Tim pa Jomoor 14
14
Paulo gi Barinaba i Ikoniam
1Gima pameno bende otimere Ikoniam: Paulo kodi Barinaba jodonjo i kalamo pa Joyuda to joluwo wac m'omiyo Joyuda kodi Jogris mathoth joyeyo. 2To Joyuda ma jok'onyalo yeyo josigila Jopath to joruwo paro pajo ni joeye kwoŋ jom'oyeyo no. 3Jomoor jobedo kenyo hongo malac. Joluwo gi miseni kwoŋ Rwoth, m'oridho ni fonji pajo kwoŋ nema pere oyido obedo adieri munyo miyo jo meni ma timo ranyuth kodi gidhier. 4To kitipa pa ji i tindi otiakere: Jomegi jodok yuthenge pa Joyuda, joman yuthenge pa jomoor.
5Gikenyo Jopath kodi Joyuda, kanyacel gi jodhum pajo, joyiko lweny kodi jomoor gigoyo jo gi telin. 6Munyo jomoor jolimo ŋeyo i wac no, joringo yu Listira kodi Dabe, tindin ma Likonia, kodi iy'adec m'othoko jo. 7Kenyo ama jofonj'iye Wac Manyen Maber no.
Paulo kodi Barinaba i Listira kodi Dabe
8Onwaŋo nitie nyatoro i Listira ma tiende je oŋol; go oyido oŋol wok i nywolirok pere aka k'onyalo woth. 9Go onwaŋo obedo piny ciko ithe winjo wac pa Paulo. Gikenyo Paulo oneno go tirtir aka munyo oneno nike ŋato nigi yeyo aka nyalo limo both, 10owaco rigo gi dwonde madwoŋ ni, “Ay malo icungi m'itire!” Ŋato oay malo abwap to cako thokirok gi woth. 11Munyo lwak ji oneno gima Paulo otimo, jocako koko i dhodhok Likonia pajo ni, “Werin jolokere ji aka joloro bongi wan!” 12Jomiyo Barinaba nyinge ni Zewo, aka Paulo ni Hames, rupiri go oyido a jaluwo madwoŋ. 13Gikenyo jacowirok i migam pa were Zewo, ma migam pere oyido nitie dho tindi, okelo thwondhe moro kodi thiw ajwoka i waŋkac munyo go kanyacel kodi ji ma tindi no onwaŋo jomito timo cowirok ri jomoor.
14Munyo Paulo gi Barinaba jowinjo gim'onwaŋo jokidho timo, joyeco nangin pajo to joringo i dier lwak ji munyo jokoko ni, 15#Wok 20:11; Zab 146:6 “Jume, raŋo ma witimo gime? Wabende wabedo ji paka win! Wanitie ka i atoŋa ma tito riwin Wac Manyen Maber, kwanyo win woko kwoŋ gigipiny me m'ongoye kony bongi Were Ma kwo, m'ocweyo polo gi piny, nam kodi gigipiny je manitie i iye. 16I ndir m'okadho go oweyo nonin je luwo yo pajo wegi; 17to kad'ameno go k'odoŋ nono m'ongoye gima nyutho ni go nitie, rupiri go onyuthere ndir je i gigipiny mabeyo ma go timo: Go miyo win koth wok i polo kodi cemo m'ipidho i hongo m'otire; go miyo win cemo aka poŋo kisangala i cuny win.” 18To kada joluwo kweth wac me, je jomoor jok'onyalo i yoto juko jono cowirok rijo.
19Joyuda moro jowok yu Antiok ma Pisidia kodi Yu Ikoniam; aka munyo jocowo ywayo ji yuthenge pajo, jogoyo Paulo gi telin, joywayo go, to jowodho go woko ma tindi munyo joparo nike go otieko tho. 20To munyo jom'oyeyo jocokere jothoko go, oay malo to gik i tindi. Yawere mere go kodi Barinaba jokadho yu Dabe.
Giki Antiok i Siria
21Paulo kodi Barinaba jofonjo Wac Manyen Maber i Dabe to jolimo jofonjirok mathoth. Gikenyo jogik Listira, kodi Ikoniam, kodi Antiok i Pisidia. 22Jomedo jom'oyeyo meni to jomedo jo miseni nike jowocwire i yeyo. Jofonjo ni, “Waripo donjo i Ker pa Were munyo waluwo i teko madit.” 23Munyo jotieko ketho jotel i kisi kitipa pa joma yeyo gi kwayo kodi riyo kec, joketho jo i cingi Rwoth m'oyido joketho geno pajo kwoŋe.
24Munyo jocowo woth iy'adec ma Pisidia, jokidho yu Pamfilia. 25Jofonjo i Paga to joloro Atalia. 26Aka wok kenyo jocewere to jogik Antiok, kama ndir ca oketh'iye jo gicen ri Were i kur ma nema pere kwoŋ tic m'oyido jocowo me.
27Munyo jotundo Antiok, jocoko ji ma kitipa pa jom'oyeyo kanyacel to jowaco rijo gimoro je ma Were otimo gi jo; kendo paka onyo oyawo royo ri Jopath ma yeyo. 28Jotieko kenyo hongo malac gi jom'oyeyo.
Currently Selected:
Tim pa Jomoor 14: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
