Baroma 4
4
Ibulayimu nga niye she khubonelakho
1Ne ari kane khulome khuri shiina khu Ibulayimu, kuuka weefwe mu khusaalikhana khwe babaandu? 2Noola Ibulayimu ayilibwa khuuba umukwalaafu khulwe byo byeesi akhola, aba ali ni shishikila webuyila. Ne s'anyala khukhwibuyila busa mu moni tsa Wele ta. 3#Rak 15.6; Gal 3.6Bibyaronebwa bikhosefu biloma biryeena? Sibiloma biri, “Ibulayimu afukiilila mu Wele, nio khulwe khufukiilila khweewe mu Wele, wabalibwa khuuba umukwalaafu.” 4Umuundu yeesi n'aba nga wamalile buraambi, kumukheemba kweewe sikubalibwa nga shiwaanwa ta. Kubalibwa nga isho shishimwakhila khulwe buraambi bweewe. 5Ne umuundu yeesi ufukiilila mu Wele uyo uwiyakhila abo babaali ni bibyonako, walekha khukhwiyikina buraambi bweewe ta, khuba khufukiilila khw'omundu uyo nikhwo khweesi Wele emakho nio wabala umuundu uyo khuuba umukhosefu. 6Akhaba Daudi naye afukiilisana n'umuundu yeesi isi Wele abona ari ali umukwalaafu, khulwe khufukiilila ne akhali khulwe buraambi bweewe nio aweebwe tsikhabi ta. Khulwekhuba aloma ari,
7 #
Zab 32.1,2 “Bali ni tsikhabi abo beesi beyakhila bibyonako byaabwe,
abo beesi Wele arusawo bibyonako byabwe.
8Nga ali n'ikhabi uyo isi Umukasya alibala nga ukhali ni bibyonako ta.”
9Ne ikhabi iyo yabiitibwa khu ba Isiraeli bonyene, namwe ni khu banaambo nabo? Khulwekhuba ifwe khuloma khuri, khufukiilila khwa Ibulayimu nikhwo khukhwakila niye wabaliwa nga umukwalaafu. 10Shino sheetsa shiryeena nio Ibulayimu abaliwe aryo? Nga ashiili khukhwinjila imbalu ta, namwe nga wamala khukhwinjila imbalu? Shino sishaba nga wamala khukhwinjila imbalu ta, akhali nga ashiili khukhwinjila imbalu ta. 11#Rak 17.10Enjila imbalu lwanyuma lwayo, nga khabonelo namwe nga shishiŋaŋasa bukwalaafu bweesi aba ni nabwo, khulwe khufukiilila khweesi aba ni nakhwo nga ashiili umusiinde. Shitsiililwa shaba nisho khumushuusa niye khumwikesa umukuuka uw'abo boosi babafukiilila, akhaba nga bali basiinde, ne nga babalibwa khuuba ni bukwalaafu. 12Nalundi shitweela busa abe umukuuka uw'abo babenjila imbalu. S'ali khulwe khukhwinjila bwingili imbalu ta, ne nga bali babaloondelela mu khufukiilila khweesi umukuuka weefwe Ibulayimu aba ni nakhwo, nga ashiili khukhwinjila imbalu ta.
Khusuubisa khweesi Wele akhola
13 #
Rak 17.4-6; 22.17,18; Gal 3.29 Wele n'alomela Ibulayimu ni babetsukhulu beewe ari alimulaamila shiibala shoosi khuuba shisheewe, s'aloma shino khulwekhuba bari Ibulayimu atsiila khu makaambila ta. Ne khulwekhuba Ibulayimu afukiilila mu Wele. Wakila Wele wamubala khuuba umukwalaafu. 14#Gal 3.18Ni shiba bari sheesi Wele asuubisa shiweebwa abo babaloondelela kamakaambila, shimanyisa shiri aba khufukiilila si khulimo itsamu yoosi ta. Nalundi khusuubisa khweesi Wele akhola nakhwo khuba nga mbaamo shishiindu shoosi ta. 15Khulwekhuba kamakaambila kareera lirima lya Wele. Ne akhaliwo likaambila ta, s'abawo khufuniaka likaambila lyoosi ta.
16 #
Gal 3.7
Shino nisho shishikila khusuubisa khwesi Wele akhola khwemikha khu khufukiilila. Nio khusuubisa khweesi Wele akhola isi babetsukhulu ba Ibulayimu khube nga khwemikhile khu bweela bweewe, ne akhali isi abo babaloondelela kamakaambila ta. Ne shino seshikholikha isi abo babaloondelela kamakaambila bonyene ta, ne ni isi abo boosi babafukiilila nga Ibulayimu n'afukiilila, khulwekhuba niye ali umukuuka uweefwe fweesi. 17#Rak 17.5Nga shisharonebwa ni shiloma shiri, “Naakhukalusile iwe khuuba umukuuka uwe kamanaambo kamakali.” Nashiryo khusuubisa ukhwo khuli khulayi mu moni tsya Wele, isi Ibulayimu afukiilisamo. Wele uyo niye ulamusa baafu, nalundi niye ukila bibiindu abe bibikhaliwo ta, byabawo.
18 #
Rak 15.5
Ibulayimu aba ni khufukiilila nalundi waba ni khukhwiyikina, shakila wekyela umukuuka uwe kamanaambo kamakali. Nga shisharonebwa ni shiloma shiri, “Babetsukhulu boowo nabo baliba bakali.” 19#Rak 17.17Ne Ibulayimu abe uwolesa kimiiko kye bukhulu ambi shitoondo shitweela, s'aba ni butoro mu khufukiilila khweewe ta, akhaba nga kumubili kweewe abe kwaweelemo kamaani. Namwe s'ambaasakho ari Sara anyala khumusaalila umwaana ta. 20Ne khufukiilila khweewe sikhwamuwamo ta, namwe s'ekanakana sheesi Wele amulomela ta. Akhali eloosela khutsowa mu khufukiilila khweewe, nga abuyila Wele, 21nga amanya bulayi busa ari, Wele akhaakhole isho sheesi amulomela. 22Khufukiilila khweewe nikhwo khukhwakila Wele wamubala khuuba umukwalaafu.
23Ne bilomo bibiloma biri, “Alibaliwa nga umukwalaafu,” sibyaronebwa khulwekhubeela niye yenyene ta. 24Byaronebwa khulweefwe nafwe, babaalifukiilisibwa nga bakwalaafu, khulwekhuba khufukiilila mu Wele, uwalamusa Yezu Kristu Umukasya weefwe, khukhwaama mu bafu. 25#Isay 53.4,5Kristu uyo bamwiira khulwe bibyonako byeefwe, ne lwanyuma Wele wamulamusa khukhwaama mu bafu, ari nio akile khube bakwalaafu isi Wele.
Currently Selected:
Baroma 4: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
