Wok 14
14
Ŋado Nam m'obokere
1Aka Rwoth owaco ri Musa ni, 2“Waci ri Joisiraili jogik jowokethi kambi yuwaŋ Pihahiroth, i dier Migdol kodi Nam M'obokere cegin gi Balzefon. 3Kole Farawo bino paro nike Joisiraili fodi jotangatanga i lowo me aka thim ogeŋo jo kadho. 4Abino miyo go bedo gi wictek aka go bino luwo win. Abino limo dwoŋ paran kwoŋ Farawo gi jolweny pere je ŋey Jomisir jowonyal ŋeyo ni An Abedo Rwoth.” Aka Joisiraili jotimo ameno.
5Munyo owaci ri Farawo nike Joisiraili joringo, go gi jodhum pere jowiro paro pajo aka jowaco ni, “Aŋo ma watimo! Waweyo Joisiraili kadho m'oyido jobedo ŋecin mawan!” 6Ameno Farawo okwanyo cawila pere ma lweny gi jolweny pere. 7Go okwanyo cawilin pere je kiri gi jolweny 600 ma jober loyo, gi jomituka pajo. 8Aka Rwoth omiyo Farawo bedo gi wictek to luwo Joisiraili m'oyido jokadho gi miseni. 9Jolweny pa Jomisir, kayinin pajo, cawilin pajo kodi jogwey joriemo jo aka jomako jo kam'oyido joketh'iye kambi dho Nam M'obokere cegin gi Pihahiroth kodi Balzefon.
10Munyo Farawo ocore cegin, Joisiraili jotiŋo waŋ gin malo, aka neni, Jomisir oyido joŋanjo joluwo jo. Jobwok swa aka joywak ri Rwoth wokonyi jo. 11Jowaco ri Musa ni, “Kaliele oyido ongoye i Misir m'ikelo wan tho i thim ka? Neni gim'itimo gi wodho wan wok i Misir! 12Wakiwaco rin mafodi wakiay nike gime bino timirok? Wawaco rin nike iwey wan wabedi ŋecin pa Jomisir. Ber oyido wabedi ŋecin ma wakitho ka i thim.”
13Musa odwoko ji ni, “Wikiri wilwor, cungi win matek, aka Rwoth bino botho win konon. Jomisir ma wineno me wikibino neno jo kendo. 14Rwoth bino lwenyo riwin aka ongoye kony win timo gimoro.”
15Rwoth owaco ri Musa ni, “Raŋo wiywak ran? Waci ri Joisiraili jowomedere yuwaŋe. 16Tiŋi luth perin malo aka iriey cingin i wi nam wotiakere i diere, ŋey Joisiraili jowoŋadi nam kam'othwo. 17Aka abino miyo Jomisir wictek to joluwo jo i nam, ŋey anwaŋ dwoŋ paran kwoŋ Farawo, jolweny pere, cawilin pere, kodi jogwey kayinin pere. 18K'akengila jo, Jomisir jobino ŋeyo ni An Abedo Rwoth.”
19Malaika pa Were m'oyido telo yuwiy jolweny pa Isiraili ogik yuŋey jo, aka siro ma pondeponde bende ogik yuŋey jo, 20i dier Jomisir kodi Joisiraili. Pondeponde oloko piny macol ri Jomisir, to miyo Joisiraili lero. Aka jok'onyalo bedo cegin wor gipi.
21Kenyo Musa orieyo cinge i wi nam, aka Rwoth obaro nam gi koyo matek ma yuwok ceŋ wor gipi to timo lowo m'othwo iye. Pi otiakere, 22aka Joisiraili joluwo i dier nam i lowo m'othwo gi pi i kisi thenge. 23Jomisir joluwo jo aka jodonjo i nam gi kayinin pajo, cawilin kodi jogwey. 24Mafodi ŋamba k'oriedo, Rwoth oŋiyo piny kwoŋ Jomisir wok i siro ma mac gi pondeponde aka omiyo jo kirin. 25Rwoth omiyo tiendi cawilin pajo moko, ŋey woth wobedi rijo matek. Jomisir jowaco ni, “Rwoth lwenyo gi wan ri Joisiraili. Weyi wawok win ka!”
26Kenyo Rwoth owaco ri Musa ni, “Riey cingin i wi nam, ŋey pi wogiki kwoŋ Jomisir, cawilin pajo, kodi jogwey kayinin pajo.” 27Ameno Musa orieyo cinge i wi nam, aka munyo piny oyawere pi ogik i kare. Jomisir jotemo ringo, to Rwoth obolo jo i nam. 28Pi ogik to umo cawilin, jogwey, kodi jolweny pa Jomisir je m'oyido joluwo Joisiraili i nam, m'ongoye ŋat'obothi. 29To Joisiraili jowotho i lowo m'othwo gi pi i kisi thenge.
30I ndelo no Rwoth obotho Joisiraili wok i cingi Jomisir, aka Joisiraili joneno Jomisir joriere i thengi nam ma jotho. 31Munyo Joisiraili joneno meni madwoŋ ma Rwoth okengila gine Jomisir, jolworo Rwoth to joyeyo go kiri gi ŋeca pere Musa.
Currently Selected:
Wok 14: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
