Tim pa Jomoor 15
15
Romo ma Yerusalem
1 #
Jolevi 12:3
Nitie jomoro ma jowok Yuda to jobino Antiok to jocako fonjo jom'oyeyo ni, “Wikinyal limo both kwanyo woko ka withumere paka Cik pa Musa waco.” 2Paulo kodi Barinaba jobedo gi piem mager tektek gi jo kwoŋ gime; gikenyo oridhi ni Paulo kodi Barinaba kodi joman ma Antiok jowokidhi Yerusalem jowoneni jomoor kodi jotel ma kitipin kwoŋ wac me.
3Paka kitipa pa jom'oyeyo ooro jo, joluwo yu Fonisia kodi Samaria to jowaco rijo paka Jopath bende jowire bongi Were; wac me okelo kisangala madwoŋ ri jom'oyeyo je. 4Munyo jotundo Yerusalem, kitipa pa jom'oyeyo kodi jomoor kodi jotel ma kitipin je jojolo jo maber, to jowaco rijo gimoro je ma Were otimo rijo. 5To jom'oyeyo megi m'oyido jonitie i kweth pa Jofarisayo jocungo to jowaco ni, “Mitere wothum Jopath aka wowaci rijo mako Cik pa Musa.”
6Gikenyo jomoor kodi jotel ma kitipin, joromo kanyacel paro kwoŋ wac me. 7#Tim 10:1-43Rumacen munyo piem okadho kamabor, Petero ocungo to waco ni, “Wutmera, wiŋeyo nike yucen koro Were oyeran i dier win fonjo Jopath Wac Manyen Maber, nike jowonyal winjo jowoyey. 8#Tim 10:44; 2:4Aka Were, m'oŋeyo cuny ji, onyutho paka ojolo Jopath munyo bende omiyo jo Cuny Maleŋ, paka otimo gi wan. 9Go k'opoko wan gi jo; aka ocwako reco pajo cungo kwoŋ yeyo pajo. 10Am'omiyo, raŋo ma wimito temo Were mawan munyo wiyimo ri jom'oyeyo okol i goki jo makada kwarere wan kosa wawegi wakinyali tiŋo? 11Be! Kole wayeyo ni wabino limo both kwoŋ nema pa Rwoth Yesu, paka jo bende.”
12Gikenyo jom'ocokere je joliŋ to jowinjo Barinaba kodi Paulo munyo jonuŋanuŋa ri ji gir'aura je kodi gigipiny ma kelo dhier ma Were otimo i dier Jopath. 13Munyo jocowo luwo, Yakobo oluwo malo ni, “Winjan win, wutmera! 14Simon owok tito riwan paka Were okutho onyutho paka dewo kwoŋ Jopath munyo kwanyo i dier jo ji ma jowobedi apere won. 15Kole wac pa jotuci wac Were makere swa gi me. Paka ndiko waco ama.”
16 #
Amos 9:11,12 “Rumacen abino dwoko,
abino geto kendo ot pa Daudi m'opodho.
Abino geto kendo gundin mere,
alageto malo.”
17“Aka ŋey ji man je joworangi Rwoth,
kodi Jopath je m'ilwoŋo jo gi nyingan.”
18“Rwoth, m'omiyo gime oŋeyere wok con ama owaco ameno.”
19“Am'omiyo aparo ni wakiripi cando Jopath ma jowire bongi Were; 20#Wok 34:15-17; Jolevi 18:6-23; Jolevi 17:10-16kucel waripo ndiko balwa ma cero jo lamo cal makicar kosa timo kidakana kosa camo gim'odey kosa remo moro je kosa cemo moro je ma k'olony ayin. 21Kole Cik pa Musa otiek kisoma hongo malac i kalamo pa Joyuda m'omore i Sabato je, aka wac pere ifonjo i tindi je.”
Balwa ri Jopath ma joyeyo
22Gikenyo jomoor kodi jotel ma kitipin pa jom'oyeyo, kanyacel gi kitipa pa jom'oyeyo gipi joridho yero ji moro i kitipa gi dhiro jo Antiok kodi Paulo gi Barinaba. Joyero Yuda m'ilwoŋo ni Barsaba kodi Sila, j'ario ma jom'oyeyo jomiyo dwoŋ swa. 23Jodhiro jono gi balwa me: “Wan jom'oyeyo jowot win, ma joman jomoor aka joman jotel ma kitipin pa jom'oyeyo, wadhiro moth ri jom'oyeyo ma Jopath ma Antiok kodi Siria kodi Silisia. 24Watieko winjo paka ji megi i kitipa mawan jobino koro to jokwinyo win gi luwo pajo ma to wakifonjo jo ni jowotimi ameno. 25Am'omiyo watieko romo kanyacel aka wajoje wayere yero jomikwenda moro to wadhiro jo riwin. Jobino kanyacel gi merin mawan Barinaba gi Paulo, 26cwo ma jojala kwo pajo i tic ri Rwoth Yesu Kristo. 27Am'omiyo wadhiro riwin Yuda kodi Sila, ma wegi jobino waco riwin gigipiny ma wandiko riwin. 28Ato oneno ri Cuny Maleŋ kodi wan ni ber wakiri watur win gi bieto kwanyo woko or me kende: 29Wikiri wicam gim'ocow gine jwogi; wikiri wicam remo; wikiri wicam le m'odey; aka kure win kwoŋ kite ma kidakana. Wibino timo maber ka wikure kwoŋ gigipiny me. Kutho win.”
30Jooro jomikwenda no to jokidho Antiok, kama jocok'iye kitipa pa jom'oyeyo je to jomiyo jo balwa no. 31Munyo ji josoma balwa no, kisangala opoŋ i cuny jo ro mikwenda ma dwoko meni. 32Yuda kodi Sila, m'onwaŋo bende jotuci wac Were, joluwo ma hongo malac kodi jom'oyeyo no munyo jomedo jo meni kendo jodwoko cuny jo. 33Munyo jocowo hongo moro kenyo, jom'oyeyo josewila jo gi siem, to jogik bongi jomoor. 34[To Sila oridho paro ma doŋ kenyo].
35Paulo kodi Barinaba jocowo hongo moro i Antiok kanyacel gi joman mathoth munyo jofonjo wac pa Rwoth.
Paulo kodi Barinaba jopokere
36Rumacen Paulo owaco ri Barinaba ni, “Weyi wagiki waliewi wutmin wan i tindi je ma watieko fonj'iye Wac pa Were, aka wanen paka jonitie.” 37Barinaba onwaŋo yenyo ni jowokadhi gi Yohana Mariko bende, 38#Tim 13:13to Paulo oparo ni jokiripi kadho gine, rupiri ndir ca go k'obedo gi jo kiri i gik tic pajo, to owire to weyo jo i Pamfilia. 39Jobedo gi piem matek wegi kendi gin, to jopokere. Gikenyo Barinaba okwanyo Mariko to jocewere jocomo yu Sipuro, 40to Paulo oyero Sila to jokadho kareno jom'oyeyo joketho go i kur ma nema pa Were. 41Go oluwo yu Siria kodi Silisia, munyo jomedo kitipa pa jom'oyeyo meni.
Currently Selected:
Tim pa Jomoor 15: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
