Wok 15

Wer pa Musa

1Kenyo Musa gi Joisiraili jowero ri Rwoth wer me.

“Abino wero ri Rwoth kwoŋbedo olimo loyo madwoŋ,

obolo kayinin gi jogwey i nam.

2Rwoth a meni paran aka wer paran,

go ama obothan

Me Were paran, aka abino pako go,

go Were pa baba, aka abino wero dwoŋ pere.

3Rwoth obedo jalweny,

Rwoth meno nyingi go.”

4“Obolo cawilin gi jolweny pa Farawo i nam,

aka jomituka pere ma jober loyo jomunyere i nam.

5Lutho ma nam oumo jo,

jomunyere i lutho pa tele.”

6“Rwoth, cingin maracuc, dwoŋ i meni,

turo jokwor mathindho thindho.

7I meni perin madwoŋ ikengila jokwor perin;

nge perin liel to waŋo jo pa kanja.

8Ikudho nam to pi cokere malo,

ocungo tirtir pa kor ot,

lutho ma nam olokere matek.

9Jakwor owaco ni, ‘Abino riemo jo t'amako jo,

abino poko lim pajo t'atero m'ayenyo je;

Abino celo abor paran, aka cingan bino reyo jo.’

10To gi kudho ma koyo, nam oumo jo,

jomunyere pa got i pi ma tula.”

11“Rwoth, ŋa ma calin, kwoŋ werin je?

Ŋa ma calin, itek loyo joje?

Ŋa manyalo timo gir'aura gi tim madongo paka aperin?

12Irieyo cingin maracuc,

aka piny omwonyo jokwor mawan.

13Gi mar perin makiwire, itelo ji ma ibotho,

gi meni perin inyutho jo yo ma kidho i lowo perin maleŋ.

14Nonin jowinjo, aka jokirin gi lworo,

Jofilistia jopoŋ gi lworo.

15Jotel ma Edom jobwok swa,

cwo matek i Mowab jokirin,

ji ma Kanan jongoye gi miseni.

16Jopoŋ gi lworo aka jokirin.

Joneno meni perin, a Rwoth,

aka jocungo m'ongoye kony gi lworo

cuka ji perin joŋanjo jokadho,

ji ma ibotho bedo ŋecin.

17Ikelo jo to ipidho jo i got perin,

kabedo ma in, Rwoth, itieko yero bedo peco perin,

ot ma lamo ma in won igeto.

18Rwoth bino dhumo cil gi cil.”

Wer pa Miriam

19Joisiraili joluwo i nam i lowo m'othwo. To munyo cawilin pa Farawo, jogwey kayinin kodi kayinin jodonjo i nam, Rwoth odwoko pi to umo jo.

20Kenyo Miriam, jatuci wac Were madhako, okwanyo seke pere, aka mon man bende joluwo go ka jogoyo seke aka jomielo. 21Miriam owero rijo,

“Wer ri Rwoth, kwoŋbedo olimo loyo madwoŋ,

obolo kayinin gi jogwey i nam.”

Pi makec

22Kenyo Musa otelo Joisiraili wok i Nam M'obokere kidho i thim ma Sur. Ma ndelo adek jowotho i thim, to jok'onwaŋo pi. 23Munyo jotundo Mara, jok'onyalo madho pi ma kenyo kwoŋbedo oyido kec, aka am'omiyo ocwoki ni Mara.#15:23 Mara Nyutho kec 24Ji jogeŋisa ri Musa aka jopenjo ni, “Aŋo ma wakidho madho?” 25Musa oywaki ri Rwoth, aka Rwoth onyutho go yath m'obolo i pi to pi lokere mamit.

Kenyo Rwoth omiyo jo or ma nger ma kwo, aka bende otemo jo 26ka waco ni, “Ka winowinjan kicutho gi timo gim'atero ni otire kodi luwo or paran, akibino miyo win gir'acula ma two m'akelo kwoŋ Jomisir. An abedo Rwoth ma botho two mewin.”

27Kenyo jotundo i Elim kam'oyido nitie iye waŋ pi apar g'ario, kodi yen thith piero abirio, aka joketho kenyo kambi cegin gi pi.

Currently Selected:

Wok 15: DHOCDC

Highlight

Copy