Baroma 6
6
Khuli baafu isi Bibyonako ne Balamu mu Kristu
1Ne ari kane khulome khuryeena? Khulome khuri khwiloosele khukhola bye bubwonaki nio bubweela bwa Wele bwiloosele? 2Taawe. Shinyalikha shiryeena ifwe babekaana bibyonako khukhwiloosela khumenya mu byonako? 3Simumanya muri ifwe fweesi khukhwabatisibwa mu Kristu Yezu, khwabatisibwa mu khufwa khweewe ta? 4#Kol 2.12Nashiryo mu khubatisibwa khwefwe khwasiikhibwa atweela ni naye mu khufwa khweewe, nio akile ari nga Kristu n'alamusibwa khukhwaama mu bafu khubirira mu shiriifwa sha Paapa, ni nafwe khuryo khunyalise khukyendela mu bulamu bushaakha.
5Ne ni khuba nga khwatubaasibwa ni Kristu mu khufwa khukhuuli nga khukhweewe, aba lundi khuryo khulitubaasibwa mu khulamukha nga khukhweewe. 6Khulwekhuba khwamanya khuri isaambo isi khwabamo khaale yatsaangiliwa khu musalaba ni Kristu. Nio akile kumubili kumwonaki kuwewo, nalundi nio khulekhe khuuba babakaanisi isi bibyonako ta. 7Khulwekhuba umuundu n'afwa aba wawonisibwile khukhwaama mu maani ke khukhola bye bubwonaki. 8Ne ni khuba nga khwafiile ni Kristu, khufukiilila khuri khulimenya ni naye. 9Khwashimanya khuri Kristu n'amala khulamusibwa khukhwaama mu bafu, s'alifwa lundi ta. Khuufwa sikhumulikho ni kamaani koosi ta. 10Khuufwa khweesi Kristu afwa, afwa musaambo iye bibyonako, kumulundi mutweela kwonyene. Ne bulamu bweesi amenya, abumenya mu Wele. 11Nashiryo ni nanywe mweesi shandyashiile mwiyambaase mwabeene khuuba baafu isi bibyonako, ne nga muli balamu isi Wele, khubirira mu Kristu Yezu.
12Nashiryo mukhafukiilisa bibyonako byaaba ni bunyala mu bulamu bwenywe, khubakhonjelesa mulondelele byeesi kimibili kyenywe kikoomba ta. 13Namwe mukhawanatsakayo bisiintsa bye kimibili kyeenywe khuraambisibwa khulwe bubwonaki ta. Ne ni mwiwaneyo mwabeene nga babaandu beesi bakobosa mu bulamu khukhwaama mu bafu. Nalundi muwaaneyo kimibili kyenywe isi Wele kiraambisibwe khulwe bukwalaafu. 14Khukhwaama nga ni mukhayilibwa ni kamakaambila ta, ne mwaba nga muyilibwa ni bubweela bwa Wele, bibyonako sibibalikho ni bunyala ta.
Baakulwa be Bukwalaafu
15Ari khulome khuryeena? Khulome khuri lwekhuba khuli asi e bubweela bwa Wele, ne akhuba asi e kamakaambila ta, nashiryo khwiloosele khukhola bibyonako? Seshinyalikha ta. 16Ne si mumanya muri ni muba mwewanileyo mwabeene isi umuundu khuuba bakulwa beewe babamuwulila, muba muli bakulwa bomweene uyo isi muba muwulila ta? Nashiryo muba bakulwa oba be bibyonako bibireera khufwa, namwe bakulwa babawulila, shishireera bukwalaafu. 17Ne Wele asiimibwe! Khulwekhuba inywe mumwabakho bakulwa be bibyonako, ari mwekyelile babamurekeeresa, khukhwamila ilala nga mushiili munda, mu myoyo kyenywe, bya ŋali bibiili mu khuleekela khweesi mwaweebwa. 18Ne khukhwaama ni mwalekhuulibwa khukhwaama mu byonako, mwekyelile bakulwa be bukwalaafu.
19Indikho inganikha mu saambo iye babaandu babusheele, khulwe butoro bwenywe bubuuli busaalikhana. Khulwekhuba nga lutweela ni mwawaanayo bisiintsa byenywe khukhola bye bunyaalu, ni mu khwonaka khubiririfu, ni aluno ari mwakha muwaaneyo bisiintsa byenywe isi bukwalaafu khu lwe bikholwa bikhosefu.
20Ne ni mwaba bakulwa be bibyonako, mwaba nga simwinaanayo isi bukwalaafu ta. 21Ne mafuurisa shiina keesi mwafuna khukhwaama mu biindu ibyo ari biibi bibiwaambisa kamaŋaanyu? Intsakamilo iye bibiindu ibyo nikhwo khuufwa. 22Ari ni mwalekhuulibwa khukhwaama mu byonako nalundi mwekyela bakulwa isi Wele, kamafuurisa keesi mwafuna nibwo bulamu bubuwaanibwilayo ilala isi niye. N'ibwakamilo wayo, nibwo bulamu bubukhawawo ta. 23Khulwekhuba kumusheemba kwe bibyonako nikwo khuufwa. Ne shiwaanwa sha busa sheesi Wele akhuwa nisho bulamu bubukhawawo ta, nga akhuwa bulamu buno khubirira mu Kristu Yezu, Umukasya weefwe.
Currently Selected:
Baroma 6: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
