pi m'okire piny.
Cokin paran jowok i kogino,
cunyan cal odok m'oleny.
15Lokoro paran othwo paka fukefuke,
aka lewan moko i dandan.
Itieko weyan ri tho i fukefuke.
16Kitipa pa ji mareco jothokan,
paka dwol gwokere jothokere kwoŋan,
joyeco cingan gi tiendan.
17Anyalo kwano cokin paran je,
jokwor paran joŋiyan ma jokikwany waŋ jo.
18Joparo nangin paran,
aka jopoko.
19 #
Mat 27:35; Mar 15:24; Luk 23:34; Yoh 19:24 To in Rwoth, ikir'ibedi bor kodan!
Biye piyo ibothan!
20Bothi adundo paran kwoŋ abor,
bothi kwo paran kwoŋ gwokere me.
21Bothan kwoŋ simbwore me,
angoye gi kony ruwaŋ thwondhe me.
22Abino waco ri ji paran gim'itieko timo,
abino pakin i cokirok pa ji.
23 #
Ebu 2:12
Win ma wilworo Rwoth, pak win go,
win nyikway Yakobo miy win Rwoth dwoŋ,
aka win Joisiraili lam win go.
24Go kikwer kosa cay jocandi,
to winjo ywak pajo ri kony,
go kipan rijo waŋe,
to winjo ywak pajo.
25Abino pakin i cokirok pa ji ro gim'itieko timo,
abino miyo cowirok m'aciko ruwaŋ jono ma jolamin.
26Jocandi jolacemo to joyeŋ,
jono ma jorango Rwoth jolapako go!
Weyi jowoyindira i kisi gima jotimo.
27Nonin je jobino poyo Rwoth.
Woki i kisi thenge ma piny jobino wire bonge,
to jolamo go.
28Kole Rwoth obedo kere
aka dhumo nonin je.
29Jonoro je jobino kule piny rigo,
aka gima tho je bino kule piny rigo.
30Luse ma yuwaŋe jobino tiyo rigo,
jobino waco ri luse ma yuwaŋe kwoŋ Rwoth.
31Ibino waco ri ji ma fodi k'onywol ni,
“Rwoth obotho ji pere.”
Currently Selected:
Zabuli 22: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
