Tsinikha 4
4
Buukhulu bwe Kamakhula
1Baananywe, ni murekeerese buulayi byeesi paapa weenywe abaleekela.
Rekeeresa buulayi nio mufune khuumanya.
2Lwekhuuba ise byeesi imbaleekela bili biikhulu naabi,
nashiryo mukharura khu khuleekela khwase ta.
3Ise ni naba nga ishiili mwaana busa mu ntsu ya paapa wase,
nga ndi mukyeekhe busa naluundi nga ndi umwaana senyene isi maayi wase,
4paapa wase abe andeekela.
Abe amboolela ari, “Ushebulilatsaka biilomo byase, ukhabiibililatsaka ta.
Waakha khuuwaambila ilala biilakilo byase, ni nawe kane ube mulamu.
5Funa kamakhula, luundi ufune khuumanya, ukhebililakho na khakyeekhe,
waalekha byeesi ikhuleekela iwe ta.
6Ukhalekha kamakhula ta, lwekhuuba niko kane kakhukhiinge iwe,
n'ukakane naabi, ni nako kane kakhuliinde buulayi.
7Kamakhula kali shishiindu shikhulu naabi; nashiryo funa kamakhula.
Mu buli shiindu shoosi sheesi ukhakakho khuufuna, funa khuumanya.
8Yila kamakhula nga shishiindu she angaaki naabi,
ni nako kane kakhuniinise angaaki.
N'ukawaambe ukomiisile ilala, nako kane kakhureerere shiriifwa.
9Niko kane kakhukwaarise khu murwe kwoowo lihabi lye shiriifwa,
kane kakhurekho lihabi lye lukoosi.”
10Rekeeresa buulayi mwaana wase,
ufukiilile biilomo byase byeesi ikhuleekela iwe.
Ulwo manya nio uwangale kimiiko kimikali kye buulamu bwoowo.
11Ise nakhwookesa kumukhoosi kwe kamakhula,
nakhuraangilila khu ntsila intsalaafu.
12Buli isi kane ukyeendele khu mukhoosi kwoowo,
mbaawo shishikane shikhushinjilile ta,
na buli isi kane utimile, singene wituye na khakyeekhe khoosi ta.
13Iwe uli ni khuushebulilatsaka byeesi wiiyikile, ukhabilekha byaakhururakho ta.
Aamba buulayi byeesi usomile, lwekhuuba nibyo buulamu bwoowo.
14Ukhetubaasatsaka atweela ni babaandu baabi ta,
ukhaloondelelatsaka she khuubonelakho she babaandu baboonaki ta.
15Isho ukhakhakakho waashikhola ta.
Ukhatsya khu mukhoosi kwaabwe ta!
Nuwikaanile ilala, uwaambe kumukhoosi kukwoowo.
16Babaandu baabi si banyala baakona liilo ta,
khuurusakho nga baamalile khuukhola she bubwoonaki.
Baakona meeso khukhwoolesa nga baamalile khukhola buubi
khu muundu ukhalikho ni shiibi shoosi ta.
17Lwekhuuba nibo biilyo byaabwe nibwo bubwoonaki,
ni she khuunywa shaabwe shili bituluungu.
18Ne kumukhoosi kwe bakwalaafu kuli nga buwaanga bwe nyaanga itsasa kumutikhinyi,
bubuutsya nga bwiloosela khuukhosa khukhwoolesa kumuumu ni kwibaandulila ilala.
19Ne kumukhoosi kwe baboonaki nikwo kuli busa nga shishiilima namukoto,
ni nabo babeene si banyala baamanya shiina sheesi batsya khukhwituyakho ta.
20Iwe mwaana wase, rekeeresa byeesi ise ikhuboolela,
uwuliliise buulayi biilomo byase.
21Ukhalekha ilomo na ndweela yaakhururakho ta.
Waakha khuubishebulilatsaka, ubibiikhe mu mwoyo kwoowo mukari.
22Lwekhuuba biilomo bino bili busa nga buulamu
isi umuundu ubyakaanila, biwonesa buulamu.
23Waakha witsiliilise byeesi kumwoyo kwoowo kwambaasa,
lwekhuuba mu byambaaso byoowo nimwo mumuulimo buulamu.
24Ukhakanikhatsaka biilomo bibikhalimwo ta.
Ukhabakho ni ilomo yoosi iye bubeeyi,
namwe imbi irura mu khanwa mwoowo ta.
25Yinyusa tsimoni tsoowo uwunguuse ibweeni,
lolelela iburaangisi isi uli khuutsya.
26 #
Heb 12.13
Manya buulayi isi uli khuutsya,
nio isi bikyele byoowo bisaamba abe nga amanyikhile buulayi.
27Ukhanyukanyuka waarura khu mukhoosi,
weela khu lubeka lwe kumukhono kumulayi namwe khu lubeka lwe kumunyeletsi ta,
bikyele byoowo bikhakhuyila mu khwoonaka ta.
Lumasaaba Catholic Bible © The Bible Society of Uganda, 2017.